فى اغلب البيوت يوجد قضية من نوع المسكوت عنه
وبتبقى فى السكرتة ومحدش واخد باله
لكن لما المسكوت عنه يبقى علنى وعلى صفحات الجرايد
تبقى فيه كارثة بتحصل او حصلت فعلا
المسكوت عنه بتكون عادة جرائم جنسية بين المحارم وبعضها
انا مش هادخل فى تفاصيل او فى سرد قضايا
لكن هاقول على حاجات لازم ناخد بالنا منها
وماندفنش راسنا فى الرملة زى النعامة الجبانة
لكل ام
لما بنتك تقولك ان فلان بيتصرف
تصرف غريب او بيلمسنى بطريقة غريبة
اوعى تهزئي بنتك
وتحسسيسها ان هى الجانى رغم انها ضحية
انتى تروحى معاها وتواجهى الشخص ده
ومهمها انكر اوعي تصدقيه وتكدبى بنتك
الكبار بيستغلوا صغر سن الصغار
وبيقولوا معقول هتكدبينى انا وتصدقى عيلة صغيرة؟
اه بروح امك اكدبك انت طبعا
واصدق بنتى واصدق ابنى
هو انت هتكون عندى اغلى من عيالى
العيال الصغيرة بطبيعتهم مش كدابين
ولا يعرفوش يعنى ايه كدب اساسا
لكن الكبار فاهمين يعنى ايه كدب
وبيستخدموه علشان يهربوا من مصيبة ارتكبوها
علشان كدة يا امهات صدقوا عيالكم
واوعوا تكدبوهم
ومهما الشخص حلف ايمنات
لازم برضوا تاخدوا موقف حاد وحازم معاه
علشان مايكررش فعلته
من الاخر كدة اللى يلمس حد من عيالك
خديه قلمين
وانهشى ضوافرك فى لحم وشه
وعضيه فى اى حتة تيجى تحت سنانك
وبهدلي بكرامة اللى خلفوه الارض
ولو بتشربي سجاير
اطفى السجاير فى جسمه
ولو مطولة ضوافرك
ادفسى ضوافرك فى عيونه
دول عيالك
يعنى اغلى حاجة عندك
فاهمة يعنى ايه عيالك
يعنى امانة ربنا ادهالك تحافظى عليها
وربنا لما يسترد امانته دى
هيسالك عليها يوم الحساب ماحافظتيش عليها ليه
لو حصل اى تحرش بعد ماتاخدوا حق عيالكم
وتربوا الكلب ابن الكلب اللى عمل كدة
لازم تتعاملوا مع عيالكم عادى بعد كدة
وماتتكلموش فى الموضوع كتير
واوعى تقفلى على بنتك
او تكبتيها او تحجبيها من وهى عيلة
علشان اتعرضت لموقف زى ده
بنتك مش غلطانة
لكن الشخص المعتدى هو اللى غلطان
ماينفعش بنتك تقولك فلان بيلعب فى شعري
تقومى تحجبى البت وهي عندها سبع سنين
ايه الهبل ده
ماينفعش تصلحى الغلط بانك تكبتي بنتك
لكل زوج
لما مراتك تقولك انا مش مرتاحة لفلان
بلاش تقعد تقول ليه وتسال اسئلة كتير
ارجوك يا حضرة الزوج المحترم
افهمها وهى طايرة
افهم ان نظرة فلان لمراتك مش مريحة
افهم ان مراتك ممكن تكون اتعرضت لشئ من التحرش
ومش عايزة تصرحلك علشان
ماتعملش مشاكل بينك وبين الشخص ده
خصوصا لو كان الشخص ده
اخوك ولا ابوك ولا حد من قرايبك الرجالة
لان صلة الدم اللى تربطك بيهم
هتخليك لو هى صرحت باللى حصل
انت مش هتصدقها برضه
مش هتصدق ان اخوك ممكن يكون بيتعرضلها
او صاحبك يكون بيبصلها نظرات غريبة
فعلشان كدة لو سمحت
ارحمها من التصريح وافهم التلميح
لكل اب وام
ممنوع منعا باتا الولاد والبنات يناموا فى سرير واحد
لو شقتكم صغنونة ومافيش غير اوضة واحدة للعيال
يبقى كل واحد وله سريره حتى ولو كانوا بنات
ولو اوضة واحدة وعندكم ولاد وبنات
افصلوا الاوضة بستارة بينهم
وممنوع باب الاوضة يتقفل عليهم لوحدهم اطلااااااااقا
ممنوع منعا باتا ممارسة العلاقة الزوجية قدام العيال
حتى ولو كانوا اطفال
وحتى لو كانوا نايمين
ابقوا اقفلوا عليكم باب اوضتكم
و وطوا صوتكم
وبلاش هونجا بونجا بصوت عالى
