Sunday, January 10, 2016

حـــكـــايـــات مـــنـــامـــة الـــســـيـــدة مـــيـــم





قـِلاع صغيرة ومنازل دافئة وأبراج كنائس
لهذا  ابتعت منامتي الجديدة
هناك أشياء لا أعرف اننى احبها حتى أراها
**
كانت القطعة العلوية من المنامة مرسوم عليها تلك الاشياء..
 فوقعت من فوري فى حبها
طلبت منامة قياسي
فاخبرتني البائعة بأن قياسي غير متوفر
اعتقدت اننى كبيرة الحجم حتى لا يتوفر القياس الذي يلائمني
ولكن البائعة اخبرتني أن اصغر قياس متوفر يلائمها هي
أربكتني حينما أشارت إلى جسدها
جعلني هذا ادقق فيها بنحو مقتنعة أنا انه لا يليق
ولكن الظرف جعلنى أتامل جسدها ثواني
ففهمت ان اصغر قياس متوفر .. قد يلائمني
اذا زاد وزني خمسين كيلو جرام مثلا
ارتبكت .. فقلت لها  بخيبة أمل :  أه .. طيب خلاص
و هممت بالخروج من المحل
ولكن القـِلاع و المنازل الدافئة وأبراج الكنائس كانت تناديني
فتسمرت فى مكاني والتفت الى البائعة و قلت لها
ادينى اصغر مقاس عندك
تعجبت البائعة وقالت : هتبقى واسعة عليكي جدا .. صدقينى
فقلت لها : مش مهم .. عايزاها برضه
رفعت حاجبيها بتعجب من اصراري  و قالت لى : انتى حرة
**
التحمم جزء اصيل من عاداتي لإرتداء منامة جديدة
أنا أحب المنامات جدا .. كــ حبي للجوارب الملونة
و أحتفل بشراء منامة جديدة بأن أتحمم قبل ارتدائها
كأنى عروس تستعد لزفافها فتتحمم قبل ارتدائها لفستان الزفاف
تحممت .. وعطرت جسدي باللافندر
ارتديت المنامة .. السروال والقطعة العلوية
ولكن بعد ثانيتين  ابقيت فقط  على القطعة العلوية من المنامة
فلم يعلق بي السروال نظرا لعدم ملائمة قياسه لجسدي
 و سقط من فوره  ورفض التمسك بمؤخرتي و بطني
فتخليت عنه  و تحررت منه
و استمتعت بغرقي في القطعة العلوية
تأملت المرسوم
واكتشفت أن هناك ايضا منارات و مراكب
المنامة لم تكن منامة عادية ..
 كانت قطعة فنية  تستحق ان تؤطر بإطار خشبي
وتعلق على جدار ما  فى معرض فني .. ولا تباع
تكن للعرض فقط
فــ ما على شاكلتها .. لا يقدر بثمن
**
المنارات
تذكرني المنارات المرسومة بـــ بيت منارة
Fastnet Rock
 الذي سكنت فيه  لعدة اسابيع
حينما سافرت _او بمعنى ادق هربت_ الى ايرلندا
 هربا من زوجا احتقره
كنت وحيدة مرتعبة من الغربة
 اجر ورائى طفلي الصغير  
لم اكن املك المال الكافي لاستئجار منزل آدمي
فدلني السائق الذي اقلنى من المطار .. الى بيت المنارة
الذي يؤجره صديقه حارس المنارة بشكل غير شرعي
 نظير مبلغ بسيط من المال
وافقت .. بل رحبت بالفكرة جدا
فانا اعشق المنارات
و في حياة اخرى اخترت لنفسي اسم  " منار"  لهذا السبب
ولم اكن اتخيل يوما ما ان اسكن فى بيت منارة
فوافقت على الفور  ..
وحين جاء موعد دفع اجرة السائق
 اجزلت له  العطاء _  رغم قلة ما لدي من نقود _ كــ مكافأة له على اقتراحه

