Tuesday, August 14, 2018

الـــرســـالـــة الـــســـادســـة




إلى الرجل الذي يحتوي إسمه على حرف الميم وإسمه ليس أحمد

صباح الخير من المنفى

إمبارح كنت صاحية وعندي فضول أسألك
لو ربنا رزقك بــ بنت هتسميها إيه ؟
واثقة إنك هتسميها إسم مميز في معناه
وعلشان كدة عندي فضول أعرف هتسميها إيه ؟

بس إمبارح كان يوم صعب جدا في أحداثه
كنت هافقد واحد من أولادي
مش عايزة أحكي تفاصيل دلوقتي
خصوصا ان ربنا  سترها والحمد لله
ورجعت البيت اخر الليل وانا مطمنة عليه

**

إنت بتحب القراية ؟
بتحب تقرا لمين ؟
إيه أكتر كتاب قريته وعلق معاك
قريت لإنطوان تشيخوف ؟
لو مكونتش قريتله يبقى كويس
كاتب ممل جدا وبضان 
متضيعش وقتك في قراية قصصه
أنا الأول كنت معتقدة إن إسلوب المترجم هو السبب 
في إحساس الملل اللي واصلني
بس قريتله اكتر من حاجة بإختلاف المترجمين
وكان هو هو نفس الإحساس
قصصه  مضمونها ممل أوي

عايزين نتفق على كتاب نقراه سوا ونتناقش فيه

أنا فيه كتب كتير أوي نفسي أقراها

افتكر اني قريت  زمان بعض كتب لمحمد حسنين هيكل
وبعد ثورة يناير  فهمت حاجات كتير 
و ندمت على الوقت اللي ضاع في قراية أكاذيب
  
أنا بزعل جدااا من وقت وفلوس ضاعوا في كتاب مضمونه ممل
أو إسلوب الكاتب ميكونش كويس كفاية
 أو يكون  الكاتب .. بيغير الحقايق

أنا بترعب من مستقبل هيتكتب فيه  أكاذيب عن ثورة يناير  
ويحشوا بالأكاذيب دي عقول ولادنا

تعرف .. انا بحس بغيرة فظيعة 
لو إتكلمت مع حد وعرفت إنه قرا كتاب أنا مقريتهوش
بحس بوحش بينهشني من جوايا
وببقى عايزة اقرا كل الكتب اللي الأخرين قروها وأنا مقريتهاش
ده بخلاف الكتب اللي انا نفسي اقراها
بس ولا عندي وقت  أقراها ولا عندي فلوس أشتريها

**

مش عايزة أحكيلك حكايات يظهر منها إني عميقة
تؤ .. أنا عايزة اعرفك على تفاهتي

عايزاك تعرف الجانب التافه والهايف في شخصيتي
سيبك من القراية والكتب .. أكيد هنرجعلها تاني كتير


هحكيلك النهاردة عن ملاية السرير المرسوم عليها فراشات ملونة
بحبها الملاية دي
مبهجة جدا
انا بحب الألوان عموما
خدت الملاية معايا المنفى
بس مستخدمتهاش الإستخدام الطبيعي بتاعها
أنا حاليا استخدمتها كــ ستارة 
معلقاها عــ الشباك
**
أنا كنت عايزة أسألك
انت عمرك شربت حشيش ؟
بلاش حشيش .. عمرك شربت سجاير ؟
واخدة عنك إنطباع إنك إنسان ملتزم
بس برضه مؤمنة ان جوة كل انسان ملتزم .. انسان تاني فيه لمحة فجر
وإلا الحياة تبقى مملة أوي
 لو الواحد عاش طول عمره جد ومفكرش يوم يتجنن

انت بتتجنن ازاي ؟
وقت ما تحب تعمل حاجة غير عادية
ومش مألوفة على شخصيتك 
بتعمل إيه ؟

بتحب الشيشة ؟
انا بحب الشيشة
لو ليك في الشيشة نبقى نشيش سوا برضه

بس تعرف .. مش عايزة علاقتنا تتطور للشكل ده
ونتقابل ونبقى واقعيين أوي في حياة بعض
عايزاك دايما زي ما انت كدة في حياتي
قريب جدا _ نفسيا _لدرجة إني اثق فيك
وبعيد جدا_ مكانيا_ لدرجة اني معرفش أشوفك واقابلك

