Sunday, June 23, 2013

كـِــش مـــلـــك




ميعرفش عنها حاجة غير إن اسمها نوران

و معرفش الاسم منها

 ده عرفه من إيصال دفع رسوم اشتراك تعليم الشطرنج

لما قدمتهوله و سألته : هنبتدي امتى ؟



في أول مرة  استغرب انها رفضت الجيش الأبيض

و إختارت الجيش الأسود

ابتسم و قالها  : غريبة ..  محدش أبدًا بيختار الإسود  .. الكل بيتفائل بالأبيض

قالتله بلا مبالاة  : أكيد ميعرفوش إن سر القوة  دايمًا مدفون فى اللون الإسود



استغرب أكتر لما لقاها بتعرف تلعب و إنها مش محتاجة حد يعلمها

و سألها : دفعتي اشتراك تعليم ليه  طالما بتعرفي تلعبي؟!!

ردت عليه بثقة  : معنديش حد ألعب معاه و ... أهزمه   



بمرور الوقت لاحظ إن شعرها دايما مبلول فى كل حصة

مرة سألها : إيه سر الشعر المبلول ؟

جاوبته  : بيكون عندي تدريب سباحة قبل الشطرنج



حس بقشعرة في جسمه لما نطقت بكلمة سباحة

و تخيلها  وهي بتنط فى حمام السباحة بــ قسوة

 زي قسوتها في حصار الملك بتاعه و هي بتقول بلهجة عادية 
و كأنها متعودة على الإنتصار

 "  كش ملك "



شيء غريب كان بيخليه عايز يعرف عنها كل حاجة

لكن ملامح وشها الجامدة و الخالية من أي تعبير

كانوا بيخوفوه انه يسألها



في يوم  انتصر على خوفه 
 وسألها اذا كان ينفع يعزمها على فنجان قهوة بعد الحصة

رفضت متعللة بإن عندها درس رقص بعد الحصة

اندهش و مقدرش يمنع نفسه من انه  يسألها

 سباحة و شطرنج و رقص !!!!!!! ... و ايه تاني يا ترى ؟

جاوبته من غير ما ترفع عينها من على رقعة الشطرنج

"و حفظ قرآن و عزف على العود و رماية و كورشيه و أورجامي و كونغ فو"

لما سألها : ليه كل ده ؟

جاوبت ببساطة  وهي  بتحاصر الملك بتاعه بحصانها

" أصل عندى واوا بداريها .. كش ملك  "



____________



إنــتــهــى





أخر الكلام

كل منا لديه ألم أكبر من أن يحكي عنه أو يبكي منه
فقط  .. نحاول جاهدين بشتى الطرق أن نخفيه عن الناس و عن أنفسنا

  

24 comments:

ابو ملك و مريم said...

أستاذة و رئيسة قسم

riri said...



كل منا لديه ألم أكبر من أن يحكي عنه أو يبكي منه
فقط .. نحاول جاهدين بشتى الطرق أن نخفيه عن الناس و عن أنفسن


انتى ازاى كده ؟؟؟؟

أحمد سعيد said...

هايل يا خيخة


البوست مش طويل
لكن مليان مقاطع قوية و دسمة زي


ميعرفش عنها حاجة غير ان اسمها نوران


أكيد ميعرفوش إن سر القوة دايما مدفون في اللون الإسود


معنديش حد ألعب معاه و ... أهزمه


و تخيلهاوهي بتنط فى حمام السباحة بــ قسوة زي قسوتها في حصار الملك بتاعه و هي بتقول بلهجة عادية
و كأنها متعودة على الإنتصار
" كش ملك "


في يوم انتصر على خوفه


جاوبته من غير ما ترفع عينها من على رقعة الشطرنج



جاوبت ببساطة وهي بتحاصر الملك بتاعه بحصانها

" أصل عندى واوا بداريها .. كش ملك "



أخر الكلام

كل منا لديه ألم أكبر من أن يحكي عنه أو يبكي منه
فقط .. نحاول جاهدين بشتى الطرق أن نخفيه عن الناس و عن أنفسنا



و طبعا الصورة
انتي بتعرفي تجيبي الصورة المناسبة للبوست المناسب
عليكي شوية صور روعة بجد


تحياتي لقلمك

سوبيا said...

:(

بـت خـيـخـة وأي كـلام said...

الزميل العزيز اللي منشرتش تعليقه بناءا على طلبه


اولا
أحب بس اقولك انى فرحانة انك متابع حتى ولو كنت متابع في صمت


ثانيا
شكرا على تعليقك


و ردي عليك كالأتي

احنا كلنا مرينا بإخفاقات فى حياتنا و بنبقى محتاجين انتصارات زائفة علشان تعمللنا توازن و ميحصلناش انهيار تام

محتاجين نغرق فى تفاهات من وجهة نظر البعض
محتاجين نشغل وقتنا بأي حاجة و كل حاجة


الكتابة بالنسبالي يا إسلام
ليها اكتر من معنى
على حسب حالتي
ساعات بكتب كي أشفى
و ساعات تانية بكتب كي أتحرر
و ساعات تانية بكتب كي أنسى
و ساعات تانية بكتب كي لا أنسى
و ساعات علشان حاجات تانية لا يسع المجال لذكرها

ممارسة فعل الكتابة فى حد ذاته شيء محبب الى قلبي
انا بحبني و انا بكتب
بغض النطر اذا كنت هانشر ما اكتبه او احتفظ به لنفسي

يكفينى فخرا انى بكتب و خلاص


تاني الطلاق ؟
!!!!!!!

