Wednesday, January 23, 2013

مـعـقـوفـة مـسـتـقـيـمـة



تحممت
مشطت شعري المبلل
 عقصته كعكة 
 و وضعت به زهرة رمادية
اشبه تحية

تأملت جسدي العارى فى المرآه
رقصت قليلا  نظرا لوجع جسدي

زوجي يهاتفنى و يعلمنى بقرب وصوله للمنزل
اطلب منه ان ياتى فى وقت اخر
ربما بعد بضعة اسابيع اخرى
يستعجب و يسالني
 يعنى ايه اجى بعدين ؟
ارد عليه بهدوء
يعنى متجيش دلوقتي .. متجيش النهاردة خالص
تعالى بعدين  .. تعالى بعد كتير
نبرته تتحول الى غضب وصوته يعلو وهو يقول لي
هو انا مرافقك ؟؟ انتى مراتي يا بنت المجانين
انا بقولك نص ساعة واكون عندك
علشان لو عايزة حاجة اجيبهالك معايا
تقومى تقوليلى متجيش دلوقتي!!!
ارد عليه بصراخ عالى
واغلق فى وجه الخط

ادور حول نفسي دورة كاملة  وارقص مرة اخرى
 افتح خزانة ملابسي واخرج منها منامة بلون حشيش الارض
ارتديها  واخلعها  وارتديها واخلعها ثم ارتدىها

زوجى يهاتفني مرة اخرى
ارد عليه بنفاد صبر : نعم
هو : انا عند السوبر ماركت
عايزة حاجة غير البيبسي والشكولاتة ؟
انا اصرخ واقول له
 انت مبتفهمش
بقولك متجيش النهاردة
متجيييييييييييش
مش عايزة اشوفك ولا اشوف اى حد
يغلق فى وجهى الخط
و القى انا بهاتفي فى سلة القمامة
ادور مرة اخرى حول نفسي وانا فاتحة ذراعى على اخرهما
ادور دورات متتالية
اسقط على الارض

اسمع صوت المفتاح يدار فى الباب
يدخل زوجى و يجدنى ملقاة على الارض
يجري نحوى
يسألني : انتى كويسة؟
ارد عليه بقولي : انا مصليتش النهاردة اى حاجة
يرفعنى ويمسكنى
ويقول لى مش مهم .. دلوقتى نصلي سوا كل الفروض
يجلسنى على حافة الفراش
و  اقول له : بس انت صليت كل الفروض!
يمسح بيده على وجنتي وهو يقول
 مش مهم .. هاصلى معاكى تانى جماعة
يسالنى انتى ليه لابسة البيجاما دى ؟ انتى مبتحبهاش!!
ارد عليه بيأس : مش عارفة فين باقي البيجامات
يقول لي وهو يقوم نحو  وحدة الادراج ويشاور على احدهم
فى الدرج يا ماما.. فى الدرج
انتى بتحطى هدومك اللي بتحبيها فى الدرج
يفتح  أحد الادراج و يخرج منه منامة زرقاء بلون السماء
يساعدنى فى خلع  منامتى الحشائيشية
وعلى ارتداء منامتى السماوية
يسالنى انتى عاملة شعرك كدة ليه ؟
و ايه الوردة دى
اساله : مش بذمتك انا شبه تحية ؟
يبتسم و يقول لى انت احلى منها
انظر فى المرآه و اقول له : ده  انا شبهها جداااا
يقف خلفي و يربت على كتفي
يسألني  تحبي نصلي الاول ولا تاكلى شيكولاتة ؟
لا ده ولا ده
انا عايزاك تجيبلى الموبايل بتاعى من الزبالة وتغسله
يسالنى : وهو ايه اللى وقعه فى الزبالة
انا اجاوبه : انا رميته
هو بصبر : حاضر يا ماما هاجيبه
انا باصرار : انا مش هاصلي النهاردة
هو : لا حول ولاقوة الا بالله ..
 هو فيه حاجة اسمها كدة برضه يا نورا ؟
انا : اه فيه
هو : لا يا نورا مفيش
 يقترب  مني و يقبل جبينى
يغرينى بالصلاة بقوله :
هاقرالك سورة طه بعد ما نخلص صلاة
ابتسم واقول له  وبعد كدة هتمشي .. مش كدة ؟
يسالنى : انتى عايزانى امشي ؟
انا : اه .. عايزاك تمشي
هو : اروح فين طيب ؟ .. ده بيتنا  سوا
انا : روح فى اى حتة .. انا مش عايزاك موجود
هو : يا ماما انا جوزك
انا : ايه يعنى جوزى ... جوزى تقرفني و تقعد كابس على نفسي ؟
انا مش عايزة اكون زوجة الايام دى
هو بيأس : طيب نصلي سوا و همشي
انا : مش هاصلي النهاردة
زوجي يصفعني صفعة ترديني الأرض  .. و يرحل

