Thursday, March 09, 2017

الـــهـــدوء الّـــذي يـــســـبـــق الـــقـــتـــل



أحمد
هذا الخطاب لا ريب فيه
احكي لك ما لن احكيه بعد ذلك
**
حدث أن فقدت بوصلتي
 ولم استطع تحديد اتجاهات الجنون
فــ قمت بكل طقوس المرض المزمن
ومارست اعراضه كلها  كما ينبغي

كانت نوبات الفزع  قد عاودتني من جديد
فــ قرر الطبيب ان احتجز في مصحة نفسية
فقط لثمان ليال تحت المراقبة الشديدة
منع عني تدخين السجائر والقهوة
تمسكت بحقي .. أنا لي كل شيء
لي السجائر
 والقهوة
  والجنس
 والصراخ
 والرقص
فحصلت على حقوقي كاملة بطرق سرية وغير مشروعة

طبيبي غبي .. لا يدرك انني بارعة في تمثيل الشفاء
لم أقم بأية محاولات للتمرد على الاوامر و القوانين
كنت مريضة مطيعة
ابتسم حين ارى الممرضة اللئيمة المعنية بمراقبتي
 وهي تكتب تقريرها اليومي عن حالتي
انتهزت فرصة انشغالها بشيء ما وقرات ما تكتبه
" المريضة تتبع التعليمات بشكل جيد ولا يصدر عنها أية مشاكل "
ها ها ها .. ممرضة لئيمة غبية

فاجأني الطبيب بأنه أمر بــ مد مكوثي في المصحة 
لإسبوعين اخرين
اندهشت اللئيمة وسالته لما ؟!!
 هى مطيعة هادئة  لا تسبب اية مشاكل
قال لها : هذا ما يثير ريبتي ... انها معجونة بماء الشياطين
لو كان صدر عنها أية مشاكل لربما اطمئن قلبي
 لكن هدوئها هذا مريب

قررت أن اعطي له  ما يريد
مارست كل اشكال تمردي على القوانين
فـــ قتلت اللئيمة .. وطعنت الطبيب


قالت لي لئيمة اخرى
انهم وجدوني بجانب الجدار القديم المهدم  للمصحة
انحت باظافري  _ الملوثة بالدماء_  في الصخور الناتجة عن الهدم
طلبت منها أن تأتيني  بالصخور التي وجدوها بجانبي

 كانت صخرة على هيئة صرخة طفل رضيع
وصخرة على هيئة رائحة الطين
والأخيرة على هيئة طعم  الشاي المزود بالحليب

اعرف فيما تفكر يا احمد
نعم ... انا اقوم بنحت الاصوات والروائح والاطعمة
لا تسألني كيف
فهذا ليس من شأنك

**

أحمد
أحمد
أحمد
أحمد
أحمد
أحمد
أشعر بغرابة وغربة  من إسمك
وكأنني أول مرة اتلفظ به !!
لا يهم الأن  علاقتي بإسمك
دعني أولا استكمل ما بدأته قبل أن يأتي يعقوب

**

أحمد
أريد أن احكي لك عن قبلة سرية
 حصلت عليها من رجل غريب
لا اعرف اسمه او شكله
فقط اتذكر صوته

كنت اخضع لعملية جراحية منذ سنوات بعيدة
اتذكر انني كنت ملقية على فراش مدولب
يجرني رجل معني بإفاقتي
 ونقلي من غرفة العمليات لغرفة اخرى
اعتقد انني كنت في ممر ما في المشفى
حين كنت اهذي _ نتيجة المخدربــ اسم طفلي مرارا وتكرارا
سألني الرجل وهو يجر الفراش 
 وكان صوته يأتي من خلف رأسي 
مين شريف ؟ ده جوزك ؟
فجاوبته بوهن المرضى  :  لأ .. ده ابني
اتذكر انني دخلت فى نوبة بكاء شديد
_لا أعرف سببه_
 بعدما نطقت لفظة  " ابني "
حينها فقط شعرت بأن الرجل هدأ  من حركة الفراش
 حتى ثبت الفراش تماما
وقال لي بحنو بالغ
" متقلقيش .. هتفوقي وهتبقي زي الفل وهترجعي لإبنك شريف"
وهنا شعرت بقبلته الحانية جداااا على جبيني
 وبــ أصابع يده تمسد شعري المكشوف
ثم ربت على كتفي  واستكمل السير بي في الممر

  لم يكن يستغل وضعي كمريضة واهنة
_خرجت لتوها من غرفة العمليات ولم تستفق تمام الإفاقة من آثار المخدر_
ويتحرش بي

بل كان فقط يمنحني الآمان

لا اعرف شكل الرجل .. ولا اعرف اسمه
ولكني أحببته 

**
أحمد
حدث وإن استلمت ذات يوم
 سبعة عشر رسالة زرقاء
الأمر كان جدا مريب !!

لا وقت لدي  الأن لأحكي لك على ما تحتويه الرسائل الزرقاء
فـــ يعقوب على وشك الوصول