ليه دايما معتقدين ان الطلاق واجعني أوي كدة

أه هو بيوجع
بس مش أوي
بالنسبالى انا على الاقل الطلاق مبيوجعش للدرجة اللي انتوا متخيلينها


لأنى لا اطلبه و أصر عليه
إلا لما ألاقي إن الإستمرار فى الحياة الزوجية هيكون بيوجع اكتر

أنا ساعتها بختار اخف الضررين


مبحبش الكراهية اللى ممكن تنتج بين الطرفين بسبب كثر الخلافات و الإختلافات

فبفضل انى ابعد و انا لسة جوايا شوية حب للطرف التاني

شوية حب يخلونى اقدر افتكرله الحلو و اقدر احترمه


اه بعترف انى وجعت من تزوجتهم
لكن هما برضه وجعوني


أصل مفيش علاقة انسانية بتخرج منها
و انت كسبان علطول الخط
او و انت خسران علطول الخط

انت بتخرج منها و انت واجع و موجوع

و بعدين انا اكتشفت ان
فيه اوجاع فى الحياة أشد ألمًا من الطلاق
أو من قصة حب لم تكتمل


دائما هناك وجع أكبر من اننا نحكي عنه او نبكي منه .. مش كدة ولا إيه ؟

:)


بس خلاص

نورتني النهاردة و مبسوطة من تعليقك

شكرا ليك
:)

Ramy said...

أخر الكلام

كل منا لديه ألم أكبر من أن يحكي عنه أو يبكي منه
فقط .. نحاول جاهدين بشتى الطرق أن نخفيه عن الناس و عن أنفسنا


Anonymous said...

مرة سألها : إيه سر الشعر المبلول ؟


إنتي قلعتي الحجاب أ نووووور

بـت خـيـخـة وأي كـلام said...

اللي منشرتش تعليقه



يحكى في الحب أن العناق حياة

:)

بـت خـيـخـة وأي كـلام said...

مها

صباح الخير

ربنا يكرمك على كلامك الجميل ده يا مها

و انا كمان و الله اتبسطت انى اتعرفت عليكي
:)

و محدش عارف مين اللي كان بيساعد مين

لو تعلمي الغيب
كنتي عرفتي ان الناس دول هما اللي كانوا بيساعدونا احنا من غير ما ياخدوا بالهم إننا نعدى محن كتير مرينا بيها

كفاية دعواتهم لينا

عارفة الأرض العطشانة المتشققة من كتر ما هى عايزة نقطة مية

اهو احنا كنا كدة
و دعوات الناس لينا كأنها المية اللي بتروي ارواحنا

يعنى هما اصحاب فضل علينا
:)
ربنا يبارك فيهم و يفرج همهم


و متزعليش اننا مقعدناش وقت اطول

المشوار أصله كان بعيد علينا
و احنا توهنا واحنا جايين لكم

فكنا مرهقين من السفر
و كنا عايزين نروح ننام

و وائل فعلا كان هينام مننا وهو سايق
لدرجة إن إحنا فكرنا نخليه يشرب حشيش علشان يفوق

بس المشكلة ان احنا مكنش معانا حشيش
:)))))))))))))


اشوفك تاني بإذن الله
سلامي لكل الناس اللي عندك

و شكرا ليكي
:)

بـت خـيـخـة وأي كـلام said...

اللي منشرتش تعليقه


إنت أهبل يا ابني ؟
!!!

اتلم بقى و اتقي ربنا فى مراتك اللي انت بتقول انك بتحبها
و بطل شغل الخولنة ده
و استرجل

جاتك القرف

بـت خـيـخـة وأي كـلام said...

أحمد


أنا سعيدة إنك سألتني السؤال ده





الكاتبة والإعلامية فاطمة العبيدي said...

رغم تحفظي على كثير من كتاباتك إلا أني أعترف اني لا اقاوم رغبتي في قراءة حروفك لأنها فعلا مميزة رغم تحفظي على بعضها لكنها أكثر من مميزة

وكان هذا البوست هو أقواها على الإطلاق
لا أدري إن كان هذا البوست يعبر عن واقع تعيشينه او انه مجرد خيال كاتبة محترفة ولا يهمني أكثر من أني أبدي شكري واعجابي بحروفك دوما

ولا يفوتني ان ابدي عتبي عليكي لأني شعرت كثيرا أنك تتجاهلين تعليقاتي او انها لا تروق لك

عموما اردت اليوم ان استسمحك في ان انشر هذا البوست في مجلة المليون صديق تحت اسمك طبعا

وهذا رابط المجلةان اردت الإطلاع عليه
http://journalmillionfriends.blogspot.com/

تحياتي

بـت خـيـخـة وأي كـلام said...

