بدعبس فى الالبومات
وبشوف صورك
وبستغرب على العمر اللى فات
ازاى قدرت في ثواني
تبقى كبير كدة
ازاى مش قادرة خلاص اشيلك
ازاى خلاص ما بقتش بختارلك هدومك
وازاى خلاص بقيت تقول لأ ونعم
وبقالك أراء وكلمة مسموعة فى حياتي
ازاى يا غالى عليا جدا
قدرت تعملها وتكبر قدام عنيا من ورايا
انا كنت فين وانت بتكبر
ازاى مخدتش بالى منك
وازاى نسيت
اسجل كل لحظة فى عمرك صوت وصورة
ازاى حبيبى قدرت تكبر كدة
ليه ما فضلتش صغنن
جوة حضني
جوة بطنى
جوة قلبي
ليه استعجلت العمر انه يجرى
ليه عايز دايما تكبر اد بابي
واد جدو واد خالو
شريف حبيبى
خليك صغنن ولو ساعات
عايزة ارجع من تانى اشيلك جوة قلبى
وماتفارقش حضنى لحظة
عايزة تانى ارجع اقولك عيب ولأ وكل واشرب ونام
عايزة تانى ارجع امارس سلطتى عليك كأم
واختارلك كل حاجة
لون هدومك وشراباتك
ونوع الكارتون اللى هاتتفرج عليه
ولا اقولك
..........
لأ حبيبى
ما تسمعش كلمة واحدة من كلامي
وإكبر أوي
إكبر أوي أوي
وخليك بسرعة راجل
خليك دايما كبير
خليك دايما اد مسؤلية كلامك
واد مسؤلية اختيارك
واوعى تندم على هفوة ممكن تعملها فى حياتك
الاهم انك تتعلم الصح والغلط
واوعى تاخد دور المتفرج فى حياتك
خليك مشارك
واتمرمغ شوية بتراب الشوارع
علشان ماتبقاش واد ني وطري
عايزاك صالب عودك
رافع راسك
ما تخافش غير من اللى خالقك
عايزاك ماتظلمش حد
واياك فى يوم تقبل المهانة والاهانة
واياك تخاف من كلمة حق هاتقولها فى حياتك
اكبر حبيبى زى ما انت عايز
بس الاهم انك تفضل دايما كبير
واوعى فى يوم تخلى حاجة تصغرك
و.....
وابوسك حبيبى منين ولا فين
الف عين واحنا بين كل دووووول
ابوس الايدين ولا ابوس العنين
ولا اقرب واخلص وابوووووس
كل سنة سنة سنة
وانت طيب يا شيكو
كل سنة سنة سنة
وانت دايما معايا
********
انتهى
أم شريف