**
أحمد
أيها القريب الغريب
ما عدت أعرفك

**

أتسائل دائما
متى ينفد صبر الرجل عليّ ؟
إلى أي مدى سيتحملني ؟
انا دائما في حالة استعداد لأن يفاتحني في امر الفراق
حتمًا سيقول لي ذات يوم
" لم اعد استطع معكِ صبرًا "
وسيرحل مثل من سبقوه

حتى يأتي هذا اليوم .. سأفعل ما أجيد فعله دوما
سأخلص له حتى النهاية

لن أبدأ بقتله .. إلا إذا بدأ هو أولًا بــ شحذ خنجر الخيانة
حينها سأكون أنا أول الطاعنين
فــ خنجري دائما جاهز للقتل
وأنا دائما سريعة الطعن

أحمد
هذا الرجل يقتلني ببطء
يسلب الروح من الجسد رويدا رويدا
أنا أختنق

**
أحمد
حضر يعقوب
اتخذ شكل رأس أسد .. له انف يسوع .. ورموش يهوذا
واستقر في الجدار المجاور للفراش
واتخذ من فرس البحر رفيقا دائما مجاورا له في الجدار

**

احمد
انا هادئة جدا تلك الأيام
فــــ احذرني
____________

إنـــــــتـــــــهـــــــى


Saturday, March 04, 2017

تنويه هام لمحبي التبرع بالدم





صباح الخير يا جماعة
امبارح  زي ما انتوا عارفين كان التبرع بالدم
انا رحت طبعا  
واللي جم التبرع امبارح  اتنين اصدقاء
 واتبرعوا قبل كدة كتير
المهم
ان امبارح اتفاجائنا بنظام جديد متبع
  في المصل واللقاح بشأن التبرع بالدم
وقوانين جديدة 
احنا مواعيدنا كانت اول جمعة من  الشهور الاتية
اول جمعة في مارس
اول جمعة في يوليو
اول جمعة في نوفمبر


انا كنت اتبرعت يوم 4 نوفمبر
فلما المسؤلين هناك شافوا تاريخ اخر تبرع عندهم على السيستم 
لقيتهم بيقلولى حضرتك مش هينفع تتبرعي ؟
ليه يا جماعة مش هينفع اتبرع ؟
اصل لسة معداش اربع شهور
فانا قلتلهم لأ عدى اربع شهور
انا اتبرعت فى اول جمعة من نوفمبر
 والنهاردة اول جمعة من مارس 
 فكدة على حسبتي عدى اربع شهور
لأ يا فندم  حضرتك اتبرعتي 4 نوفمبر 
و النهاردة 3 مارس .. حضرتك تيجي بكرة 
انا طبعا فى عقل بالى .. أحا
 مش جاية بكرة طبعا المشوار ده تاني 
ومش هتيجي على يوم يعنى 
وفهمتهم ان احنا بقالنا سنين بنيجي فى مواعيد محددة 
وطلبت منهم انه يتصلوا بأي مسؤول
يقدر ياخد بدالهم قرار التغاضي عن اليوم الفرق ده لانى مش جاية بكرة
وفي هذه الاثناء .. لما واحد منهم راح يتصل معرفش بمين 
الممرضة عملتلى قياس نسبة الهيمجلوبين
وطلع والحمد لله 12.2 .. هو التبرع بالدم المفروض من 12 درجة
فده  كدة حاجة عظيمة جدا بالنسبالي
ولسة جاية اقول هيييييييييييييييييه
علشان فيه امل انى اتبرع 
في حالة لو قدروا يتغاضوا عن موضوع اليوم الفرق ده
ولان اللي يعرفني كويس 
يعرف ان انا صعب اوصل للنسبة دي بسهولة يعنى 
وباخد شهور طويلة علشان اظبط نسبة الهيمجلوبين
فكنت فرحانة جدا ان نسبة هيمجلوبيني
 عدت الحد الادنى المتعارف عليه
فلقيت الممرضة  بتقول لي
 هو حتى لو جه وقال ان عادي تتبرعي النهاردة 
ويتغاضوا عن اليوم الفرق ده
حضرتك برضه مش هينفع تتبرعي لان النسبة قليلة 
 فانا قلتلها لا مش قليلة 
دي ازيد من الحد الادنى للتبرع بدرجتين من عشرة
فقالتلي  لا ماهو النظام الجديد  بيقول
 ان الستات ميقلوش عن  12.5 درجة
 والرجالة ميقلوش عن 13.5  درجة 
طبعا انا اتوترت جدا وبدات اتنرفز شوية من القوانين دى
والراجل اللى راح يتصل بمسؤول 
جه  ودخل عل السيستم تاني وقال
لا حضرتك كمان المفروض تيجي تتبرعي 5 مارس مش 4 مارس
قلتله مش فارق معايا 4 مارس من 5 مارس
انا في الحالتين مش هاجي في الايام دى
انا باجى يوم جمعة من اول شهور محدة بقالها سنين
فانا مش هينفع معايا اجى بكرة و بعده
وبعدين ايه موضوع انكم متقبلوش تبرع بالدم  الا عند 12.5 درجة ؟
 ماهو طول عمر التبرع معروف بيبقى عند 12 بس .. ايه اللي حصل

