Sunday, September 01, 2013

إلــى نــوجــا .. عــن الــحــضــن





نوجا ..
أنا جعانة  .. أمان

و الحضن أمان



فيه حضن يبلعك  و يحميكي و يخفيكي عن كل العيون الناهشة

انا معرفهوش الحضن ده .. مجربتهوش

 بس عارفة إنه موجود



مش حضن الأم

 ولا حضن الصاحبة لصاحبتها

ولا حضن الإخوات



الأمان مزروع فى الراجل

فى صدره اللي بتدفسي وشك فيه

فى دراعاته اللي بيضمهم عليكي و بيحمي بيهم ضهرك

فى كفوفه اللي بتطبطب عليكي



حضن الأمان مالهوش علاقة بالسكس

هو أطهر من كدة بكتير

حضن خالي من الشوائب و الأغراض الأبيحة



يمكن بابا !! .. يمكن و الله



يمكن حضن الأب  بينفع

بس أنا مشكلتي انى محضنتش بابا كتير قبل ما يموت

فمعنديش ميراث من حضن  الأمان

 اللي يخليني اعرف اكمل حياتي من غير ما اطلبه





انا كمان مبعرفش اتحضن يا نوجا



شريف امبارح قرب مني علشان يحضني

انا بعدت بجسمي و سألته إيه فيه إيه ؟ .. عايز إيه ؟

قاللى عايز احضنك

 قلتله لأ بعدين

أنا احضنك ماشي .. لكن انت متحضنيش

سألني ليه ؟ .. قلتله معرفش يا شريف .. معرفش



و لو سألتي ماما عن تجاربها معايا فى انها تاخدني فى حضنها

هتسمعي منها كوارث





الحضن بيوترني يا نوجا  .. بيوجعني

لأني معرفش  امتى اللي حاضنّي هياخد  قرار بإنه يفك إيده من عليا

 و يسيبني اغرق فى الضياع من تاني 

فبحاول اكون أسرع منه فى اخد القرار

 بإن أنا اللي اطلع من محيط حضنه قبل ما هو يسيبني



الوجع ساعتها بيكون اقل و محتمل لأن انا اللى مقررة امتى افارق حضنه



و رغم انى مبعرفش اتحضن بس انا لسة مستنية الحضن ده

الحضن اللي  أول ما راسي تلمس صدره  .. هاستكين 

لانى هابقى واثقة ساعتها  إن صاحب الحضن ده

عمره ماهيفك  إيده من عليا

و يسيبني اغرق في الضياع من تاني





عياط بالهبل



________________



إنــتــهــى


8 comments:

Anonymous said...

وجعتي قلبي يا شيخة
ربنا يصلحلك حالك

sherif hussien said...

بوست جميل كالعاده
انتي تعرفي ان الحضن انواع
يعني الحضن الدافئ والحضن الخجول والحضن الحنون والحضن الملكي .....الخ
ومدام بقي انتي جبتي سيرة الحضن انا بقي مش عاوز حضن يحسسني بالامان
لو قريتي عن قصة الحضن المنقذ انا بقي محتاج الحضن المنقذ ده من الاخ او الصديق اللي يخلي الحياه تدب قي جسمك ويديلك قوه علشان تقدر تعافر مع الدنيا وتستحملها


وابقي سلميلي علي نوجا

الكاتبة والإعلامية فاطمة العبيدي said...

جميل يا نوران

تعرفي اني مرة قريت في بحث علمي ان حضن الراجل فعلا يسبب المان للمرأة زائد انه بقوي عضلة القلب عندها وهو ده سبب احتياج الست لحضن الراجل بشكل كبير فكل النساء تجتمع على هذا الاحتياج الذي ليس له علاقة فعلا بالجنس على عكس ما يعتقد بعض الرجال

تحياتي

بـت خـيـخـة وأي كـلام said...

شكرا ليكم كلكم على تواصلكم معايا

Sada Soot said...

شكرا لكي على كتابتك للكلمات اللي بحس بيها وما بقدرش اكتبها .. كأنكِ يوماً ما عاصرتي خيبات املي !

ابراهيم رزق said...

كنتى تسبيه يحضنك يا نوووووووووووووور

ده الحضن ده هو اللى فاضل للواحد

تحياتى

Amira Hassan said...

ديه اسمها عقد يا حبيبتي. احنا معقدييييين علشان اتقالنا كلام واحنا صغيرين غلط وصدقناه للأسف. فكي من الموروثات واذا كان كده ولا كده في وجع ان الحضن يسيبك، علي الأقل عيشي المغامرة.. يمكن الحضن يبقى.. يا رب يبقي.. آه والبوست جميل :)

Amany Gomaa said...

البوست جميل يانوران
بعيد اذنك يانوران ممكن اعبر عن اعجابي بتعليق شريف حسين

users online