Monday, November 05, 2012

نــيــفــيــن بـِـــزّو





كنت اسمع حديث بعض الفتيات يذكرن فيه اسمها
واحدة تقول : نيفين بزو قالت ان احمد هايسبنى
واخرى تقول : نيفين بزو قالت انى هتجوز علي بتاع هندسة
واخرى تردد : نيفين بزو عرفت ان ماما ميتة  من غير ما أقولها

وهكذا كنت اسمع عنها الاقاويل
فسالت عنها احدى زميلاتى
هى مين نيفين بزو دى؟
فقالت لى دى واحدة  من لغات
 مشهورة  انها بتقرا الكف حلو اوى
وسالتها هى بتاخد فلوس  يعنى على الموضوع ده ؟
فقالت لى : لأ .. دي بتعملها كدة هواية
وسالتها بصوت خفيض :  وايه حكاية بزو دي كمان؟
فقالت لى وهي تضحك   : اصل  ربنا مباركلها في الحاجات  
**
صادفتها ذات يوم في  حمام النساء
كانت تجلس على الأرض وتمسك بكف إحدهن
 وتقول لها بعض الاشياء وتهمس لها بالبعض الاخر

انتظرت حتى انتهت
ونظرت لها
فأشارت لي
وسالتني : هو انتى نوران بتاعة إعلام؟
هززت رأسي بأن نعم
وسالتها بتوجس : عرفتي منين ؟
شدت قامتها وفردت ظهرها فارتفع صدرها لأعلى
وقالت وهى تهز صدرها يميناً ويساراً
زي ما انا معروفة ببزازاى
انتى معروفة بشعرك الطويل ده
واشارت الى شعري
ضحكت انا ومن معي على كلماتها وحركاتها
واشارت لى بأن اجلس امامها
وقالت لى هاتى كفك اعرف المستخبي

ابتسمت و استسلمت لها وجلست امامها

انا كنت ومازلت
 احب قراءة الطالع والكف و الودع وكل هذه الاشياء
على سبيل التسلية ليس اكثر
فلم يكن لدي أي  مانع كى اخوض تلك التجربة

مددت لها كفي الاثنتين؟
و سالتها : عايزة انهي واحد فيهم
مسكت الاثنان ونظرت فيهما مليا
واختارت الكف الأيسر

في البداية قالت لى بعض المعلومات  الصحيحة
  والتي اعرفها مسبقا عن بعض افراد اسرتي
 و البعض الاخر اثبت صحته بمرور الأيام
ثم قالت لى
هتتجوزي كتير ..  بتاع تلات مرات
وهتخلفى ولد واحد .. او هتخلفي تلات بنات
أو هتخلفيهم كلهم
بس لو خلفتى ولد وتلات بنات
 مش هيكونوا شقايق
 هيكون الولد من اب
 والبنات من اب تاني
و كل اللى هتتجوزيهم هتتطلقي منهم
 ماعادا الاخير ..  ده اللى هتفضلى معاه لحد ما حد فيكم يموت
ثم سالتني : تعرفي حد ملتحي ؟
فقلت لها : لأ
فقالت لي إما هتتجوزي واحد ملتحي
 أو هتخلفي ولد لما يكبر هيلتحي
المهم ان الشخص ده هيحبك أوي 
قلت لها : مفيش تحديد اكتر ان كان زوج او ابن
فقالت لى : مش واضح
سالتها : طيب ايه اللى جاب الزوج للإبن
فقالت لي : باين عندي إن فيه بين رجليكي راجل ملتحي
واللي ما بين الرجلين حاجة من الاتنين
 يا إما زوج بيعاشرك او عيل بتخلفيه
ضحكت عاليا  وقلت لها  : كملي  
فسألتني : مين خالد ؟
فقلت لها: كان خطيبي
فهزت رأسها  بالإيجاب  وقالت : بيحبك أوي
ثم غمزت بعينيها وقالت : يا بنت المحظوظة كلهم هيحبوكي
فسألتها : كلهم مين؟
فقالت : كل اللى هتتجوزيهم هيحبوكى أوى
 حتى اللى هتتطلقي منهم هيفضلوا يحبوكي
فضحكت وقلت لها بنبرة ثقة تمثيلية : طبعا .. وهما هيلاقوا زيّ فين ؟
فضحكت على كلامي  واكملت النظر في كفي
ثم بدأت تتجهم
فسالتها ضاحكة : إيه؟ .. هموت صغيرة ولا إيه ؟
فابتسمت وقالت  انا مبقولش لحد هتموت امتى
 الاعمار بيد الله .. كل حاجة بيد الله
سألتها :  طيب مالك كشرتي ليه؟
فنظرت لى  وقالت : حياتك هتكون مليانة احداث كتيرة مهمة
فطلبت منها ان تقول لي تلك الاحداث ..  فرفضت
 تحايلت عليها .. فمالت على اذني وهمست بأربعة احداث
ثم قالت لي : كفاية عليكي كدة .. خلي الباقي مفاجأة
اتذكر ان من شدة هول الأربعة أحداث التى همست بهم فى أذني
بإني ضحكت وقلت لها : أه فعلا كفاية أوي
فابتسمت ونظرت  نظرة اخيرة متفحصة لكف يدي
ثم قالت بيأس : انتي متعبة أوي يا نوران
فضحكت وقلت لها
 قديمة .. ده تلاقي حد من الدكاترة بتوعى هو اللي مغششهالك
ضحكت  وهى تترك كف يدي من يدها علامة على انتهائها من قرأته
تبادلنا بعض الكليمات والقفشات  ونهضت وتركتها