بس خلينا نعتقد إننا هنتقابل ونعمل حاجات كتير سوا
خلينا نحكي على الأساس الوهمي ده
مش هيحصل حاجة لو تخيلنا نفسنا قاعدين مع بعض على قهوة
 بنشيش سوا وبنشرب شاي بالنعناع
 وبنتناقش في كتاب قريناه إحنا الإتنين

خلينا كمان نتخيل انك ممكن تزورني الصبح
ونشرب شاي بلبن مع بعض ونسمع سوا سورة طه
بالمصحف المرتل .. مش المجود
وبراوية حفص عن عاصم
وتكون بصوت  الشيخ خليل الحصري
 او المنشاوي او مصطفى اسماعيل
 او حتى مشاري راشد
بس بلاش محمد رفعت
هو بيقرا بتجويد .. وأنا مبحبش التجويد في القرآن
بحس انه اسلوب مماطل 
على عكس المصحف المرتل الجميل 
 بحس انه اسلوب دوغري وصريح ومباشر
**
تحب نعمل إيه تاني سوا ؟
**
انا عايزاك تحكيلي
بس برضه عايزاك حر
يعني إحكي وقت ما تعوز تحكي
وإتكلم عن أي حاجة تيجي على بالك

مش عايزاك تجاوب على اسئلتي اللي بتكون محشورة في حكاياتي ليك
بس برضه عايزاك تحكي أكتر
عايزة أعرفك
عايزة اكون قريبة منك زي ما انت قريب مني

**
أنا عايزة أشكرك على حاجات كتير أوي
أنا ممتنة جدا ليك
:)

**

سلام
نورا



8 comments:

Anonymous said...

http://youtu.be/_XDL1jvHFsc

بـت خـيـخـة وأي كـلام said...

الغير معرف


حلوة الأغنية أوي
!!!

شكرا ليك

:)

احساس طفلة محبة للرومانسية بس واقعية said...

وحشتيني يا خوخة بكل التفاصيلك

P A S H A said...

"باحس بغيرة فظيعة لو اتكلمت مع حد وعرفت إنه قرا كتاب أنا ما قريتهوش بحس بوحش بينهشني من جوايا وبابقى عايزة اقرا كل الكتب اللي الأخرين قروها وأنا ما قريتهاش ده بخلاف الكتب اللي أنا نفسي أقراها بس لا عندي وقت أقراها ولا عندي فلوس أشتريها"
- كنت كده بالظبط لحد كام سنة. مهووس (بشكل مرضي) بالكتب والأفلام، سفيه في شراء الكتب وتكديسها أو أضعف الإيمان تحميلها PDF من ع النت وتكديسها برضه، وأعمل قوايم بيها وبالكتب اللي محتاج أقراها واللي لازم أشتريها (ما أعرفش ليه لازم؟؟ بس هو لازم وخلاص) .. الأفلام برضه، في مرحلة ما، كنت بادخل السيما مرة أو مرتين أسبوعيا وأتابع المهرجانات وأعمل قوايم بالأفلام اللي هاحملها وأظبط في ترجمات، لحد ما بقى عندي فوق الألف فيلم ما شفتهمش، وغالبا مش هاشوفهم .. ما كنتش أحب أشوف فيلم متاخد من رواية إلا أما أقرا الرواية الأول، لأني لو شفت الفيلم مش هاقراها .. وفي مرحلة بقيت باصنف الناس: لناس بتقرا و**** .. كان عندي شره غير طبيعي، وغير مبرر، بيستهلكني وبيستنزفني وبيوجهني كليا ببطء وبمحض إرادتي للعزلة والاكتئاب، خسرت ناس كتير جدا بسبب الموضوع ده، كان كل ذنبهم أنهم بيحبوني وحاولوا ينصحوني، كنت عنيد وغشيم قوي وقتها، لدرجة أني رفضت استثمره لما جت لي فرصة أو اتنين، بخلاف طبعا التأثير السلبي على صحتي وبيتي وشغلي اللي خسرت فيه كتير جدا .. ما أعرفش إيه اللي حصل؟؟ .. مش فاكر أو جايز مش عايز افتكر .. بس شوية بشوية لقيتني زهدت، نفسي اتسدت، أه والله، لوحدي كده، ما صحيتش وفقت، لأ، بس قفلت، بقيت مشوش، حتى الكتابة اللي كانت بتريحني زهدت فيها، بقيت أخرج، أروح أركب القطر وأسافر، أي حتة، مش مهم فين، المهم أتوه، الموضوع عجبني، وقبل ما يتقلب لهوس وإدمان جديد، لجمته، بقيت أسافر مرة في الشهر مكافأة ليا لما أعمل كذا وكذا وكذا، في ست سنين تقريبا زرت معظم مصر، وعرفت ناس وبلاد وحكايات، باتابع أخبار الكتب والأفلام وباكتب من وقت للتاني،، ما رجعتش زي الأول زي الأول بشكل كامل، بس باحاول.
- باعتذر عن الرغي والإطالة، ولو شايفه التعليق مالوش علاقة بالموضوع احذفيه ومش هازعل والله
يومك فل بإذن الرحمن
شريف

P A S H A said...