**
سبحة
ام قِصة
ام قبلة
ماذا يا إمرأة .. ماذا ؟؟؟
أاااه يا رجل  .. أااااااااااااااااه
يا رجل  ساكت  .. طاهر .. هادئ  .. مؤمن
ارحل  أو ضاجع
ارحل أو ضاجع
ارحل أو ضاجع
ضاجع فيّ طهرك
او دعنى اضاجع فيك مجوني
يا امراة مجنونة ... احبك
يا رجل  افهم  .. افهمني
إإسرني بصورة
ما اطلب اكثر من صورة
ما عندى صورة يا امراة
تخسرني يا رجل ان لم تملك صورة
انا أحيا بصورة
 وأموت بصورة
و أبكى بصورة
يا امراة مجنونة .. احبك
يا رجل  افهم ..  افهمني
افرط حبات السبحة وازرعها في السرة
وسبح بحمد الله على بطني
قص عليّ حكاية
عن فيل اسود يقتل نملات صغيرات
قبلني اعلى النهد تحت الرقبة
اكتب اسمك على ظهري بالخمش
اخمشني واخدش هذا الجلد
يا امرأة مجنونة ... أحبك
يا رجل عاقل  ... ضاجع
ضاجع فيّ الكلمة
ضاجع فيّ اللحن
ازرع فى قلبي اوتار كمان
و اعزف  بنشاز
اعقص لي شعري كعكة و اقضمها
و اوصف لي طعم النعنع فيها
افصح لى عن سرك
عن يوم قتلت  فيه العمة
اهديني قنفد و تمساح
و استمتع معي بفن القتل
علمني كيف يكون الإدغام
و دعنى اعلمك كيف يكون الطعن
أاااااه يا إمرأة مجنونة .. احبك
أاااااااااااااااه يا رجل  عاقل .. ارحل
**
زوجي كان غادر
كان يشحذ السكين و منيتى في يده
كان قاتل .. مثل قاطع الطريق
اغمد نصله في القلب على غرة
كانت معركة غير متكافئة
لا صديق ينجدنى
و لا أخ يساعدني
ولا اب يدافع عني
لا شيء سوى الخوف
و زوج سفاح
و خنجر في القلب
**
قصصت شعري
و قتلت نفسا بغير حق
________

