صباح الخير يا جدعان
جمعة مباركة عليكم يارب
خلاص إحنا داخلين على رمضان
كل سنة وإنتوا طيبين وبخير
وبخصوص رمضان
تم عمل شنطة رمضان
( شنطة واحدة فقط )
كــ تجربة ومعرفة الأسعار وصلت لفين
والشنطة هتتكلف كام علشان لو حد حابب يشارك معانا
.
.
مكونات الشنطة
عدد 5 كيلو رز
عدد 3 كيلو سكر
عدد 3 كيس مكرونة .. الكيس كيلو
عدد 1 كيس شعرية ... كيلو
هتلاقوا في الفاتورة مكتوب 4 كيس مكرونة
لأن الشعيرية ال كيلو بنفس تمن المكرونة فبيحسبوها كيس مكرونة عادي
عدد 2 كيس لسان عصفور .. الكيس نص كيلو
هتلاقوا في الفاتورة مكتوب إنهم 2 كيس مكرونة .. نص كيلو
بس هما 2 كيس لسان عصفور مش كرونة
عدد 1 كيس دقيق
عدد 1 كيس عدس أصفر
عدد 1 كيس فاصوليا بيضاء
عدد 1 علبة سمنة كبيرة كريستال .. 2 كيلو
عدد 1 إزازة زيت للقلي والتحمير .. 3 كيلو
عدد 1 إزازة زيت ذرة كريستال .. 1 لتر
عدد 1 برطمان مربى تين
عدد 1 برطمان مربى فراولة
عدد 1 علبة حلاوة كبيرة .. كيلو
عدد 1 علبة جبنة كبيرة .. كيلو
عدد 1 باكيت شاي العروسة .. ربع كيلو
عدد 2 برطمان صلصة
عدد 2 باكيت مكعب مرقة دجاج
الباكيت فيه 12 مكعب تقريبا أو عشرة
عدد 1 برطمان عسل إسود كبير
عدد 1 برطمان طحينة كبير
.
.
وتم عمل حساب الأطفال في الأسرة
فــ جيبنالهم حلويات عبارة عن
عدد 1 علبة أولكر بالعجوة .. العلبة 12 باكيت
عدد 2 علبة هوهوز بالشيكولاتة .. العلبة 12 باكيت
عدد 2 علبة هوهوز بالفراولة ... العلبة 12 باكيت
.
.
الحاجات دي اتكلفت 1970 جنيه
الشنطة راحت لأسرة مكونة من 6 أفراد
.
.
وانا بكتبلكم دلوقتي المكونات
إكتشفت إني نسيت أجيب ملح .. وأجيب عسل أبيض
وأجيب لوبيا .. وأجيب بلح بتاع رمضان
-_-
ومنسيتش لأ القمر الدين
مكنش لسة نزل عند السوبر ماركت اللي اشتريت منه
وبكدة الشنطة أكيد هتتكلف أكتر من 2000 جنيه
لو جيبنا النواقص بعد كدة
.
.
اغلب الشنط هتبقى بالمكونات دي
ممكن الشنطة تقل شوية من حيث عدد المكونات
لو هاتروح لأسرة عدد افردها لا يزيد عن 3 افراد
يعني لو هاتروح لأسرة مكونة من فردين أو تلاتة
مش هاجيب 5 كيلو رز .. هاجيب 3 كيلو رز
وهاجيب 2 كيلو سكر
وهاجيب برطمان واحد مربى
وباقي الحاجات هتبقى زي ما هي
لكن لو أسرة مكونة من 4 أفراد لحد 7 أفراد
هتكون بنفس المكونات
.
.
مالحقتش أصور مكونات الشنطة
لأني وديتها علطول للأسرة
استغليت إن معايا عربية بسواق ساعتها
فــ طلعت من السوبر ماركت على الأسرة علطول
بس مصورالكم الفاتورة
.
.
إحنا عندنا حالات لــ أُسر متعففة
محتاجة لشنطة رمضان
يعني إيه أسرة متعففة ؟
يعني أسرة محدش عارف عن ظروفهم حاجة
ويبانوا انهم مستورين
فـ محدش هيفكر إنهم محتاجين لشنطة رمضان
على عكس مثلا الناس اللي زي حارس العقار
أو الست اللي بتنضف لكم الشقة
غالبا الناس دي بيجيلهم أكتر من شنطة في رمضان
علشان الحارس بتاع العقار مثلا
لو بيحرس عمارة فيها 15 شقة
ممكن 7 أو 8 شقق يدولوه شنطة رمضان
الست اللي بتنضف البيت
ممكن كل بيت بتنضفه
أصحابه يعملوا حسابها في شنطة رمضان
لكن الأسر المتعففة .. ميبانش عليهم الحاجة والعوز
ومحدش بيفكر يعمل حسابهم في شنطة
-_-
فــ أنا بكون حريصة إني أراعي الأسر دي
من خلال تعاملي مع الحالات على مدار سنين
وبحب أنتهز فرصة زي شهر رمضان
وأهاديهم بشنطة مواد غذائية
فيها أغلب المكونات اللي هيحتاجوها
فــ إحنا عندنا 146 أسرة متعففة .. من محافظات مختلفة
( وأغلبهم أُسر متعففة تعولها إمرأة أرملة أو مطلقة )
إحنا للأسف ميزانيتنا لا تسمح بعمل 146 شنطة
:( -_-
فــ اللي يحب / يقدر يشارك معانا
يتواصل معايا في التعليقات
يسيب لي تعليق مش للنشر
فيه إسمه ورقم تليفونه
واليوم والوقت المناسب له للتواصل معاه
وأنا هاكلمه
شكرا ليكم
وربنا يجازيكم خير يارب
______________
إنـــتـــهـــى
