Saturday, January 19, 2013

خـــيـــخـــيـــات ... مـــتـــقـــاطـــعـــة




و رغم اني مكونتش بسمع الكلام
وكنت  زوجة بتطلع تربنتين اللي بتتجوزهم
الا اني بحب الزوجة اللي بتسمع كلام جوزها
و بنشكح اوي لما اشوف  زوجة  مطيعة  لزوجها
**
مبحبش الست اللى بتلبس حشمة فى بيتها
**
الطلاق  مش كل واحدة تقدر تتحمل تبعاته
فلو مش اد الطلاق  متطلبهوش و لا تصري عليه
و اللى اقدر استحمله انا
 مش بالضرورة انتي تقدرى تستحمليه
انا نورا .. لكن انتى حد تاني غيري
**
التالتة ليست بالضرورة ان تكون تابتة
**
هو : جوزك التاني كان مين ؟ .. اسمه ايه ؟
انا : وانت مال اهلك
**
نفسي اعرف مين اللي هيموت يوم 26 يناير
وش واحدة مترقبة وحزينة
**
خـُـلقت كي اعيش وحيدة
**
و الجميل في الموضوع ان يوم 25 يناير هيوافق يوم جمعة
**
و قال لي : انتي مش باقية على حد
 و مبتقربيش من حد ولا بتطلبي ود حد
**
مين هنا من
 بيت دجن / هامركاز/ فلسطين المحتلة ؟
**
فيه على الارض قشرة فول سوداني
بقالها بتاع تلات ايام
وانا مكسلة اشيلها
وشكلها منرفزني
لو كان شريف موجود كنت خليته يشيلها
**
و اصعب من فراق شريف
هو انى مبلاقيش حد ابعته يرمى الزبالة
 و يجيبلي بيبسي وشكولاتة
انا حقا مفتقدة شريف
بس سيبكم انتوا ... القاعدة لوحدي بالدنيا ومافيها
نيهاهاهاهاهاهاهاهاهاهاهاهاهاهاهاهاهاع
**
انا بحب طنط فاطمة
**
و من احلامي ان  كان نفسي اشتغل فى مصنع شكولاتة
و اكون انا مكان البتاع اللى بيصبوا فيه الشكولاتة وهى سايحة
**
انا مبطيقش الخولات
**
مين اللي هندفنه  يوم 26 يناير ؟ .. ميييييييييييين ؟؟؟؟؟؟
**
هو : انا عارف ان انتى كنتِ على علاقة بفلان
انا : ده كان جوزي يا روح أمك
**
لو حد فيكم يعرف حد محتاج كرسي بعجل .. يا ريت يبلغني
**
عايزة اشتغل نجارة او عاملة بناء
**
و كان من احلامي انى اسوق جرار
**
مبقتش احب اشرب الشاي بالفانيليا ولا بقيت بحب ريحته
**
عارفاكوا  .. بتحبوا الحاجات دي .. يا خلابيص
**
الجواز نصيب ... و الطلاق قرار 
**
هو انا بس اللى بصحى من النوم
 الاقينى بفردة شراب واحدة ولا ده بيحصلكم انتوا كمان ؟
**
بكتشف تعاوير في جسمي مجهولة المصدر
**
اه والله باتكسف
**
حلوة الاغنية اللي انا بسمعها دي
**
و بغض النظر عن معناهم
إلا إني بحب كلمة زنديق و زنديقة ... بحس ان فيهم موسيقى
**
عايزة اتكلم عن ابني اللي مخلفتهوش
**
انا بحب بديعة مصابني
**
فيه حاجات كتير مكتبتهاش
و فيه حاجات اكتر كتبتها و منشرتهاش
**
مبحبش الشراشيب اللي في الايشاربات
 ولا اللى فى الستاير ولا اللي فى السجاجيد
انا مبحبش الشراشيب خالص في أي حاجة
**
ندى هتتجوز
انا لسة فاكرة يوم ماتولدت
العيال كبرت يا جدعان
**
يوم 15 يناير كملت 35 سنة
يعني فاضل 10 سنين واقدر اروح احج من غير محرم
**
كل اللي بيقولى يا انسة .. هايروح الجنة حدف
**
انا بحب خالد صاحب شريف
كان فاكرنى اخت شريف
المجد .. كل المجد .. للعمر اللي مش باين على الواحد
**
في يوم من الأيام شريف كان بيحكي لهاني
على ان خالد صاحبه قال : مامتك طيبة اوى يا شريف
ولما هانى سأل شريف : وهى ماما طيبة ؟
شريف قاله من غير تفكير : لأ
هاني ضحك وقاله :
 لا يا شريف ..  ماما طيبة بس هي زربونة شوية
شريف قاله  : ماما زربونة على طول يا بابا
اسالنى انا .. انا عايش معاها وعارفها اكتر من حضرتك
**
فكروني ابقى احكيلكم عن موقف النملة
**
مفيش نصيب
***
أخر الكلام


انا كل قلب دخلت جواه اتحرق
_______


إنــتــهــى

14 comments:

فافى said...

