Tuesday, August 07, 2018

الـــــــرســـــــالـــــــة الـــــــرابـــــــعـــــــة




إلى السيد الذي يحتوي إسمه على حرف الميم وإسمه ليس أحمد

صباح الخير
إزيك؟

هاحكيلك النهاردة عن بنتي الصغيرة  لما سألتني
ماما .. هي الرصاصة بتوجع ؟

كنت لابسة حاجة بتكشف أجزاء من جسمي
فــ بنتي تحسست  أثر لخرطوش
وسألتني السؤال ده
أنا بصيتلها وأنا ببتسم إبتسامة حزينة
ومرديتش عليها
سؤالها رجعني تاني للميدان
وقعدت أفتكر ذكرياتي فيه
**

بعد طلاقي الأول .. واللي تزامن حدوثه بعد وفاة بابا بكام شهر
كنت حاسة إني إتغيرت
وإن ده حدث جلل 
وإني بعد كدة لما أجي أحكي حاجة
 هأقول  بعد طلاقي .. أو قبل طلاقي
وقعدت فترة مشوشة مش عارفة أيهما أصعب ؟
موت بابا ؟.. ولا طلاقي لأول مرة ؟ 
وبعد فترة استقريت ان موت بابا هو الأصعب
وإني لو هقسم حياتي لفترتين 
هتبقى فترة قبل وفاة بابا
وفترة بعد وفاة بابا

لكن .. بعد ثورة يناير
الأمر إختلف تماما
وحياتي كلها اتشقلبت 
واتقسمت لفترتين
نورا قبل ثورة يناير
ونورا بعد ثورة يناير

اللي حصل وقتها كان عظيم
عظيم في كل شيء
بخلاف عظمة الحدث نفسه
وثورة الناس على الظلم وعلى الفساد وعلى نظام وسخ
إلا إن العظمة كمان كانت  في الأوجاع اللي طالتني
 وطالت كل من شارك في الثورة
الأوجاع بكل أشكالها .. الجسدية و النفسية

أنا إتغيرت من وقتها
ومبقتش طبيعية أبداااا
معتقدش حد فينا بقى طبيعي بعد الثورة وتبعاتها

**

أنا فاكرة إني شوفتك أول مرة بعد الثورة بشهرين أو تلاتة 
اتقابلنا في الميدان بخصوص حاجة معينة
فاكر؟

انا كدة بسهل عليك الأمر أوي
مكونتش حابة أديلك أي إشارة تعرفك إنت مين
كنت عايزاك تعرف لوحدك

***
عارف .. نفسي دلوقتي أسمع أغنية
" شفطة بن "
 بتاعة مصطفى رزق

عايزة أسمعها معاك
بس  أنا مش هاشرب قهوة وأنا بسمعها
أنا هاشرب شاي بلبن
:)

** 

أنا هامشي بقى .. يومك حلو يارب

سلام
نورا




No comments:

users online