في المنارة
الصباح هناك كان  جميل منعش مطمئن
ولكن فى الليل كان الامر مرعب .. انا وسط البحر حرفيا
والبحر بسبب عوامل الطقس يهيج و يميج اثناء الليل بشكل مرعب
فكان طبيعى ان تصطدم الامواج العالية فى  الصخور المحيطة بالمنارة
ونتيجة الاصطدام اجد امام نافذتى اثار الامواج
كان المشهد ساحر مثير بشكل مرعب حقا
ورغم حبي للمكان و روعة المنظر البانورامي
إلا اني اصبت بالإكتئاب الحاد بعد عدة اسابيع
و اصررت على الانتقال لمنزل اخر
**
مممممم ..  لا أحب حديث الذكريات هذا
احب أن احتفظ  لنفسي بالمأسِ الكبرى
لا احب ان اشاركها مع احد
**
أقف أمام المرآة و أنظر لنفسي وانا غارقة فى المنامة
القطعة العلوية طولها يصل الى ركبتي الا قليلا
و كأني ارتدى ثوبا قصيرا
ادور حول نفسي ضاحكة
افعل بعض حركات رقصة التانجو
احتضن نفسي
اتامل المنامة
القـِلاع تحديدا
أتذكر تلك القلعة  التي  استاجرها زوجي
واقمت فيها حفل زفافي ومكثت بها اسبوع معه
كانت في بريطانيا  ..  في مدينة ويلت شاير تحديدا
 لا اتذكر اسم القلعة  ..
ولكنى اتذكر ارضياتها الخشبية المصنوعة من اشجار البلوط
وممراتها  الحجرية
و اتذكر غرفة المكتبة تحديدا
فأنا مارست الحب مع زوجى فى كل غرف القلعة .. الا تلك الغرفة
رفضت تماما اصرار زوجى  ان اتعرى امام الكتب
الكتب كانت ولازالت  بالنسبة لى شيء مقدس
لا يجب اهانة الكتب  بممارسة اى فعل شهواني امامها
الكتاب حتى ولو كان محتواه ماجن .. يبقى انه كتاب
اتذكر ان زوجى سخر منى ذات يوم  متعجبا
حينما راى ملامح الغيرة تعلو وجهي
حينما سمعت من صديقة مشتركة لنا  انها قرات كتاب انا لم اقراه
قال لي : غريب انك مغرتيش من الدهب والالماظ اللي كانت لابساهم
وغيرتي من مجرد كتاب قرأته هي وانتى مقريتهوش
نظرت له  كأني أراه للمرة الاولى
وتعجبت من نفسي كيف لى ان اتزوج رجل بهذه الضآلة الفكرية !!
لم يفهم زوجي يوما ما عقلي .. وانا لم اشرح له نفسي
فقط اكتفيت بطلب الطلاق منه تلك الليلة
وحينما رفض .. و بدأ يمارس علي العنف بكل اشكاله
 هربت منه  الى ايرلندا ... الى بيت المنارة
**
مممممممم .. مرة اخرى اعود لحديث الذكريات
لا فائدة مني .. لا اتوقف عن الثرثرة و الحكي
سأعد لي فنجان من القهوة ..
لعل وعسى أنشغل بشيء اخر غير الحكي
احضر الكنكة واضع بها البن و حبات السكر
اقوم بتقليب محتويات كنكة القهوة
أتامل المرسوم على ذراع المنامة
المركب تحديدا
**
اتذكر هذا اليوم البعيد
 كنا اخي وانا  صغارا  مع والدى رحمه الله بصحبة صديق لوالدي
كنا فى رحلة مائية على ظهر مركب صغير في بحيرة صغيرة
وكان والدي يجلس عند حافة المركب
و لسبب ما تحرك من مكانه وعند استناده على حافة المركب
 استند  بدلا منها على الهواء
فسقط جسده فى الماء
صرخت انا واخى  خوفا على والدى
و نزل اخى من المركب للعثور على والدى
وبعد عدة دقائق صغيرة ظهر والدى 
وقال لاخى متعصبا :   يا بنى ابقى حاسب انت كنت دايس عليا جوة المية
اضحك الان ملئ  قلبي و اترحم على والدي
كان الموقف  هذا يندرج تحت بند المواقف المأساوية ساعة حدوثها
و لكنه يتحول الى ذكرى ضاحكة بعد مرور عليها بعضا من الوقت

لا يوجد لدى الكثير من الذكريات مع المراكب
ولكنى احب المراكب حبا غير مفهوم
لذا فى حياة اخرى كنت زوجة لصياد
 يمتلك مركب  صيد صغير لونه ازرق
 مكتوب عليه
"  يا مفتح الابواب افتح لنا باب رزق "
**
عودة للمنامة

