30

 

هاقفلهم 30 عبثوثة النهاردة 

والصبح أكمل بوستات العبث  إن شاء الله

:)

29

 

لو فيه حد ضايقك

حاول تشوف موقفه 

من منظور مختلف

حلل سلوكه / تصرفه

وكأنك حد تاني غير نفسك

وكأنه هو حد تاني غير نفسه 

علشان تهدى من ناحيته 

**

ولو عملت تصرف ضايق حد

حاول تشوف الموقف من وجهة نظره

علشان تقدر تحس بـ حزنه / غضبه / صدمته

علشان تعرف حجم غلطك في حقه

-_-

28

 

إحنا هنحسب كل الوافدين من الدولة الواحدة 

بــ نفر واحد

يعني لو جالنا مثلا 29 وافد من هونج كونج

هنحسبهم نفر واحد

ولو جالنا 71 وافد من 4 دول

هنحسبهم أربع انفار فقط

وبكدة نوفر في الحاجة الساقعة  بيبس

:)))))))

27

 

واحد بس يموت ويكر الباقي وراه

26

 

وفكرة إني هاشوف بابا وماما  تاني 

فكرة عظيمة 

:)

اللهم بلغنا جنتك 

25

 

فكرة إنك في الجنة هتقدر تعوم في بحر غويط وماتغرقش

فكرة مثيرة جدااا للي زي حالاتي 

 اللي مابيعرفوش يعوموا 

:)

اللهم بلغنا جنتك 

24

 

أنا بحب حسام صديقي جدا

أيوة  أنا أقصد حسام اللي بيحطلي لينكات موسيقى

ربنا يعزه يارب 

إنسان جميل

وله مواقف معايا حلوة كتير 

ربنا يباركله يارب

ادعوله معايا دعوات حلوة  وحِبّوه معايا

:)

23

 

قال لها : يعني تفتكري مديحة هتفوق من حزنها 

وترضى تتجوزني ؟

 فقالت له : طبعااااااا ... كل الستات كدة يابني

يمثلوا الحزن في الأول  ..و بعد كدة بيتجوزوا  تاني عادي 

 إنت ناسي طنط دولت  اللي اتجوزت جوزها التاني 

وكان جوزها الأولاني مكملش الأربعين ؟

ولا طنط رجاء اللي اتجوزت إتنين في أول سنة

 من بعد ما عمو شوكت مات

.

.

 ده جزء من حوار في مسلسل مصري قديم 

.

عايزة أعرف ديانة أبوهم إيه دول ؟

!!

والمخرج كان فين ساعتها من هذا العبث الذي قيل ؟

!!

 لو كان عمل سيرش بربع جنيه

كان عرف إن عدة الأرملة اربع شهور و 10 أيام

ولا يحق لها عقد قرانها وزواجها إلا بعد مرور فترة العِدّة 

-_-

22

 

الدكتور  : لو حسيتي بـ غثيان  أو رغبة فـ القــ

أنا : أوععععععععععععع

( بتقيأ )

الدكتور : إبقي إديني فرصة طيب أخلص جملتي 

:)))

21

 

الدكتور قالي 

طب ملّيني وأنا هاكتب وإنتي إرتاحي

فقلتله : لأ .. دي أسرار يا دكتور 

مينفعش حد يتطلع على إبداعي الأدبي

 اللي هيتنشر بإسم ناس تانية 

:)))))

20

 

الدكتور دخل يتطمن عليا لقاني لسة صاحية 

راح مزعق فيا وقالي 

ارحمي جهازك العصبي وناااااااااميييييي

:))))))

19

 

ماتفوتنيش .. ده أنا وحدي 

-_-

18

 

خلاص .. مابقاش عندي حد أحكيله

:(

17

 

مفيش في إيدي حاجة أعملها خلاص

الميزانية وشطبت

وعندنا عجر في بند غسيل الكلى وجلسات الكيماوي 

 معدي الربع مليون بشوية  حلوين

  وزي ماهو مفيش عربية هتمشي من غير بنزين

 لازم تفهموا إن مفيش حالات هتاخد علاجها 

من غير ما نوفر تمن العلاج

 ولو حالة حصلها انتكاسة أو ماتت

أنا بحملكم المسؤلية 

لأنكم تكاسلتكم وطنشتوا  واترددتوا وبخلتوا

:( -_-

وأنا مش هاعيط لوحدي 

 عيطوا معايا لو مفيش في إيديكم حل 

:(

16

 

هونها يارب

-_-

15

 

التسامح مش مجرد كلمة  بنقولها للي خان ثقتنا وخزوقنا

علشان نموف أون من علاقتنا بيه 

.

التسامح ده إلزام  وجهاد نفس

.

بتلزم نفسك إنك تحترم غيبته بينك وبين نفسك 

طالما قلتله أنا مسامحك

.

