Saturday, March 04, 2017

تنويه هام لمحبي التبرع بالدم





صباح الخير يا جماعة
امبارح  زي ما انتوا عارفين كان التبرع بالدم
انا رحت طبعا  
واللي جم التبرع امبارح  اتنين اصدقاء
 واتبرعوا قبل كدة كتير
المهم
ان امبارح اتفاجائنا بنظام جديد متبع
  في المصل واللقاح بشأن التبرع بالدم
وقوانين جديدة 
احنا مواعيدنا كانت اول جمعة من  الشهور الاتية
اول جمعة في مارس
اول جمعة في يوليو
اول جمعة في نوفمبر


انا كنت اتبرعت يوم 4 نوفمبر
فلما المسؤلين هناك شافوا تاريخ اخر تبرع عندهم على السيستم 
لقيتهم بيقلولى حضرتك مش هينفع تتبرعي ؟
ليه يا جماعة مش هينفع اتبرع ؟
اصل لسة معداش اربع شهور
فانا قلتلهم لأ عدى اربع شهور
انا اتبرعت فى اول جمعة من نوفمبر
 والنهاردة اول جمعة من مارس 
 فكدة على حسبتي عدى اربع شهور
لأ يا فندم  حضرتك اتبرعتي 4 نوفمبر 
و النهاردة 3 مارس .. حضرتك تيجي بكرة 
انا طبعا فى عقل بالى .. أحا
 مش جاية بكرة طبعا المشوار ده تاني 
ومش هتيجي على يوم يعنى 
وفهمتهم ان احنا بقالنا سنين بنيجي فى مواعيد محددة 
وطلبت منهم انه يتصلوا بأي مسؤول
يقدر ياخد بدالهم قرار التغاضي عن اليوم الفرق ده لانى مش جاية بكرة
وفي هذه الاثناء .. لما واحد منهم راح يتصل معرفش بمين 
الممرضة عملتلى قياس نسبة الهيمجلوبين
وطلع والحمد لله 12.2 .. هو التبرع بالدم المفروض من 12 درجة
فده  كدة حاجة عظيمة جدا بالنسبالي
ولسة جاية اقول هيييييييييييييييييه
علشان فيه امل انى اتبرع 
في حالة لو قدروا يتغاضوا عن موضوع اليوم الفرق ده
ولان اللي يعرفني كويس 
يعرف ان انا صعب اوصل للنسبة دي بسهولة يعنى 
وباخد شهور طويلة علشان اظبط نسبة الهيمجلوبين
فكنت فرحانة جدا ان نسبة هيمجلوبيني
 عدت الحد الادنى المتعارف عليه
فلقيت الممرضة  بتقول لي
 هو حتى لو جه وقال ان عادي تتبرعي النهاردة 
ويتغاضوا عن اليوم الفرق ده
حضرتك برضه مش هينفع تتبرعي لان النسبة قليلة 
 فانا قلتلها لا مش قليلة 
دي ازيد من الحد الادنى للتبرع بدرجتين من عشرة
فقالتلي  لا ماهو النظام الجديد  بيقول
 ان الستات ميقلوش عن  12.5 درجة
 والرجالة ميقلوش عن 13.5  درجة 
طبعا انا اتوترت جدا وبدات اتنرفز شوية من القوانين دى
والراجل اللى راح يتصل بمسؤول 
جه  ودخل عل السيستم تاني وقال
لا حضرتك كمان المفروض تيجي تتبرعي 5 مارس مش 4 مارس
قلتله مش فارق معايا 4 مارس من 5 مارس
انا في الحالتين مش هاجي في الايام دى
انا باجى يوم جمعة من اول شهور محدة بقالها سنين
فانا مش هينفع معايا اجى بكرة و بعده
وبعدين ايه موضوع انكم متقبلوش تبرع بالدم  الا عند 12.5 درجة ؟
 ماهو طول عمر التبرع معروف بيبقى عند 12 بس .. ايه اللي حصل

كل اللى طلعت منه ان ده نظام جديد عملاها وزارة الصحة
علشان هما شايفين ان نسبة الهيمجلوبين 
 اللي اقل ن 12.5 مبتفيدش المرضى اللي محتاجين نقل دم
وبناءا عليه هما رفعوا النسبة من 12  الى 12.5 بالنسبة للسيدات
ومن 13  الى 13.5 بالنسبة للرجالة  
وموضوع التواريخ ده برضه عملاه وزارة الصحة
ومينفعش التغاضي عنها

طبعا اصدقائي الاتنين اللي جم
ولانهم رجالة وعدى على اخر تبرع ليهم اكتر من تلات شهور
 فكان عادى انهم يتبرعوا
طالما نسبة هيمجلوبينهم كويسة
فهما اتبرعوا
وانا رجعت مكسورة الخاطر  ومتبرعتش

المهم على الاساس ده
انا قررت ان يكون التبرع بالدم
يكون كل 6 شهور
يعنى مرتين فى السنة
علشان يبقى مواعيد محددة
وعلشان اضمن انى لما اروح
 يبقى فعلا عدى اربع شهور وزيادة على تاريخ اخر تبرع
وميجوش يقولولي لا ده فاضل يوم ولا يومين 