انا كمان مبحبش الشراشيب فى اى حاجه عايزين نبقى نسأل على السبب السيكولوجى لموضوع ده :)
ماقدرشى انكر ان فيكى كتير منى لكن انتى اجرأ كتير :)

ياريت لما تعملوا اى تجمع للمدونين تقولوا لى انا نفسى اشوفك انتى وفاتيما اوى اكتر اتنين
تحياتى :)

Baskouta said...

أعتقد ان موضوع فردة الشراب ده
ظاهرة منتشرة
انا بنام بفردتين أصحى بفردة واحدة وأختي كمان
وعمري مافهمت ليه بيحصل كدة
-----
ربنا يبارك في شريف ويجيبلك دايما شوكولا وبيبسي وتتونسي بيه
-----
انا كمان كان نفسي اشتغل في مصنع شوكولا
واشتغل ذواقة

أدوق كل الشوكولاتات الجديدة قبل كل الناس
----
مساكي دافي وطعمه شوكولاتة
:)

بـت خـيـخـة وأي كـلام said...

فافي

:)
واحنا هنتشرف بمعرفتك

شكرا يا فافي









بسكوتة

اتبسطت لما لقيت تعليق منك
واحشاني يا بسكوتاية
:)

مساكي زيك رقيق

شكرا يا حبيبتي

بـت خـيـخـة وأي كـلام said...

الاخ الزميل اللي بيسال عن الكرسي ابو عجل


اه يا فندم الكرسي لسة موجود

حضرتك سيبلي عنوان الناس اللى عايز تديلهم الكرسي وانا اوصله لحد عندهم

ولو حضرتك عايز توصله بنفسك
مفيش مانع
بس بعد اذنك تبعت حد اكتوبر ياخده مني

شكرا ليك

بـت خـيـخـة وأي كـلام said...

الزميلة العزيزة اللي طلبت انى منشرش تعليقها


وصلني منك اربع تعليقات لحد دلوقتي
و براحتك خالص قولى كل اللى عندك
وانا هابقى ارد عليكي بعد ما تخلصي كل كلامك

خدي راحتك وانا مش زهقانة ولا حاجة
:)



ابراهيم رزق said...

هههههههههههههههههههه
وأنا في الضلام .. من غير شعاع يهتكه
أَقف مكاني بخوف ولا أتركه
ولما بيجي النور وأشوف الدروب
أحتار زيادة .. أيهم أَسلكه ؟
عجبى ؟

انتى كده يا خيخة محتارة و انتى فى النور و محتاره وانتى فى الضلمة


بستمتع قوى وانتى بتكتبى على راحتك
لان دى اكبر ميزاتك التلقائية والبساطة

هو انتوا ليه بتناموا بشرابات
اعتقد ان الست المصرية الوحيدة اللى بتلبس شراب فى البيت ومش بعيد تلبس كالسون كمان على راى توفيق عكاشة

ربنا يخليكى لشريف و يخلى شريف ليكى
واد زى العسل بجد مامته نحلة نحلة

سلميلى عليه وبلغيه سلام طاير حاير من ساليناز
شفتى بقى الابهات اللى بيوصلوا السلامات
هههههههههههههههه

تحياتى

بـت خـيـخـة وأي كـلام said...

ابراهيم رزق

انا مش محتارة ولا حاجة
انتوا اللي محتارين معايا
نيهاهاهاهاهاهاهاهاهاهاهاهاهاهاهاع


لا يا عم كالسون ايه
ده انا لسة بقول انى مبحبش الست اللي بتلبس حشمة فى بيتها
تقوم تقولي كالسون



النحلة مش بس بتنتج عسل
دى بتقرص كمان


و شريف كمان بيسال على ساليناز
و بيسالني التبرع بالدم امتى علشان اشوف صاحبتي

ربنا يبارك فيهم و يحفظهم هما وكل ولادنا يا رب


شكرا ليك

بـت خـيـخـة وأي كـلام said...

weka

اكتب تعليق ينفع يتنشر









حسام شعبان

مش فاهمة حاجة
!!!!!!!!!!!!








الزميلة العزيزة

براحتك خالص يا حبيبتي
انا مش مستعجلة على حاجة
انا عايزاكى انتى تاخدى هدنة من الكتابة
و ترتاحى شوية
انا تعبتلك من كم الكتابة ومن كم الاحداث والتفاصيل اللى بتفتكريها و تسرديها

انا لو اعرف ان البوست هايعمل فيكم كدة مكونتش كتبته

خدي راحتك
وانا متابعة كل تعليقاتك و وصلونى كلهم

شكرا ليكي










الاخ الزميل

انا اللي بشكرك يا فندم
و جزاك الله خيرا
يا رب بس الكرسي يكون مناسب للحالة

شكرا لحضرتك

بـت خـيـخـة وأي كـلام said...

الاخ الزميل المدون اللي منشرتش تعليقه




أحيييييييييييييييييه

!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!