ماينفعش بقى لما يجي على بالك 

تدعي عليه دعوات وحشة 

أو تتحسبن عليه

أو تفكر إزاي تنتقم منه 

بالعكس .. إنت بتلزم نفسك وتجاهد نفسك 

إنك تدعيله دعوات طيبة 

علشان تكسر شوكة الغضب والكراهية اللي جواك ناحيته

علشان تقدر تموف أون بجد

.

فــ طالما سامحت يبقى تمارس أصول التسامح بجد

-_-

14

 

دوام الحال من المحال

واللي كان مشغول بيك إمبارح

بقى مشغول بغيرك النهاردة 

وبقى بيقدملك بواقي إهتمام في وقته الفاضي

بعد ما كان يفضّي نفسه مخصوص علشانك

إييييييييييييه .. دنياااااااااااااا

-_-

13

 

الخوازيق  كلها عبارة عن خيانة

قد تختلف أشكال الخيانات

لكن الخوازيق واحدة 

:)

12

 

بحب إسمي أوي 

بحبه من الناحية الأدبية  مش من الناحية النفسية 

إسمي نوران

لو قريت أول تلات حروف من اليمين  هيبقى  نور

ولو قريت أول تلات حروف من الشمال هيبقى نار

ومرة صاحب دار نشر إشتغلت معاه زمان قالي

 بعد ما كنت هابطح راسه ببتاعة كدة محطوطة على مكتبه

 علشان مكنش عايز يديني حقي  

انتي ليكي من إسمك نصيب فاجر 

 إنتي نور لمن اهتدى .. ونار لمن اعتدى 

فــ عجبني  الوصف  من الناحية الأدبية 

:)

لكن من الناحية النفسية بحب إسم نورا أكتر 

و من أحب أسماء الدلع إلى قلبي 

بحب نونو  اللي وائل بيقولهالي

و نوناية اللي  خالد خطيبي الأولاني كان بيقولهالي

 وللتوضيح : بحب  الإسم حبا في اللفظة مش حبا في الشخص

علشان محدش بهيم يطلعلي زي الخازوق 

ويقولي إنتي لسة بتحبي خطيبك الأولاني لحد دلوقتي ؟

-_-

وبحب مرمر اللي بابا كان بيقولهالي

وبحب غننّ اللي ماما كانت بتقولهالي

وبحب بنورة اللي أخويا بيقولهالي

وبحب شاملي اللي اختي بتقولهالي

وبحب بطوط / بطوطة اللي إبني بيقولهالي

وبحب نون  اللي أي حد ممكن يقولهالي

**

وبحب لما حد يبعتلي ماسيدج أو إيميل 

إنه يذكر إسمي .. نورا 

يعني بحب وبقدر أوي 

لو حد بعتلي ماسيدج وابتداها مثلا بـ صباح الخير يا نورا 

 أومن فضلك يا نورا  كنت عايز كذا كذا كذا 

أو ببعتلك  يا نورا علشان خاطر كذا كذا كذا

**

و بتقفل أو لو بعت لحد صباح الخير يا فلان

ورد عليا وكتبلي صباح النور ... بس كدة 

ماقالش صباح النور يا نورا 

بحس إنه قليل الذوق 

مهما كان كلامه بعد كدة محترم وحميمي

أنا مبحسش بصدق كلامه بسبب إنه مقالش إسمي

-_-

 لأني بحس إن ذكر الإسم  أو كتابته  .. فيه حميمية 

وفيه مودة واحترام 

فـ بتضايق لما أعامل حد بـ حميمية ومودة واحترام

وهو يقابل ده بـ قلة ذوق وجليطة 

-_-

**

فــ شكرا لأي حد بيتعامل معايا بيذكر إسمي في وسط الكلام

أو في وسط الأحاديث المكتوبة 

إنتوا حلوين ومحترمين

:)

وأي حد مابيذكرش إسمي 

روح ياشاطر اتعلم الذوقيات 

وفن التعامل مع الأخرين

-_-

11

 

وأحب أشكر طارق

اللي عرّفني النهاردة  _من غير ما يقصد _ معنى ك*ط

يعني كسمها في طيزها

:)

10

 

مبسوطة علشانه أوي 

 ربنا يصلح حاله يارب 

:)

9

 

بتمناله الموت

-_-

8

 

الموت أهون من التوهة 

الموت أهون من الخيانة 

الموت أهون من السجن

الموت أهون من المرض

الموت أهون 

-_-

7

 

افعل ما شئت .. فـإنك ميت

-_-

6

 

مفيش حاجة في الدنيا مِلك

كله حق انتفاع فقط

-_-

5

 

فين أيام ما كنت بقعد أقرا وضهري للعالم

-_-

4

 

مش حاسة بحاجة 

أنا خِلصت خلاص

بقيت فاضياااااااااا .. تماما

-_-

3

 