ممنوع منعا باتا انكم تسيبوا ولادكم مع بعض لوحدهم
حتى لو مربينهم وواثقين فيهم
الاطفال فى سن ما قبل المراهقة
بيكون عندهم حب فضول واستطلاع للاعضاء الجنسية
يعنى ممكن يلعبوا مع بعض لعبة العريس والعروسة
او لعبة الدكتور اللى بيكشف على المريض
لمجرد انهم يكتشفوا اعضائهم
والموضوع ممكن يتحول من لعبة جماعية لجريمة مسكوت عنها
ممنوع منعا باتا ان عيالكم تقعد على حجر حد
ممنوع منعا باتا تبعتوا عيالكم يشتروا حاجة حلوة مع اى حد
علموا عيالكم الصويت والعض والصراخ والجري
وعلموهم انهم يحكوا فى امان
من غير ماتزعلوا منهم او تحسسوهم ان هما المتهمين
لكل ام
ولادك قدام عنيكي
ولادك قدام عنيكى
ولادك قدام عنيكى
ولادك قدام عنيكى
فى التدريب بتاع النادى
عينك على ايد المدرب رايحة فين
حتى لو ولادك دول ولاد مش بنات
عينك على ولادك
وانتى عند الدكتور
عينك على ايد الدكتور وهو بيكشف على ولادك
ولادك قدام عنيكى
لو ظروفك ماتسمحش انك تكونى مع ولادك فى كل مكان
يبقى لازم يكون فيه بينك وبين ولادك مساحة من الحرية فى الكلام
وخليهم يحكوا
وانتى اسالى كتير
عملوا ايه ولعبوا مع مين وايه نوع اللعب
لكل ست او بنت
ليه دكتور امراض نسا؟
لييييييييييييه؟
مافى دكاترة ستات ماليين البلد
انا مش بتكلم من المفهوم الدينى
انا بتكلم عن الكسوف والاحراج
لو خلاص انتى بترتاحى مع دكتور نسا
يبقى جوزك معاكى
جوزك معاكى
جوزك معاكى
جوزك معاكى
جوزك معاكى
جوزك معاكى
لو جوزك مش موجود
يبقى تاخدى معاكى اختك او مامتك او صاحبتك
اى حد يروح معاكى
ممنوع الذهاب الى دكتور امراض نسا لوحدكم
ممنوع الذهاب الى اى دكتور راجل لوحدكم
خدوا معاكم حد يرحمكم الله
اللى ساكنين فى بيت عيلة
ممنوع الست لو هى محجبة
تقعد بشعرها قدام اهل جوزها من الرجال
لو الست مش محجبة اساسا
ممنوع انها تقعد بلبس فاضح
قدام اهل جوزها من الرجال
حتى لو فى بيت عيلة يا جماعة
اعملوا حدود فى العلاقات
وكل واحد يلزم حدوده
يعنى مش الراجل يدخل ينام
ويسيب مراته بتلعب كوتشينة مع اخوه
ويقول عادى دى مراتى وده اخويا يعنى اخوات
لا وحياة امك مش عادى ومش اخوات
لكل اب وام
لو عيالكم بتاخد دروس خصوصية
الدروس الخصوصية تكون فى بيتكم
والأب او الأم
يقعدوا فى نفس الاوضة اللى العيال بتاخد فيها الدرس
والباب يكون مفتوح
بس خلاص
انا تعبت من كتر النرفزة وانا بكتب البوست ده
خدوا بالكم من نفسكم اوى
وخدوا بالكم من عيالكم اوى اوى اوى
وقربوا من ربنا اوى علشان يرحمكم ويبعد عنكم اى شر
ربنا يحميكم كلكم ويحمي عيالنا
يارب
يارب
يارب
بلاش شريف يارب
لو مقدر ليا انى اشوف حاجة وحشة فى دنيتى
تبقى فيا انا يارب
وبلاش شريف
يارب انت وحدك اللى عارف مدى خيخنتى
وعارف انى مش هاستحمل حاجة على ابنى
يارب علشان خاطر حبيبك المصطفى يارب
بلاش شريف
بلاش شريف يارب
واى حاجة وحشة خلهالى انا يارب
يارب احفظلى ابنى والنبي
يارب لو زعلان مني بلاش تعاقبنى فى ابنى
احفظهولى يارب من كل شر
انا هامشى بقى لانى مش شايفة من دموعى
ومناخيري ساحت وبربرت
خدوا بالكم من نفسكم
وربنا يحفظكم ويحفظ عيالنا
احلى الكلام
بسم الله الرحمن الرحيم
قل لن يصيبنا إلا ما كتب الله لنا
صدق الله العظيم
انتهى
بت خيخة وأى كلام