هو ايه التعليق اللي انت كاتبهولي ده ؟
!!!!!!!!!!!!!!!!!!!!!!!!!!!!!!


هو حد سرق الباسوورد بتاعك ولا إيه ؟
!!!!!!!!!!!!!!!!!!!!!!!!!!!!!!!!!!!!!!!


بـت خـيـخـة وأي كـلام said...

لا بجد انا مصدومة
ومحتاجة افهم ايه التعليق ده
!!!!!!!!!!!!!

يعنى اقولك ايه ؟؟
ده لو انت فعلا اللى كاتب التعليق ده اضحك عليا و قول ان الباس وورد اتسرق

انا مش قادرة استوعب ان انت تكتب تعليق كدة


ارجوك لماتقرا تعليقاتى دى فهمنى ايه تعليقك ده؟؟؟؟

!!!!!!!!!!!!!!!!!!!!!!!

Abu ShoSho said...

{فَاطِرُ السَّمَاوَاتِ وَالْأَرْضِ جَعَلَ لَكُمْ مِنْ أَنْفُسِكُمْ أَزْوَاجًا وَمِنَ الْأَنْعَامِ أَزْوَاجًا يَذْرَؤُكُمْ فِيهِ لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ}

الأستاذة الآنسة المدام نوران

اسمحي لي أولا أن أشكر الأستاذ(ة) ويكا على قيامه(ا) بواجب التهنئة بيوم ميلاد (الجدعنة)، و هو واجب قصرنا فيه ليس عن نسيان و لكن حبسنا عنه الخجل، أما و قد ذكرته فكل عام و أنتم بخير و عمر مديد سعيد، في بدن صحيح و قلب سليم و عقل سديد و رزق طيب واسع في طاعة الله سبحانه.

مستفزة للفكر مثيرة للتأمل دائما تدويناتك، أعترف أني أحيانا لا أفهمها ربما لضيق الأفق أو قلة الخبرة أو محدودية الذكاء - الحمد لله. و كنت أود أن أعلق على بعضها قبل أن يستوقفني تعليق الأستاذ المفضال أبو ساليزيادسو بوصفكم -عن حق - بالنحلة، و إذا كان العسل شريفا فمدونتك هي خلية الشمع. و أعجبني أكثر ردكم عليه و أحسست بطمأنينة أن وهبك الله قدرة على الصد و الزود و ذكرت {يَا نِسَاءَ النَّبِيِّ لَسْتُنَّ كَأَحَدٍ مِنَ النِّسَاءِ إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَعْرُوفًا} فحمدت الله و دعوت الله أن يمن عليك بصحبتهن.

تحياتي
أبو شوشو

حبات التوت said...

:) حاجات كتير من اللى قولتيلها اغلبنا بنحس بيها
ربنا يسعدك يانوران :)

Abu ShoSho said...

الأستاذة الآنسة مدام نوران

أود أن أوضح بعد نشر التعليق أن استشهادي بآيات القرآن الكريم ليست دليلا على التدين بل ربما عكس ذلك تماما{وَمِنَ النَّاسِ مَنْ يَقُولُ آمَنَّا بِاللَّهِ وَبِالْيَوْمِ الْآخِرِ وَمَا هُمْ بِمُؤْمِنِينَ}. إنما مثلي كمثل الأستاذ أبي سالزيادسو - بالياء أصوب و أعتذر عن سبق لساني في التعليق السابق - في استشهاده بأبيات الشعر و رباعيات الجاهين بعد أن لمست وترا في قلبه و عقله وجد أنها أصدق تعبيرا عما يريد من كلماته هو. و لو وجدت في حكمة الفلاسفة و أودية الشعراء مبتغاي لأوردتها دون تردد. كل ما أرجوه من ضيوفك الكرام أن ينظروا في مجل الاستشهاد و إلي الأفق الذي تمتد إليه الآيات. فالآية الأولى محاولة لإجابة على سؤال ورد في التدوينة الماضية و الآية الثانية تعبير .... و هنا لا تسعفني الكلمات لذا سأترك لفطنتكم الإبحار مع الآية في بيان القرأن.

الأستاذة الآنسة مدام نوران
كما أحببنا معك شخصيات مدونتك و تجربة حياتك و منهم (طنط فاطمة) أرجو من سيادتك أن تعرفينا بها فإن لم تخني الذاكرة فهذا أول ظهور لها على المسرح. حفظك الله و حفظهم و رحمك و رحمهم و جمعنا جميعا في جنته.

تحياتي أبو شوشو

NAGWA said...

دائما خواتيم كلامك مبدع ومحرق


انا مش همدحك بقى أنا هسيبك للزمن يديكي مديح الراحه والطمأنينة والاستقرار

نفسي يا خيخو ترتاحى وجيناتك تروق كدا وتقعد في مكانها يومين ع بعض منه ترتاحى ومنه تلاقيلك بر سلام


بحبك وعمرى ما شفتك بس بينا هوه مشتركه من الفقد


نووج

users online