فبالتالي مواعيد التبرع بالدم الجديدة
هتبقى اول جمعة من شهر ابريل
واول جمعة من شهر اكتوبر
يعني هيبقى مرتين في السنة بينهم 6 شهور تقريبا

ان شاء الله انا هاروح اول جمعة فى ابريل الجاي  
الاصدقاء اللي جم امبارح واتبرعوا
ميجوش طبعا في شهر ابريل
ويبقوا يجوا معايا شهر اكتوبر الجاى باذن الله

واللي مجاش امبارح لاى ظرف
وكان نفسه يجي
اهو بقى فيه فرصه انه يجي فى شهر ابريل


اسفة على الاطالة
بس حبيت افهمكم الوضع
علشان تبقوا عارفين النظام الجديد

اللي مهتمين بالتبرع بالدم
ياريت بقى تتغذوا كويس جداااااااااا
علشان كمان  الحد الادنى للتبرع اترفع نص درجة
ونص درجة دى مش هينة
ومش سهلة
وبتاخد وقت كتير علشان تترفع
النص درجة دى جواها خمس درجات من عشرة
 يعني مهياش بسيطة ابدا

ادعولى بقى ان خلال الشهر ده تكون نسبة هيمجلوبينى
 اترفعت التلات درجات من10 اللي ناقصين دول 
علشان اقدر اتبرع الشهر الجاي

بس كدة
شكرا ليكم كلكم

وشكرخاص لأصدقائي محمد وعمرو
 اللي شرفوني امبارح بالحضور واتبرعوا بالدم
جزاكم الله خيرا يا رجالة
:)
_____________

إنـــــتــــــهـــــى


6 comments:

بـت خـيـخـة وأي كـلام said...

بالنسبة للرجالة لازم يكون عدى على تاريخ اخر تبرع تلات شهور بالتمام والكمال
وبالنسبة للسيدات لازم يكون عدى على تاريخ اخر تبرع اربع شهور بالتمام والكمال

ولان اصحابي اللي جم امبارح رجالة وعدى على تاريخ اخر تبرع ليهم اكتر من تلات شهور
فكان عادى انهم يتبرعوا
المشكلة كانت عندى انا
وبالنسبة للنظام الجديد الصارم بتاع وزارة الصحة
انا لسة معداش على تاريخ اخر تبرع الاربع شهور بالتمام والكمال
وناقص لسة يومين

قبل كدة الامر كان فيه مرونة
ومش بنحسبها باليوم كدة

ولذلك انا قررت ان التبرع بالدم يكون مرتين فى السنة كل مرة بينهم 6 شهور
علشان نخلص من قصة التواريخ والمواعيد اللي هما حطوهالنا جديد
وعلشان تبقى ايام التبرع ايام محددة ومعروفة للجميع


شكرا ليكم

Anonymous said...

اصحابك اللي في العقرب والعزولي متحاوليش تتواصلي معاهم بأي شكل
خافي على نفسك وابنك

وائل said...

انتي اتخانقتي معاهم امبارح ؟
انا رحتلك على الساعة خمسة كدة وسالتهم عنك
وقالولى جت واتعصبت علينا ولسة ماشية
انتي علطول جايبلنا الكلام في كل حتة كدة بعصبيتك دي ؟
مش تهدي شوية يا نونو يا حبيبيتي
انا متبرعتش برضه وزي الفل مش زعلان اهو


Anonymous said...

جوزك التالت ده مبيروحش معاكي التبرع بالدم ليه ؟ هو انتي اتطلقتي منه هو كمان ولا ايه ؟

بـت خـيـخـة وأي كـلام said...

الغير معرف

يا خبر !!!!!!! .. طب للأسف انا قريت تعليق حضرتك متأخر بعد ما اتصلت بيهم فعلا

فمعلهش بقى .. حاول تهديدي مرة أخرى في وقت لاحق
:)


_________________


وائل

متخانقتش معاهم
انا اتعصبت بس
محمد كان معايا من اول اليوم ولما لقاني بدات اتعصب واتنرفز
فهو اتدخل لما لقاني خلاص قفلت
ولولاه انا كنت اتخانقت فعلا

وبعد شوية عمرو جه كمان
وانا كنت بدات أهدى


اساسا انت ايه اللي جابك امبارح ؟
!!!

مش عوايدك يعني ؟
!!!

ومقولتليش ليه انك جاي كنت استنيتك


____________________


الغير معرف


لا متطلقتش

بـت خـيـخـة وأي كـلام said...

الغير معرف اللي منشرتش تعليقه

حضرتك تعليقك عنصري اوي
مقدرش انشره طبعا

تعليقك يوجع ناس كتير اوي .. والناس فيها اللي مكفيها .. فرفقا بيهم يعني

الكلمة الطيبة صدقة

يعنى بتخيل لو كنت نشرت تعليقك وحد من الفئات اللي حضرتك ذكرتها دخل قرا التعليق بتاعك
يعمل ايه ؟

يروح ينتحر بقى ولا ايه ؟
!!

خليك حنين يا فندم مع الاخرين ..و بلاش العنصرية دي
والنظرة الفوقية دي للناس

محدش عارف مين احسن من مين عند الله سبحانه وتعالى

users online