كل اللى طلعت منه ان ده نظام جديد عملاها وزارة الصحة
علشان هما شايفين ان نسبة الهيمجلوبين 
 اللي اقل ن 12.5 مبتفيدش المرضى اللي محتاجين نقل دم
وبناءا عليه هما رفعوا النسبة من 12  الى 12.5 بالنسبة للسيدات
ومن 13  الى 13.5 بالنسبة للرجالة  
وموضوع التواريخ ده برضه عملاه وزارة الصحة
ومينفعش التغاضي عنها

طبعا اصدقائي الاتنين اللي جم
ولانهم رجالة وعدى على اخر تبرع ليهم اكتر من تلات شهور
 فكان عادى انهم يتبرعوا
طالما نسبة هيمجلوبينهم كويسة
فهما اتبرعوا
وانا رجعت مكسورة الخاطر  ومتبرعتش

المهم على الاساس ده
انا قررت ان يكون التبرع بالدم
يكون كل 6 شهور
يعنى مرتين فى السنة
علشان يبقى مواعيد محددة
وعلشان اضمن انى لما اروح
 يبقى فعلا عدى اربع شهور وزيادة على تاريخ اخر تبرع
وميجوش يقولولي لا ده فاضل يوم ولا يومين 

فبالتالي مواعيد التبرع بالدم الجديدة
هتبقى اول جمعة من شهر ابريل
واول جمعة من شهر اكتوبر
يعني هيبقى مرتين في السنة بينهم 6 شهور تقريبا

ان شاء الله انا هاروح اول جمعة فى ابريل الجاي  
الاصدقاء اللي جم امبارح واتبرعوا
ميجوش طبعا في شهر ابريل
ويبقوا يجوا معايا شهر اكتوبر الجاى باذن الله

واللي مجاش امبارح لاى ظرف
وكان نفسه يجي
اهو بقى فيه فرصه انه يجي فى شهر ابريل


اسفة على الاطالة
بس حبيت افهمكم الوضع
علشان تبقوا عارفين النظام الجديد

اللي مهتمين بالتبرع بالدم
ياريت بقى تتغذوا كويس جداااااااااا
علشان كمان  الحد الادنى للتبرع اترفع نص درجة
ونص درجة دى مش هينة
ومش سهلة
وبتاخد وقت كتير علشان تترفع
النص درجة دى جواها خمس درجات من عشرة
 يعني مهياش بسيطة ابدا

ادعولى بقى ان خلال الشهر ده تكون نسبة هيمجلوبينى
 اترفعت التلات درجات من10 اللي ناقصين دول 
علشان اقدر اتبرع الشهر الجاي

بس كدة
شكرا ليكم كلكم

وشكرخاص لأصدقائي محمد وعمرو
 اللي شرفوني امبارح بالحضور واتبرعوا بالدم
جزاكم الله خيرا يا رجالة
:)
_____________

إنـــــتــــــهـــــى


Friday, March 03, 2017

دعـــاء الـــذهـــاب إلـــى الـــتـــبـــرع بــالـــــدم





اللهم في صباح هذا اليوم أسألك أن
 ترفع  نسبة هيمجلوبيننا
وتظبط ضغطنا
ولا تجعل مصيبتنا في أنيميتنا
واجعلنا من المتبرعين دوما بدمائنا
وتقبل اللهم منا صالح اعمالنا
اللهم أمين .. اللهم امين .. اللهم امين

:)

Sunday, February 26, 2017

تـــلاتـــة تـــلاتـــة الـــســـاعـــة تـــلاتـــة




مساء الخير يا جدعان
وحشتوني والله
اخباركم ايه ؟
يارب تكونوا كلكم بخير
:)

بفكركم بميعاد التبرع بالدم
هيكون إن شاء الله تعالى هيكون يوم الجمعة الجاية
الموافق 3 مارس
وهيكون الساعة 3 العصر
علشان الناس تصحي براحتها وتفطر كويس 
ويصلوا الجمعة و يجوا بعد الصلاة

رقم تليفون للي هيجي يوم الجمعة الجاية
  وتايه ومش عارف يوصل
 01119454111

التبرع بيكون في هيئة المصل واللقاح في الدقي

وده بوست قديم كنت كاتباه 
بشرح فيه فكرة التبرع بالدم جت ازاي 
علشان اللي مش عارف  الموضوع ايه 
ممكن تقروه وانتوا هتعرفوا كل حاجة

مستنياكم الجمعة الجاية
اشوفكم على خير إن شاء الله
ومتجمعين دايما في كل خير

_____________________

إنـــــــتـــــــهـــــــى


Sunday, January 15, 2017

users online