خرجت وانا اقول لمن كانت ترافقني
البت دى هبلة ومش فاهمة حاجة
قال انا اتجوز كتير قال ؟
وايه عيل واحد ده كمان اللى اخلفه؟
 ويعني ايه اجيب عيال كتير مش شقايق !!!
أنا معنديش الكلام ده
إن شاء الله انا هتجوز مرة واحدة
 و هخلف خمس عيال شقايق .. تلات ولاد وبنتين

**
مرت خمسة عشر عاما تقريبا على هذا اليوم
وكنت قد نسيته برمته

تذكرته فقط منذ دقائق واصبت بقشعريرة
فما قالته نيفين بزو  وما همست به  فى اذني في ذلك اليوم البعيد
تحقق الى درجة كبيرة

الأن انظر الى كف يدي و ابتسم 
وانتظر الحدث الرابع  المهول
وانتظر أيضاً  الزوج الأخير
 الذي سيتحملني حد الموت
___________

إنــتــهــى

9 comments:

ابراهيم رزق said...

قال تعالى
(قُلْ لَا يَعْلَمُ مَنْ فِي السَّمَاوَاتِ وَالْأَرْضِ الْغَيْبَ إِلَّا اللَّهُ)
و قل فانما الغيب لله
صدق الله العظيم

طبعا انا مش عايز اخرجك من تنبؤات الست نفين حتى و لو صدفت فى بعض الاحيان

لكن اتمنى لكى السعادة فى زواج ثالث تستقرى فيه فى سعادة الى نهاية العمر بأذن الله و تخلفى عشر بنات
ويفضل شريف ديك البرابر
سلامى لشريف
تحياتى

محمد said...

ياخسارة يانورا

ياخسارة يا أم شريف

ياخسارة

R-H-S said...

ايه انتي اتجوزتي تاني واطلقتي وانا مش موجود
فعلا اتجوزتي تاني؟؟؟

my dream said...

بعد خروجي من مود الهم الي كنت فيه امباح اقد ارد عليكي هنا بقى
يارب
يصيبك من تنبؤتها الي يسعدك
ولو اصابك منها ما يؤلم فايارب يكون رفع درجاتك عند الله وتكوني من من ابتلاهم الله ليطهرهم
ويارب الجاي احلى ليك ولشريف ولكل حبايبك يانورا

دمتي بخير
اختم مروه
احمد بيدحرج الصباحات ورضا طبعا باعت بوسه كبيره وحضن اكبر

weka said...

كذب المنجمون ولا صدقوا
و ساعات بيقولوها كذب المنجمون ولو صدفوا

التعليق الاولاني مش للنشر طبعا

تحياتي



Sarah .. said...

ربنا بيسبب الأسباب مش أكتر .. يا خوخة !

مذكرات موززه عانس said...

:)
بعد كذب المنجمون ولو صدقوا او صدفوا مش عارفه
ربنا مداش ره لحد لكن بتمنالك زى ابراهيم بالظبط زواج تستقرى فيه ويسعدك حتى الموت :)
بس المهم الاقى نيفين بزو دى فين تقولى اذا كنت هاتجوز اصلا ولا لأ ؟هههههههههههههههههههههههههههههههه

محمد قنديل said...

ربنا يرزقك بزوج تستقري معاه يا أم شريف و تهبطي و تتهدي شوية بقى بدل شغل فرقع لوز ده :)

بجد ربنا يرزقك الإستقرار و الطمأنينة و السعادة

بـت خـيـخـة وأي كـلام said...

شكرا ليكم كلكم على تواصلكم معايا

users online