اخلع عني المنامة المليئة بالحكايات
فهي مثيرة للذكريات الشاجنة
ارتبها بعناية و اخبئها فى درج لا افتحه ابدا
ارتدى اخرى طفولية مبهجة قياسها ملائم لجسدي
مرسوم عليها بالونات و رجل الثلج
اتقوقع على الاريكة و اشاهد التلفاز
اجده يعرض فيلم الوهم
كان هذا الفيلم ولازال فيلم رعب بالنسبة لى
ولكنه يندرج عندي  تحت بند  " جبنة رومي "
اخاف منه ولكنى احب مشاهدته
**
انام
 فاحلم بأن من كان زوجي يلقيني  في البحر من منارة عالية
واكون قاب قوسين او ادنى من الموت غرقا
حتى اجد مركب صغير يقترب مني  ازرق اللون
مكتوب عليه "  يا مفتح الابواب  افتح لنا باب رزق "
و يمد لى قبطان المركب يده لينتشلني من البحر الهائج
فاعطي له  يدي .. لأجده أبي رحمه الله
___________________

إنـــتـــهـــى

16 comments:

Anonymous said...

يااااااااااة يا بنتى اخيرا

جميله اوى يانوران ورحم الله والدك وكل موتى المسلمين انا حاسه اوى ان بابكى كان رجل طيب جدا وبيحبك

غمر الله قلبك بالسعادة

Anonymous said...

مش عارفه ان السيدة ميم انتى يعنى القصه فيها حكايه تخصك او واحدة تانيه بس فى كل الحالتين رحم الله كل اب حنون على اولادة ورحم الله والدك

P A S H A said...

مذهلة يا خيخة والله .. جميلة ورايقة وشجية .. عجبتني بجد .. وموحية جداً .. يا سلام عليكي لما بتكتبي بمزاج؛ كأني شربت فنجان قهوة في وقته.
:)
شكراً جزيلاً ع الإصطباحة الحلوة دي، نهارك فل بإذن الرحمن

ابو ملك و مريم said...

انتى ملبوسة يا نورا ....... مش طبيعية ابداً
:D :D :D :D :D

Anonymous said...

ازاى يا نوران ابقى مثقفه ذيك يعنى اعمل ايه واقرء ايه مع انى بقيت مبحبش القراءة؟

بـت خـيـخـة وأي كـلام said...

الغير معرفة

بابا الله يرحمه مكنش طيب على اد ما كان مهيب .. كان له هيبة مرعبة كدة
:)
بس كان أب جدع و بيعرف و بيقدر يتحمل مسؤلياته ناحية اولاده
الله يرحمه يارب و يغفرله


شكرا ليكي
______________________________

الغير معرفة

السيدة ميم جزء مني و ليست أنا بالكامل .. او انا جزء منها
من يدرى ؟
!!
:)


شكرا ليكي
____________________________


P A S H A

شريف
انا بفرح حقيقي بتعليقاتك
لانك مش مجامل
و بتعلق بس على الحاجة اللي بتعجبك
:)

الف شكر ليك يا شريف
و عجبتنى لفظة " شجية " اللي وردت فى تعليقك
:)

____________________________

أبو ملك و مريم


منذر لما قرا تعليقك
قال لي و هو بيضحك : فضحتينا .. الناس عرفت انك مش طبيعية و ملبوسة

قلتله صاحب التعليق يبقى احمد صاحبنا اللي انت كلمته قبل كدة

فراح قال لي : انا قلت برضه مش ممكن التعليق يكون لحد غريب
:))))


وده يعتبر اعتراف منه ان المقربين منى بس عارفين انى مش طبيعية
:)))))))))))))))))


شكرا يا أحمد
:)

____________________________________

الغير معرفة

مثقفة زيي
!!!!!!!!!

بس أنا مش مثقفة
:(

شيء جيد ان الانسان يترك عند الاخرين انطباع جيد

بس انا حقيقي بتخض و بترعب من انى اترك عند الاخرين انطباع جيد غير حقيقي

انا مش مثقفة .. و معرفش ازاى وصلك الانطباع ده عني
!!!

انا مبزعلش ان حد ياخد عنى انطباع سيء حتى ولو كان غير حقيقي

لكن حقيقي بتخض و بترعب من ان حد يعتقد فيا شيء كويس .. و الشيء الكويس ده ميكونش حقيقي

يعنى مثلا مبحبش البس عدسات لاصقة ملونة
اخاف ان حد يعجب بشكلى و يقول الله امورة اوى و عنيها حلوة . و ده ميكونش صحيح

مش هافرح ان حد اعجب بيا على خداع

مش هافرح ان حد عجبته عيونى الملونة و هى فى الحقيقة عدسات و مهياشس عيونى الحقيقية

مش هازعل لو حد شايف ان شكلى وحش مثلا
لان الجمال ده نسبي

لكن هافرح لو حد شافنى امورة وانا حقيقية .. بدون اى رتوش او تجميل او مساحيق او تغيير فى خلقة الله
:)

فبالتالى لما تاخدى عنى انطباع انى مثقفة وده مش حقيقي فده شيء يرعبنى
و يخلنى اراجع نفسي
ايه اللى انا بعمله فيه ادعاء يخلى حد يعتقد فيا انى مثقفة ؟
!!!