إنــتــهــى

Saturday, January 19, 2013

خـــيـــخـــيـــات ... مـــتـــقـــاطـــعـــة




و رغم اني مكونتش بسمع الكلام
وكنت  زوجة بتطلع تربنتين اللي بتتجوزهم
الا اني بحب الزوجة اللي بتسمع كلام جوزها
و بنشكح اوي لما اشوف  زوجة  مطيعة  لزوجها
**
مبحبش الست اللى بتلبس حشمة فى بيتها
**
الطلاق  مش كل واحدة تقدر تتحمل تبعاته
فلو مش اد الطلاق  متطلبهوش و لا تصري عليه
و اللى اقدر استحمله انا
 مش بالضرورة انتي تقدرى تستحمليه
انا نورا .. لكن انتى حد تاني غيري
**
التالتة ليست بالضرورة ان تكون تابتة
**
هو : جوزك التاني كان مين ؟ .. اسمه ايه ؟
انا : وانت مال اهلك
**
نفسي اعرف مين اللي هيموت يوم 26 يناير
وش واحدة مترقبة وحزينة
**
خـُـلقت كي اعيش وحيدة
**
و الجميل في الموضوع ان يوم 25 يناير هيوافق يوم جمعة
**
و قال لي : انتي مش باقية على حد
 و مبتقربيش من حد ولا بتطلبي ود حد
**
مين هنا من
 بيت دجن / هامركاز/ فلسطين المحتلة ؟
**
فيه على الارض قشرة فول سوداني
بقالها بتاع تلات ايام
وانا مكسلة اشيلها
وشكلها منرفزني
لو كان شريف موجود كنت خليته يشيلها
**
و اصعب من فراق شريف
هو انى مبلاقيش حد ابعته يرمى الزبالة
 و يجيبلي بيبسي وشكولاتة
انا حقا مفتقدة شريف
بس سيبكم انتوا ... القاعدة لوحدي بالدنيا ومافيها
نيهاهاهاهاهاهاهاهاهاهاهاهاهاهاهاهاهاع
**
انا بحب طنط فاطمة
**
و من احلامي ان  كان نفسي اشتغل فى مصنع شكولاتة
و اكون انا مكان البتاع اللى بيصبوا فيه الشكولاتة وهى سايحة
**
انا مبطيقش الخولات
**
مين اللي هندفنه  يوم 26 يناير ؟ .. ميييييييييييين ؟؟؟؟؟؟
**
هو : انا عارف ان انتى كنتِ على علاقة بفلان
انا : ده كان جوزي يا روح أمك
**
لو حد فيكم يعرف حد محتاج كرسي بعجل .. يا ريت يبلغني
**
عايزة اشتغل نجارة او عاملة بناء
**
و كان من احلامي انى اسوق جرار
**
مبقتش احب اشرب الشاي بالفانيليا ولا بقيت بحب ريحته
**
عارفاكوا  .. بتحبوا الحاجات دي .. يا خلابيص
**
الجواز نصيب ... و الطلاق قرار 
**
هو انا بس اللى بصحى من النوم
 الاقينى بفردة شراب واحدة ولا ده بيحصلكم انتوا كمان ؟
**
بكتشف تعاوير في جسمي مجهولة المصدر
**
اه والله باتكسف
**
حلوة الاغنية اللي انا بسمعها دي
**
و بغض النظر عن معناهم
إلا إني بحب كلمة زنديق و زنديقة ... بحس ان فيهم موسيقى
**
عايزة اتكلم عن ابني اللي مخلفتهوش
**
انا بحب بديعة مصابني
**
فيه حاجات كتير مكتبتهاش
و فيه حاجات اكتر كتبتها و منشرتهاش
**
مبحبش الشراشيب اللي في الايشاربات
 ولا اللى فى الستاير ولا اللي فى السجاجيد
انا مبحبش الشراشيب خالص في أي حاجة
**
ندى هتتجوز
انا لسة فاكرة يوم ماتولدت
العيال كبرت يا جدعان
**
يوم 15 يناير كملت 35 سنة
يعني فاضل 10 سنين واقدر اروح احج من غير محرم
**
كل اللي بيقولى يا انسة .. هايروح الجنة حدف
**
انا بحب خالد صاحب شريف
كان فاكرنى اخت شريف
المجد .. كل المجد .. للعمر اللي مش باين على الواحد
**
في يوم من الأيام شريف كان بيحكي لهاني
على ان خالد صاحبه قال : مامتك طيبة اوى يا شريف
ولما هانى سأل شريف : وهى ماما طيبة ؟
شريف قاله من غير تفكير : لأ
هاني ضحك وقاله :
 لا يا شريف ..  ماما طيبة بس هي زربونة شوية
شريف قاله  : ماما زربونة على طول يا بابا
اسالنى انا .. انا عايش معاها وعارفها اكتر من حضرتك
**
فكروني ابقى احكيلكم عن موقف النملة
**
مفيش نصيب
***
أخر الكلام


انا كل قلب دخلت جواه اتحرق
_______


إنــتــهــى

users online