اخـصـم عـلـى نـفـسـك

 

آدم وريّان .. طفلين 

بيربط بينهم مرض السرطان

.

آدم عنده تقريبا 6 سنين

وريّان عنده تقريبا 3 سنين 

.

آدم سبق ريّان في العلاج 

بقاله سنة تقريبا في قصة الكيماوي والعمليات

لكن ريّان لسة مبتديء .. بقاله تقريبا شهرين

.

عرفت ريّان عن طريق آدم

عن طريق والدة آدم تحديدا

.

ريّان مش من القاهرة 

بس لما بيجي القاهرة علشان الجرعة بتاعته

بستضيفه عندي هو ووالدته

.

ولأنه طفل .. وأنا معنديش أطفال في سنه

فـ مامة آدم بتيجي تزورني هي وآدم 

علشان آدم يلعب مع ريّان 

.

وآدم لأنه بقى خبرة في الكيمو 

فبقى بيهوّن على ريّان ألم العلاج

.

النهاردة آدم قال لـ ريّان

" إخصم على نفسك "

فـ أنا ومامة آدم ومامة ريّان

بصيناله باستغراب

وأنا كنت أول واحدة  أنطق 

وقولتله : إيه ؟

!!

يخصم على نفسه يعني إيه ؟

!!

فـ آدم قال بـ براءة 

يعني ياكل 

فـ مفهمناش برضه

فـ مامة آدم سألته بإندهاش 

إنت جيبتها منين

  إن " اخصم على نفسك "  دي معناها يعني ياكل ؟

!!

سمعتها فين دي يا آدم ؟

فـ آدم بص لمامته بإستغراب

 وقالها وكأنه مش مصدق إن هي اللي بتسأله السؤال ده 

وقالها : منك يا ماما .. إنتي بتقوليلي كل شوية

 اخصم على نفسك .. اخصم على نفسك

علشان أكل 

فـ مامته قعدت تضحك أوي 

وقالتله وسط الضحك

" يا واد أنا بقولك اغصب على نفسك .. مش اخصم "

فهو بصلها وهو مش فاهم فين الفرق

هو سامعها برضه اخصم

فقالها ما انا بقولها صح .. اخصم على نفسك

.

المهم يعني

إحنا التلاتة كررنا قدامه النطق الصحيح

وقولنالوا الجملة براحة 

لحد ما اتعلم يقولها صح

فهو حب يثبت لـ ريّان انه شطور 

وحب يقول الجملة لـ ريّان بنطقها الصحيح 

فـ راح قاله 

" يلا يا رينو .. اغصب على فنسك "

:))))))))))))))))))

فــ انا ضحكت وقلتله لأ لأ لأ 

ارجع تاني قولهاله اخصم على نفسك .. أرحم من فنسك دي 

:)))))))))))))

.

المهم أخيرا قال الجملة صح من أولها لأخرها

فـ سيبناهم يلعبوا في الأوضة جوة 

واحنا التلاتة قعدنا نشرب الشاي برة في الصالة 

.

 شوية ومامة ريّان دخلت تطمن عليهم

 لأننا فجأة ماسمعناش أي صوت طالع منهم

.

مامة ريان طلعت الصالة  بشويش

 وهي بتهمس وبتشاورلنا تعالوا شوفوا 

فقومنا معاها وروحنا بصينا عليهم

لقينا آدم قاعد على السرير 

 ومقعد ريّان في حضنه كأنه بيبي رضيع

وبيأكله البطاطس المسلوقة في بؤه

وبيقوله وهو بيحط المعلقة في بؤه

 اخصم على نفسك يا رينو

 وكُل  نونو نونو  

لحد ما تخلص الطبق كله  

😊😊😊

_______________

إنــتـــهـــى

ملحوظة 

أنا مستاذنة مامة ريّان ومامة آدم

 في إني أحكي الموقف ده 

وكنت هاستخدم أسماء مستعارة لأولادهم

بس قالولي لأ اكتبي الأسماء الحقيقية عادي 

علشان لو حد قرأ يدعي لعيالنا بأسمائهم الحقيقية 

فــ أي حد يقرا البوست ده 

ياريت  يدعي بالشفاء العاجل لـ آدم وريّان