Saturday, August 04, 2012

الـــبِــنـــســـة









من عام ... ينقص او يزيد قليلا
كانت ميزانية البيت لا تخلو من بند أساسي


ألا و هو بنس الشعر الملونة
كانت الصغيرة تنال عقابا من امها لأنها اضاعت بنسة الشعر
كان يسقط من شعرها يوميا ما يتراوح من سبع الى تسع بنسات
وكانت تعاقب يوميا من سبع مرات الى تسع مرات
على حسب عدد البنس التى ضاعت
كان العقاب من الأم يتراوح ما بين الصراخ فى وجهها
او قرصة فى اعلى ذراعها الشمال
او شدة لديل حصانها حين تمشط الام لها شعرها




شعرها
هو كلمة السرلإكتمال جمال شكلها
كلمة السر لوصفها بانها اميرة صغيرة
كلمة السر لوصفها بالملاك
كلمة السر لينبهر الكل بتلك الطفلة الجميلة
ذات الشعر الناعم تلك النعومة الطاردة
التى لا تساعد على ثبات بنس الشعر به
شعرها الذهبي الجميل المتلائم مع العينان الخضراوتان
والبشرة البيضاء المشوبة بحمرة الدماء




الدماء
كانت هذه العلامة الأولية
حين اصابها يوما نزيف من الأنف
لم تهتم امها كثيرا بسبب النزيف
ولكنها اهتمت بكيفية ايقافه بالطرق التقليدية
بمرور الأيام تكرر نزف الأنف


مع ملاحظة انها لم تعد طفلة نشيطة
اصبحت تصاب بارهاق من أقل مجهود
اصبحت خاملة .. بشرتها مجهدة .. ودرجة حرارتها دائما مرتفععة


والنزيف الأنفي يتكرر
لابد إذاً من عمل الفحوصات الطبية اللازمة


الفحوصات الطبية اللازمة
اثبتت ان الصغيرة مريضة بسرطان الدم
اعتذر .. لا استطيع ان اصف مشاعر الام لدى سماعها لهذا النبأ
فأنا كأم الحمد لله يدي في الماء
وأرجو من الله أن لا استطيع يوما
ان اصف مشاعر تلك الأم .. وتبقى يدى فى الماء
ولكن دعوني ان أتخيل كيف يكون شعور الأم
لحظة سماعها لنبأ ان صغيرتها مصابة باللوكيميا
وإن قصرت فى تخيل الوصف فسامحونى
وادعوا لى ان لا أجرب ابدا شعور هذه الأم
تلقت الأم النبأ كجبل ينهار فوق رأسها
مخيلتها تصور لها مشاهد كارثية
لا ترى امام عينيها سوى كلمة الموت
لا ترى سوى اللون الاسود
لا ترى سوى كفن صغير بداخله جسد صغيرتها




صغيرتها
و أاااااااااااااااااااااااااااااااااه .. حين يتعلق الأمر بصغيرتها
فمشاعر الذنب تجاهها تسيطر عليها
تسال نفسها مرارا وتكرارا
هل انا السبب فى مرض صغيرتي ؟
هل انا اعتدت على اطعامها انواع طعام تسبب فى مرض صغيرتي ؟
هل انا املك جينات لهذا المرض واورثتها لطفلتي ؟
هل انا أُم لم تحمد الله بقدر كافى على نعمته علي
كانت مشاعر الذنب والخوف تجتاحها




الخوف يجتاحها
الخوف من الفقد يتوغلها
هي قد تكون على شفا فقد صغيرتها


صغيرتها
و أاااااااااااااااااااااااااااااااه ..على صغيرتها الجميلة ذات الشعر الذهبي الناعم
اعتذر ... اقصد التى كانت ذات شعر ذهبي ناعم




الصغيرة تخضع لعلاج كيماوي مكثف
جرعات العلاج تسبب فى فقدها لخصلات شعرها الذهبية
الام هلعت وشهقت عاليا حين كانت تمشط لابنتها شعرها
و وجدت ان شعر صغيرتها عالق بالفرشاة
و لم يكن الأمر يحتاج لفرشاة
فلمسة واحدة من يد الأم على رأس صغيرتها
كفيلة بأن تعلق الخصلات بأنامل الأم



اليوم
إذا سألت الصغيرة عن أمنيتها
ستقول لك كما تقول الطفلة صهيبة فاروق


في الاعلان الشهير الذي يمزق القلوب .. وبنفس النبرة
أنا نفسي أعيش




و إذا سألت الأم عن امنيتها
ستقول لك وعينيها تتلألأ بالدموع
نفسى ارجع ازعقلها من تاني على سقوط البِنسة من شعرها




***




إنتهى



_____________________






البوست مشاركة بسيطة
فى الدعوة للتبرع لمستشفى ابو الريش لعلاج سرطان الأطفال
والتفاصيل هنا عند داليا قوس قزح


اللهم يا رب الناس
أذهب البأس واشف مرضانا
أنت الشافي و لا شفاء إلا شفاؤك
اللهم إحفظ ابناءنا من الشيطان الرجيم
واشفهم من مرض القلوب والأبدان
اللهم امين
اللهم امين
اللهم امين

22 comments:

Haytham Kilany said...

