Thursday, September 06, 2018

الـرسـالـة الـ 12







إلى الرجل الذي يحتوي اسمه على حرف الميم واسمه ليس احمد

____

احكيلي حكاية 
احكيلي  علشان افضل عايشة
احكيلي علشان افضل احكيلك
احكيلي علشان اكتب
احكيلي علشان أخف من الوجع اللي انا فيه
 احكيلي علشان انا حاسة انك زعلان مني
ولازم تحكيلي علشان تنفي الاحساس ده
احكيلي علشان انا زعلانة منك لاني حاسة انك زعلان مني
احكيلي علشان انا عندي اوضة فيها تلات سراير 
كانوا مليانين عيال وحياة وضحك وعياط وصريخ ولعب وشقاوة
وفجأة الأوضة بالسراير بقوا سكتم بكتم
احكيلي علشان انا خسرت كل حاجة
خسرت الثورة
والميدان
والدم
والحق
والعيال
والأصحاب
وكسبت تماثيل
احكيلي علشان اقرا
احكيلي علشان الحياة خد وهات
ومينفعش افضل احكيلك وانت متحكيش حاجة
احكيلي لانك مش ملاك
ولان انا مش شيطان
احكيلي علشان احنا بشر
احكيلي علشان انت عايز تحكيلي
احكيلي حاجات عبيطة
مش عايزة أسرار تخاف منها 
او تخاف لو حكيتها تورطك
احكيلي علشان انا مبنامش
احكيلي علشان الحكايات خير من النوم
 احكيلي عن بنتك المش موجودة
 علشان احكيلك عن فريدة وإزميرالدا
احكيلي عن الثورة 
 علشان احكيلك عن الميدان
احكيلي عن احلامك 
علشان احكيلك عن كوابيسي
احكيلي علشان تتحرر من خوفك
احكيلي علشان انت فارق معايا
احكيلي علشان انا مش عايزة منك حاجة
احكيلي علشان مفيش بعدين
احكيلي علشان افضل احكيلك علشان انت حابب اني بحكيلك
احكيلي علشان انا واثقة فيك
احكيلي لأنك واثق فيا


***

متحكيش حاجة


سلام
نورا


10 comments:

Anonymous said...

خيخة ... أنا متابعك من 2007
من 12 سنة تقريباً ومعرفكيش في الحقيقة
وليا طلب واحد بس عندك... نفسي أشوف ملامحك
أنا عارف انه طلب قليل الذوق وماليش حق فيه, بس عندي أمل انك توافقي عليه

Anonymous said...

أنا متابع الرسائل كلها ومتابع كل حرف بتكتبيه من سنين وإسمي فيه حرف الميم وعارف ان مش أنا المقصود لأنك متعرفنيش ,, بس بحس إن كل كلمة بتكتبيها موجهة ليا أنا وببقى عاوز أرد عليكي وكأنك بتكلميني أنا
أنا بقيت بشرب شاي بلبن الصبح زيك وبتخيل إني بشربه معاكي
وبقيت بسمع سورة طه وبقيت بحبها بسبب حبك ليها وخلتيني وانا ماشي في الشارع أبص على محلات الأسلحة وبقيت بتمنى اليوم اللي اشوفك فيه علشان نسافر سوا إسكندرية وأسوان وانا عن نفسي هاخدك ونسافر اليونان وتركيا وباريس وافرجهوملك بطريقتي انا لفيت العالم تقريبا ومكنش معايا حد
دلوقتي بقيت بتخيل انك معايا
إنتي مجنونة يا نوران وبتجنني القراء معاكي
بتخلينا احنا كمان نتخيل حياة تانية عايشينها
انا اتمنيت اكون انا المقصود برسايلك دي
وبحسد جوزك عليكي وبحسد المقصود بالرسايل وبحسد كل اللي يعرفوكي وقريبين منك
انتي بتدي طعم للدنيا
والدنيا من غيرك دلعة

لو تسمحي لو المقصود بالرسايل مش عايز يحكيلك انا ممكن احكيلك حكايات
انا عندي حكايات كتير اوي نفسي حد يسمعها
ممكن ابعتلك حكايتي؟

بـت خـيـخـة وأي كـلام said...


هي مالها ضلمت كدة ؟
!!!!!!

التعليقات بقت مريبة فشخ
!!!

Anonymous said...

http://youtu.be/gn8rsL6bIzk
حاجه خفيفه كدا تلطيفا للاجواء 😂
Hossam

Anonymous said...

يا بخت ميم بيكى وبرسايلك يا نوران انا اعرف انك مش بتحبى حد يناديكى بنوران وبيجيلك احساس انك عاملة مصيبة لا قدرالله ه‍ه‍هههههههه بس انا بحب اسم نوران عن نورا بحس انة فخم وبيشع نور
انا اعرف تفاصيل فى المدونة دية عنك وبحب اقرء ليكى ومتابعاكى من زمان

بـت خـيـخـة وأي كـلام said...

Hossam

والله لما قريت أول تعليقين كنت هناديك أستنجد بيك تلحقني باللينك
:)))

_____________

الغير معرفة


يا آروبة
!!!
انا فعلا مبحبش اسم نوران ده
:))



بـت خـيـخـة وأي كـلام said...

اللي منشرتش تعليقها بناءا على طلبها


إحنا ممكن نتقابل وأعيط معاكي عادي
:)

بصي يا حبيبيتي

هو إنتي بتسأليني لو مكانك هاعمل إيه ؟
ولا عايزة مني نصيحة ؟

لو كنت مكانك
شخصيتي وقناعاتي الخاصة بيا مكنتش هتقبل وضع زي ده
وكنت هاطلب الطلاق وأصر عليه لحد ما اتطلق

لو عايزة نصيحة مني
متطلقيش .. انتي بس ابعدي عنه شوية لحد ما تهدي .. انتي دلوقتي غضبانة
والغضب أقصر طريق لإتخاذ قرارات غلط تودي في ستين داهية

خدي بنصيحتي ومتعمليش اللي انا كنت هاعمله ..... ليه ؟
علشان إنتي مش أنا

انا كنت هاصر عــ الطلاق علشان شخصيتي وتكويني النفسي بيتحملوا تبعات قرار مصيري زي قرار الطلاق

لكن إنتي من تعليقك محستش إنك كدة ( وده مش معناه إن شخصيتك ضعيفة ) .. فمتكابريش .. لكن خدي وقت لحد ما تهدي وتقدري تتعاملي معاه تاني


ربنا معاكي ويصلح حالك وحالنا
:)

Anonymous said...

اللينكات جاهزه 🎈
http://youtu.be/2rn__5aBhME
http://youtu.be/MUJPeJ0z8pM
Hossam

sherif hussien said...

وحشتينا
ووحشتنا كتاباتك

بـت خـيـخـة وأي كـلام said...

Hossam

بتقع على الحاجات الحلوة دي إزاي ؟
!!!

شكرا يا حسام
:)

______________

شريف حسين


يااااااااااااه .. إزيك يا شريف ؟
إنت اللي واحشتنا .. إنت فين يا بني ؟
مختفي بقالك فترة

يارب تكون بخير

:)

users online