سؤال يا خيخة بعد إذنك: إيه حكاية البنات مع الشاي بلبن؟؟ .. بلاش البنات .. إيه حكايتك أنتي مع الشاي بلبن؟؟ .. أصل الموضوع ده في فترة من الفترات كان واكل لي دماغي ومش لاقي له تفسير .. يعني بنات كتير جدا (وأغلبهم ما يعرفوش بعض) أعرفهم عندهم ارتباط رهيب بالشاي بلبن .. الكلام ده طبعا قبل ما تطلع موضة البنت المثقفة اللي بتحب تشرب قهوة .. هل ليه تأثير معين عليكي؟؟ طعمه مثلا؟؟ لونه؟؟ ولا هو مجرد عادة اتعودتي عليها في بيتكم زمان وممكن تبدليه بأي حاجة؟؟ بتحبي تسقي فيه بقسماط ولا تشربيه كده لوحده؟؟ بتشوفي اللي بيشربوه إزاي؟؟ بتعمليه نص ونص ولا شاي بحليب منه فيه؟؟
- عندي أسئلة تافهة كتير من النوع ده،، عايز أفتكر أجمعهم وأنشرهم عندي في المدونة،، بس عارف أن ما فيش حد هيبل ريقي

بـت خـيـخـة وأي كـلام said...

احساس طفلة

بطوطة حبيبتي .. منوراني في المدونة
:*


______________________


شريف

إزيك ؟
كل سنة وإنت طيب
:)

أولا تعليقاتك دايما مهمة بالنسبالي يا شريف
ومبضايقش من الرغي
بالعكس بحبكم ترغوا معايا

مبحسش ان اللي بيقرا المدونة غريب عني
بحسكم قريبين مني
فبالتالي بحب تعليقاتكم ورغيكم
:)


عجباني فكرة انك تاخد بعضك وتسافر بلا هدف
جميل ان الواحد يكون عنده شغف بحاجة .. بأي حاجة

أنا بحس ان الشغف هو اللي بيخلينا نكمل الحياة بصعوباتها

لو فقدنا شغفنا بالحاجات اللي بنحبها
هنبقى بائسين جدا
**

بخصوص الشاي بلبن
مكونتش بشربه في بيت أهلي الا نادرا
دي عادة تعتبر جديدة عليا
بقالها حوالي تلات سنين
بشربه لوحده من غير بقسماط معاه
ومبحبش اللبن اساسا ... فبالتالي بعمل شاي مغلي في البراد
واصبه في مج مخصوص واضيف له حبة لبن صغيرين خالص


قبل الشاي بلبن كان عندى عادة انى اشرب نسكافيه الصبح
بس لقيت نفسي مش هو ده برضه المشروب اللي بيحتويني
ولا القهوة كمان بتحتويني

وكان فيه فترة كبيرة قبل كل ده مكونتش بشرب حاجة اساسا الصبح

لكن الشاي بلبن كانه اكتشاف بالنسبالي
مكونتش متوقعة اني هاقع في حبه كدة
ومبعرفش اشربه غير الصبح بدري
تقدر تقول بقيت شغوفة بالشاي بلبن

بقيت بحب الحالة اللي ببقى عليها لما بشربه الصبح وانا بسمع اذاعة القرآن الكريم الساعة 6 الصبح


انا ممكن اكتب بوست في حب الشاي بلبن
:))))))


تحياتي ليك

Anonymous said...


على كل حال شكرا يا نوران على عدم وقوفك جمبى فى مشكلتي بس حبيت اقولك كل سنة وانتى طيبة

بـت خـيـخـة وأي كـلام said...

حبيبتي وانتي طيبة
وبخصوص مشكلتك
انتي بعتهالي اكتر من مرة وبتفاصيل مختلفة
وقلتلك قبل كدة انتي محتاجة حد متخصص يساعدك .. وانا مش متخصصة يا حبيبيتي
انتي محتاجة دكتور نفسي

users online