الثقافة مش تهمة بنفيها
بالعكس دى مسؤلية اتمناها
بس انا حقيقي مش مثقفة

التعريف البسيط للمثقف هو من يعرف شيء عن كل شيء

وانا فيه حاجات كتيييييييييييييييير جداااااااااااااااااااااا
معرفش عنها اي حاجة
وتور الله في برسيمه فعلا فيها

اغلب قراءاتي ادبية
تليها علم النفس و علوم الجريمة
و بعد كدة الدين
و باقي المجالات بقرا فيهم بالصدفة او اكون بادور على معلومة معينة في مجال معين

واللي بيقرا روايات بس عمره ما يكون مثقف يا حبيبتي

و اللي بيقرا فى مجال واحد بس عمره ما يبقى مثقف برضه

اه بقرا كتير
لانى بعشق القراءة
ولكن قراءتى الكتير دي محدودة فى مجالات قليلة
فبالتالى لا يطلق عليا مثقفة اطلاقا


ومفيش حاجة اسمها مبقتش بحب القراءة
لو مبتحبيش القراءة يبقى انتى عمرك ما حبتيها
اصل اللي يحب القراءة بجد ميعرفش يبطلها ابدا
ممكن يتوقف عنها شوية لكن لازم هيرجعلها تاني
دى عشق كدة مالهوش مثيل
:)

و علشان تبقى مثقفة مش لازم القراءة بس

انك تحاولي تلاحظي كل شيء حواليكي ده هيزود ثقافتك

انا ساعات بعرف معلومة من برنامج للاطفال
طب اقولك على حاجة و متضحكيش عليا
انا مكونتش حافظة الشهور الهجرية خالص
ولا عارفة ترتيبها
عارفة عرفت ترتيبها ازاى ؟
من برنامج اطفال
كنت مشغلة البرنامج ده لشريف وهو صغير عنده حوالى سنتين او تلاتة ساعتها
و لقيت المذيع بيحفظ الاطفال الشهور الهجرية
فحفظتها من طريقة المذيع
:))))
يعنى كنت شاحطة كدة وكبيرة و ام و مكونتش اعرف ترتيب الشهور الهجرية غير من برنامج اطفال شوفته بالصدفة

انك تلاحظى الحياة اللى حواليكي ده هيعلمك حاجات كتير

مش مهم تكوني مثقفة على درجة عالية من الثقافة
المهم انك تكونى على درجة من الثقافة و الوعى اللى متكونيش بيهم انسانة ساذجة يضحك عليكي
ولو كنتي ام يبقى المهم تكونى على درجة من الوعى و الثقافة و النضج تكونى بيهم ام مصحصحة لعيالها
و قادرة تتحمل مسؤلية تربيتهم و رعايتهم

بس كدة
:)


شكرا ليكي
شكرا على انطباعك الجيد عني رغم انه مش حقيقي

:)

Anonymous said...

كنتى وحشانى
حبيت التدوينه دى و الحكايات الصغيره و المشاعر الكتيره اللى فيها انتى عارفه يا نورا انتى عامله شبهه القناص اللى بيعرف الضربه هتعمل ايه جوا حتى لو الجرح مش ظاهرى كلامك بيعرف يلمس جوانا اوى
حبيت الرسومات أوى اللى على البيجامه و انا عارفه كويس
أحساس هوس أقتناء حاجه شبهك و فرحت انك اشترتيها لما قرأت السطور الاول
متقفليش المدونه تانى بقا
آسيا

بـت خـيـخـة وأي كـلام said...

