Tuesday, July 04, 2017

إقـــتـــراح وشـــكـــر وإعـــتـــذار






مستعمرة الجُذام

مستشفى مستعمرة الجذام
اول مرة اقرا عنها كان من اسابيع قليلة
وكان في نيتي إني اعملّها زيارة أنا والمجموعة اللي معايا 
ونشوف إيه احتياجات المستشفى ونجيبها ونوصلها
لكن يشاء الله ان تحصل ظروف صحية 
تمنعني انا وابني من الخروج من البيت
ولسة لحد دلوقتي مش عارفة انا ممكن استعيد نشاطي  واقدر انزل امتى
كله بأمر الله والحمد لله على كل شيء
لكن جاتلي فكرة اقتراح 
 إن ممكن الفترة الجاية نعمل زيارة جماعية للمستشفى دي
إيه رأيكم ؟
هي المستشفى في منطقة الخانكة _ ابو زعبل
عايزة رأيكم على الفكرة دي
علشان لو لقيت مرحبين كتير منكم بالفكرة 
يبقى ممكن ساعتها اكتب بوست فيه كل التفاصيل
ولو مالقتش ترحيب
يبقى هاروح انا والمجموعة فقط في هدوء 

____________

شكرا على ثقتكم

كلامي ده موجه للحالات اللي بتجيلي عن طريق المدونة
ولــ فاعلين الخير

بشكر اى حد وثق فيا وفتح لي قلبه وحكالي مشكلته
واللي غالبا بتكون مشكلة مادية سببها مرض او ظروف صعبة بيمر بيها
بشكركم حقيقي على ثقتكم فيا
وربنا وحده يعلم ان تصرفكم ده 
بيخليني احس اني قريبة منكم واني اخت ليكم

وبشكر فاعلين الخير على ثقتهم فيا برضه
وانهم بيبعتولى تبرعاتهم المادية 
و يبقى غالبا انا ليا مطلق الحرية
 فى اختيار الحالة المناسبة اللي تروح ليها تبرعاتهم
بشكركم وجزاكم الله خيرا على كل اللي بتعملوه
أنا من غيركم ومن غير مساهمتكم ومشاركتكم معانا  ابقى ولا حاجة
ولا كان اى نشاط خيري بنقوم بيه كان هيستمر طول الفترة دي كلها
انتوا سبب استمرارنا
ربنا يبارك فيكم ويعزكم يارب


بشكر المجموعة اللي معايا
واللي انا بعتمد عليهم وقت غيابي
وبيكونوا عند حسن ظني في ادارة  آمور الحالات
  بشكرهم جدااا على تحملهم لغضبي و عصبيتي أغلب الأوقات
بشكرهم على تعبهم في المشاوير اللي ببعتهم فيها لأخر الدنيا

________

الرعاة الرسميين

 الرعاة الرسميين لمساعدة الحالات
دول شخصين _ بخلاف أفراد المجموعة _ ساندين المجموعة 
لما ميزانية المجموعة بتقع وفلوسنا بتخلص
 هما اللي بيلحقونا اغلب الوقت

صديق مصري سكندري مقيم في أمريكا  
بيشارك معانا بقاله سنين
ودايما مصدر دعم لينا
ربنا يبارك فيه يارب و يوسع رزقه

وفاعل خير من القاهرة بقاله فترة بيشارك معانا 
وبيبعت  تبرعات من غير حتى ما بطلب منه
اخر مرة بعتلنا تبرع بقيمة 20 الف جنيه وده كان فى اواخر رمضان
وفاعل الخير ده ميزته انه غالبا بيبعت مبالغ اكبر من توقعاتي
افتكر انه اول مشاركة له معانا 
بعتلى وقال انه هيبعت مبلغ وقيمته كذا 
ولما رحت استلم المبلغ لقيته ازيد من اللي قال عليه
فربنا يجبر بخاطره ويوسع رزقه دايما

_______

اعتذار

بعتذر لأي حد بعتلي مشكلته وكان منتظر مننا نساعده
واحنا للاسف خذلناه
اى حالة جاتلنا ومقدرناش نكون عند حسن ظنها بينا 
ومقدرناش نعملها حاجة
اعرفوا علطول ان ده بيبقى فوق طاقتنا المادية 
وفوق امكانياتنا
وفوق كل محاولتنا باننا  نساعدكم
بيبقى غصب عننا والله
انا بعتذر حقيقي
ومش قادرة اعملكم أي حاجة
غير أني ادعيلكم ان ربنا يفرجها عليكم وعلينا يارب

__________

البوست القادم

هيكون رد على كل تعليقاتكم 
اللي بعتوهالي الفترة اللي فاتت
 وكانت تعليقات مش للنشر
___________


إنـــــتـــــهـــــى



No comments:

users online