حمدا لله ع السلامه
وشكرا ع وجع القلب
وربنا يشفى كل مريض
وجزاك الله خيرا ع المشاركه
والحمد لله الذى عافانا

ابو علي

Anonymous said...

أنا مش مسدء عنيا
خيخة رجعت بجددددددد
انتى كنتي فين الفترة إلي فاتت دى

وبعدين انتى راجعة علشان ابو الريش
طيب وحملة التبرع بالدم الخيخية انتى نسيتيها ولا خلاص اتخليتي عنها

بـت خـيـخـة وأي كـلام said...

هيثم كيلاني

الله يسلمك يا هيثم
وبعد الشر عليك من وجع القلب
واللهم امين
وشكرا
والحمد لله


شكرا ليك










الغير معرف


لأ طبعا منسيتش حملة التبرع بالدم

وبعتذر عن اني معملتش دعوة للحملة بتاعة شهر يوليو


شكرا ليك

إسلام said...

من كل البوستات المشاركة فى الدعوة للتبرع لأبو الريش
تعتبر مشاركتك المشاركة الوحيدة التى اثرت في نفسي و هزتني

وكما قال الاخ هيثم الكيلاني
شكرا على وجع القلب


حمدا لله على سلامتك
كنا نفتقدك كثيرا

ابراهيم رزق said...

حمد الله على السلامة
و ربنا يحفظ ليكى شريف ويخليه
ويجعل اعمال فى ميزان حسناتك

تحياتى

Empress appy said...

مش هقدر اتكلم عن الاسلوب اللى انا منبهره بيه كان نفسى طبعا ابقى معاكوا بس انتى عارفه دعواتك ليا يا خوخه اقوم بالسلامه بوسات كتير لشريف

Anonymous said...

روحي يا شيخة ربنا يعمر بيتك ومتشوفيش مكروه فى ابنك ابدا
خلتينى اعيط على الصبح
اسلوبك متميز طول عمرك
وانتى جيتي على الجرح بجد
مريض السرطان فعلا مبيقدرش يتحمل نفسيا فقدانه لشعره
بيكون وجع من نوع تاني
والدى كان بيفقد شعره اثناء العلاج
وكانت حالته زى الزفت
وده راجل يعنى اكيد البنات والستات بتكون حالتهم اصعب لان تاج المرأة شعرها
والمشكلة بتكون اصعب على البنت الصغيرة
لان الستات الكبار ربنا كرمهم بالحجاب فحتى لو واحدة حصلها حاجة
بتكون اغلب الوقت لابسة حجابها
لكن الاطفال دول بيكون اصعب بجد
ربنا يشفيهم
وبجد يا خيخة البوست روعة
ربنا يكتبه في ميزان حسناتك

على فكرة انا خليت اخويا يقرا البوست وهو اول مرة يقرالك
قعد الاول يضحك على اسم بت خيخة واي كلام
وبعد ما قرا البوست فضل يقلب فى المدونة كلها ومن ساعتها وهو بيضرب كف بكف وبيقول البت دى ازاى كدة
ههههههههههههههههههههههههههههه
وانا اخويا ده بقى دماااااااااااغ
و مش اى حد يدخل دماغه
بس انتى عرفتى تدخلى دماغه علطول
يعني معجبينك هيزيدوا واحد يا ست خيخة
والبركة فيا
:)

weka said...

يااااااااااااااااااااه
حمدا لله على السلامة يا نورا
أخيرا ظهرتي

كل سنة وانتي طيبة وشريف طيب

البلوجر وحش من غيرك

البوست جامد ومشاركة متميزة منك

يارب تكوني بخير

Anonymous said...

هو البوست ده يتعلق عليه ازاي ؟

انا بجد مش لاقي كلام اقوله

BRAVOOOOOOOOOOOOOOOOOOOOOOOOOOO

Anonymous said...

منورة المدونة يا خيخة
ياريت بقى تنوري الفيس بوك وترجعي الاكونت بتاعك
الفيس ممل جدا من غيرك
والجروب من غير القائدة بتاعته بقى حالته تصعب على الكافر
احنا شيرنا البوست هناك فى الجروب
وكلهم فرحانين برجوعك للتدوين تاني

ياريت تيجي هناك فى الجروب تطلي علينا طلة
وتشوفى غيابك عامل فينا إيه



أمل وأمنية

وحدي لكن ونسان said...