لصاحبة التعليق الغير منشور

وافقي على الشغل و جربي معايشتك للمواصلات
هتخافي اول يومين و هترتبكي وهتوهي و هتسألي ناس .. مش مهم .. .. بس هتتعلمي حاجة

اولا هتثقي فى نفسك اكتر
ثانيا هتعرفي تتعاملى مع الحياة بشكل فيه قوة اكثر
مش هتبقي خيبة زى ما بتقولي

لو مرتحتيش من الشغل و المواصلات ... ابقي سيبي الشغل

بس لازم تجربي الاول علشان يبقى عرفتي المميزات و العيوب
متخديش قرار بالرفض من غير ما تجربي الحياة هيبقى شكلها عامل ازاى

ولو مرتحتيش متستعجليش بانك تمشي من الشغل.. لو كانت المشكلة مشكلة مواصلات فقط يعنى
ابقى ادى لنفسك فرصة 3 شهور كدة ولا حاجة قبل ما تاخدى قرار بترك الشغل او الاستمرار فيه

وربنا يكتبلك كل الخير يارب و يوفقك
ومن راي لو فعلا المشكلة مشكلة مواصلات ارجوكى استحملى شوية
حلو جدا و شيء رائع ان الست يكون لها دخل مادى خاص بيها

فـــ من يملك قوت يومه يملك قراره

صدقينى انك تتحملى مسؤلياتك المادية بنفسك ده ميخليش حد يتحكم فيكي

فوافقي على الشغل و جربي و حاولى انك تستمرى فيه
:)

ربنا معاكي

بـت خـيـخـة وأي كـلام said...

آسيا

منوراني دايما
بتوحشني تعليقاتك
:)

شكرا ليكي

بـت خـيـخـة وأي كـلام said...

يعني ايه يا حبيبتي تتوهي و متعرفيش ترجعي ؟
!!!!

انتي مش صغنونة .. يعنى بتعرفي تقري و تكتبي وكدة و هتعرفي تقري اسامي الشوارع اللي انتى فيها

اصل اسهل حاجة لو تهتى انك تركبي تاكسي و ترجعي بيه لحد بيتك
او تركبي تاكسي و تقوليلى نازلة المنطقة الفلانية اللى هى مكان شغلك يعنى
لكن تتوهى ومتعرفيش ترجعى دى غريبة
!!!


انا لو تهت بسال اى حد فى الشارع عن المكان اللى عايزة اروحه

اركبي المترو وانزلى اقرب محطة مترو لشغلك
ولما ترجعى انزلى اقرب محطة مترو لبيتك

وهكذا


ولو مش عايزة الشغل ده بعد كدة.. ادينى انا الشغلانة دى وخلى قريبك يوصي عليا انا
:)))))))))))))))))))))))))

هو حد لاقي شغل يا بنتى


ارجوكى تغلبي على خوفك شوية
متضيعيش الفرصة لمجرد وساوس فى دماغك
انشفي كدة اومال
عايزة الناس يقولوا عليكي ايه ؟!! .. خيخة
!!!

:))))

اجمدي .. وربنا معاكى

Anonymous said...

بحد يا نوران مشوفتش حد فى طيبتك وكأنك طفله كبيرة وانتى بتردى على مشكلتى وانا مش بجامل ولكن ديه الحقيقه انت قلبك قلب طفله اة الطيبه فى الزمن دة بيعتبروها سذاجه ومحدش بيحبها بس انا شايفاها فيكى قوة ونضوج ويارب ذى ما بتحبى الناس يحبب فيكى خلقه ويسترها معاكى ويرزقك بكل خير ويمنع عنك وعن احبابك كل شر

Anonymous said...

ربنا يطمنا عليكى

بـت خـيـخـة وأي كـلام said...

الغير معرفة

الله :) .. تعليقك حلو .. شكرا ليكي
:)

MaNoO said...

نوران :) انا مبسوط بالبوست أصلا مدخلتش المدونات بقالى كتير الله يهدها السوشيال ميديا وجيت هنا اشوفك عامله ايه يارب دايما مبسوطه وبخير مبسوط انى بقرألك أصلا :)

بـت خـيـخـة وأي كـلام said...

MaNoo

إزيك يا جدع
:)

وأنا مبسوطة أكتر بتعليقك
ليك وحشة والله
:))

شكرا ليك


_________________________

الغير معرفة اللي منشرتش تعليقها

ياحبيبتي أنا ماجاش في بالي أي ظن سيء بيكي خالص !! .. أنا اساسا مستغربة ان انتى اللي اعتقدتى فيا ان ممكن اخد عنك انطباع ان وشك وحش أو الكلام الغريب ده
!!!!

و بالنسبة للشغل إنتى متكلميش حد خالص
و الراجل لو لسة فرصة الشغل موجودة اكيد هيكلمك علشان يعرف رأيك
لو مكلمكيش خلاص

ونصيبك في أي شيء هيجيلك لحد عندك بدون حول منك ولا قوة
:)

ربنا يرزقك كل الخير يارب
:))

شكرا ليكي

احمد أبو العلا said...

جميل النص وسعيد لمواظبتك على الكتابة الصادقة والبسيطة
كل سنة وانت طيبة

users online