أبو ملك و مريم

الله يجبر بخاطرك

شكرا ليك
:)

____________________

ريري

لأن أنا كدة
:)


______________________

أحمد سعيد

شكرا ليك
:)
__________________

سوبيا


معلش

شكرا ليك

______________________

رامي

:)

شكرا ليك

_______________

الغير معرف

و إنت مالك
ماتخليك في حالك
_____________________


فاطمة العبيدي

اشكرك على كلماتك
و يشرفني ان حضرتك تكوني متابعة لكتاباتي


و انا لا اتجاهل تعليق أحد على وجه الخصوص

إذا لم ارد على تعليقات أحد فأنا لاارد على تعليقات الكل
و فقط اكتفي بانى اشكركم جميعكم

و أساسا أنا مش فاكرة انك شرفتيني بتعليقك عندى فى المدونة قبل كدة


بالنسبة ان حضرتك تنشري البوست فى مدونة اخرى

يكفي ان حضرتك احترمتي حقي
و استأذنتيني
اشكرك جدا على تصرفك ده
و البوست تحت امرك

شكرا ليكي
:)

أحمد said...

انا سعيد انك سعيدة..بس برضه ماجاوبتيش

بـت خـيـخـة وأي كـلام said...

أحمد

هههههههههههههههههه

ماهو أنا مش هجاوب

اصل لو جاوبت بالنفي أو التأكيد يبقى انا كدة بحدد للناس خيالاتهم

و أنا عايزة الناس تشغل مخيلاتها
مش عايزاهم يبقوا مقيدين بشيء
ولا افرض عليهم حاجة


و إنت على الأخص عايزاك
تطلق العنان لخيالك


شكرا ليك

الكاتبة والإعلامية فاطمة العبيدي said...

شكرا لموافقتك نشر الموضوع
يارب المجلة تعجبك وتقرري الانضمام ليها
تحياتي
رابط البوست
http://journalmillionfriends.blogspot.com/2013/06/blog-post_5948.html

بـت خـيـخـة وأي كـلام said...

فاطمة العبيدي


الشكر ليكي

:)

Anonymous said...

ممارسه فعل القرايه للى بتكتبيه محبب لقلبى
Hossam

بـت خـيـخـة وأي كـلام said...

حسام

:))

شكرا يا حسام

سامح شاهين said...

أولا بعد قراءة التعليقات أشعر بالحاجة للإعتذار عن نشر تدوينة أنا معاك على فيس بوك وتويتر دون إذن مسبق لذا أعتذر إليك

وهذا يقودونى إلى طلب أو سؤال

لماذا لا تضيفين خاصية المشاركة على فيس بوك وتويتر؟

أخيرا

فعلا كلنا نحاول الهرب من شئ ما!

تدوينة رائعة

بـت خـيـخـة وأي كـلام said...

سامح شاهين


الأمر لا يستحق الإعتذار

و أنا اللي بشكرك
لأني كنت عايزة أعرف مين اللي نشر التدوينة على تويتر و فيس بوك
علشان أشكره
لأنك ساهمت فى نشر كتاباتي على نطاق أوسع


شكرا ليك بجد
:)


انا معرفش إزاي اضيف خاصية المشاركة اللي إنت بتقول عليها دي

لما اعرف .. هابقى أضيفها بإذن الله

شكرا ليك مرة تانية

:)


سامح شاهين said...

لإضافة خاصية المشاركة على فيس بوك وتويتر فى كذا طريقة
الأولى

من لوحة التحكم للمدونة - اختارى تخطيط ثم اضغطى على إضافة أداة ستظهر نافذة فى الركن العلوى الأيسر ستجدى 3 اختيارات اختارى المزيد من الأدوات -انزلى بعدها بالبار لأسفل ستجدى Share it
- اضغطى عليها ثم بأسفل يوجد زر حفظ اضغطى عليه بعد ذلك اغلقى هذه النافذة - والقى نظرة على مكان أداة Share it

يمكنك تعديل موقعها بالضغط عليها بالماوس مع السحب ووضعها فى الجانب الأيسر والأيمن أو أسفل

هذه طريقة وهناك طرق أخرى باستخدام أكواد فى اللينك الآتى:-
http://alyomtop.blogspot.com/2012/09/blog-post_26.html

وبالمناسبة إذا أردت عدم قيام أحد بنسخ ما تكتبينه أقرأى هذه الموضوع

http://alyomtop.blogspot.com/2012/07/blog-post.html

بـت خـيـخـة وأي كـلام said...

سامح شاهين


شكرا ليك على الإفادة

:)

زهراء الفاطمية said...

(أصل عندى واوا بداريها)
perfect

users online