Big Like

قوس قزح said...

جزاكى الله كل خير

على فكرة نفس مواصفات البنت دى انا شوفتها هنا .. لبنت عندها مشكلة فى الدم و بتعمل كل شهر نقل دم و بلازما ..و امها قالت لى انا باعرف انها تعبانة لما لونها يبقى اصفر و حركتها تقل
كان عندها 11 سنة

كلامك رغم الالم اللى بنحسه و احنا بنقراه .. للاسف واقعى جدا :(

بـت خـيـخـة وأي كـلام said...

إسلام

بعد الشر عليكم كلكم من وجع القلب

شكرا ليك






ابراهيم رزق

الله يسلمك يا ابراهيم

وشكرا ليك




APPY

ربنا يقومك بالسلامة ان شاء الله يا رحاب
ويتمملك شهور الحمل على خير يا حبيبتي
شكرا ليكي









الغير معرف

ربنا يتم شفاء والدك على خير إن شاء الله

شكرا ليك وشكرا لأخوك






WEKA

الله يسلمك يا ويكا

وانت طيب

شكرا ليك







الغير معرف

:)

شكرا ليك





أمل وأمنية

شكرا ليكم يا بنات








وحدي لكن ونسان

:)
شكرا ليك








قوس قزح

ربنا يشفيها يا رب

جزاكى الله خيرا يا داليا
شكرا ليكي






شكرا ليكم كلكم على تواصلكم معايا

فاتيما said...

كالعــــــــــــادة

مميزة
وصادقة
ومختلفة
ومباشــرة
وف قلب القلب


:)


ألف حمدلله ع السلامة ياخوختى
:-*

بـت خـيـخـة وأي كـلام said...

فاتيما

الله يسلمك يا طمطومة
وحشتيني والله
كل سنة وانتي طيبة يا حبيبتي
و يارب تكوني بخير

:)

شكرا ليكي

Anonymous said...

وحشتيني جدا جدا
كل سنه وانت وشريف بخير ان شا الله
كنت قلقانه عليكي ورقمك اتمسح من عندي مش عارفه اطمن عليكي لامن المدونه ولا بأي وسيله تانيه داليا بتكتب تنيهات على الفيس بوك بقلها كام يوم وكل يوم اقول نورا أكيد هتنطق ولما نطقتي اوجعتي
نورا ربنا يكفيكي ويكفي امهات المسلمين شعور الهلع والفجعه على اولادهم او احبابهم
اختك في الله
مروه
ملحوظه على الماشي
احمد باعتلك تحيات واحترامات
ورضا باعت بوسات وحوضونات
ماي دريم

بـت خـيـخـة وأي كـلام said...

ميرو

كل سنة وانتى طيبة يا حبيبتي
وكل سنة واحمد ورضا طيبين

والله يا مروة انا مكونتش هانطق ولا كنت هاكتب ولا كلمة
لان بقالى فترة مش متابعة التدوين
لولا انسانة جزاها الله خير متابعة المدونات وعرفت توصل ليا وقالتلى على ابو الريش
فلولاها مكونتش كتبت حاجة ولا كنت عرفت اساسا

واسفة اذا كان كلامى وجعك

ربنا يحمى ولادنا ويبعد عنهم كل شر



سلامى لاحمد كتير وبوسيلى رضا


وبالنسبة للرقم متشليش هم انه اتمسح

انا أساسا غيرته خالص

شكرا ليكي

Anonymous said...

http://www.youtube.com/watch?v=k7ZjHvjsxaQ&feature=related

بـت خـيـخـة وأي كـلام said...

الغير معرف


!!!!!!!!!!!!!!!!!!!!!!!!!

Sarah .. said...

وجعتينى أوى :(

الحمد لله الذى عافانا
وربنا يشفى ويعافى الناس كلها يارب
زى ما قولتى من أمراض القلوب والأبدان
يارب

حمدلله على سلامتك يا خوخة
ورمضانك كريم .. ربنا يتقبل

بـت خـيـخـة وأي كـلام said...

سارة

أعتذر عن أى وجع يا سارة


واللهم امين ربنا يشفى كل مريض


الله يسلمك ورمضان كريم


شكرا ليكي

wella said...

بقالى كتير جدا مادخلتش على المدونة بس ديما فى بالى اصل اسمك ومدونتك صعب فعلا تتنسى


بجد الوست حلو اوى على اد ماهوة بيوجع اوى اوى انتى كتباه بطريقة رائعة وربنا يحميللك ابنك ويحميكى من كل مرض يارب ويشفى كل الاطفال يارب

ويلا

users online