مات لكم غالي ؟

تعبانين من فراقه ؟

طب فكروا بالطريقة دي 

لعلها تكون وسيلة لـ تهدئة نفوسكم المتبهدلة من الوحشة والفقد

**

تخيلوا معايا إن عندكم جوهرة 

 ألماسة 

كبيرة جدا وغالية فشخخخ

وإنتوا حاطينها في دولابكم

بتفتحوا الدولاب تشوفوها كل يوم 

بتستمتعوا بالنظر ليها

وبملمسها

وبـ نورها 

لكن .. وهي جوة دولابكم

معرضة للسرقة .. للضياع .. للخدش 

فـ بتعملوا إيه علشان تحافظوا عليها ؟

بسيطة ... هتأجروا خزنة في بنك 

وتروحوا تودعوا فيها الجوهرة دي 

وتمشوا وتسيبوا الجوهرة في خزنة البنك

إنتوا مش هتشوفوا الجوهرة تاني

ولا هتستمتعوا بملمسها وضيها الجميل

ولكن هتبقوا متطمنين إنها في آمان

وبعيدة عن الضياع والخدش والسرقة 

**

الغاليين  عليكم اللي ماتوا وفارقوكم

مش هتشفوهم تاني أبدا

ولا هتستمتعوا بأحاديثهم

ولا ضحكتهم 

ولا تهريجهم

ولا هتعرفوا تشاركوهم أخباركم

لكن هتكونوا متطمنين عليهم إنهم في مكان آمن

عند  ربنا

وهناك مفيش قلق عليهم تاني من مرض

من جلسة غسيل كلى مؤلمة 

من جلسة كيماوي تأثيرها عامل زي القنبلة اللي بتفرقع جوة الجسم

ومن دوا طعمه زي العلقم

مش قلقانين انهم يتكعبلوا في الرصيف  ويقعوا في الشارع

وتقع منهم أكياس حاجياتهم

مش قلقانين انهم يتكعبلوا في طرف السجادة وهما لوحدهم في البيت

ودماغهم تتفتح وهما عندهم سكر والجرح ما بيلمش

**

ماتوا  ؟ .. أه

واحشينكم ؟  ... جدا 

بس فكروا إنهم في آمان دلوقتي

مفيش خلاص قلق عليهم

إنتوا متطمنين 

هما في خزنة عند صاحب الخزن التي لا تضيع عنده الودائع

-_-

**

اللهم ارحم بابا وماما وعمو رفعت وعمو جلال

ارحمهم يارب واغفرلهم وسامحهم وادخلهم فسيح جناتك

وارحم كل امواتنا يارب 

:(

عياط كتير بقى 

2

 

من كام يوم كدة عملت إطعام

وكنت مبسوطة بـ الكمية  والمضمون

ونازلة من البيت فرحانة أوي 

إن الكمية كبيرة والحمد لله

ومضمون الوجبات محترم وشهي ويفرح أي حد

ومتوقعة  بقى إني هارجع من مشوار الإطعام ده

  وأنا طايرة من الفرح باللي عملته

 لكن للأسف كانت أسوأ مرة عملت فيها إطعام

أسوأ من الناحية النفسية 

رجعت البيت منهارة من العياط

وقبل ما أرجع البيت كمان

من وانا في العربية 

بعد ما الوجبات خلصت

فضلت أعيط في العربية عياط هستيري

لدرجة إن السواق ركن على جنب 

ومكنش عارف يهديني إزاي 

**

الموضوع حصل بسرعة 

 شاورلي على إتنين قاعدين 

وقالي فيه إتنين هناك أهم

قلتله تمام  ..اركن قريب منهم وأنا هانزل لهم

مجرد ما ركن العربية 

لقينا بدل الإتنين خمسة بيجروا على العربية 

أنا مالحقتش أنزل 

هما جم جري على العربية

معرفتش حتى أفتح الباب

فـ فتحت الشباك

وناولتهم  الوجبات اللي كنت حاطاها جانبي على كنبة العربية 

حقيقي معرفش إيه اللي حصل

لكن لقيت رجالة كتير جدا اتلموا على العربية 

ومدوا إيديهم جوة العربية من الشباك المفتوح ناحيتي

وأنا قعدت أوزع الوجبات

فجأة الوجبات خلصت

الوجبات اللي كنت نازلة من البيت 

 وفاكرة إن عددهم كبير ماشاء الله 

 خلصت في ثواني 

ولكن إيديهم 

_ أيادي الرجالة اللي مخدتش وجبات _

 فضلت ممدودة جوة العربية 

إيديهم سمرا .. خشنة .. قذرة .. كبيرة 

 أنا عارفة إن ده وصف مخل جدا لإيديهم

لأنه وصف سطحي جدااااا 

وقد يبدو إنه  وصف عنصري 

وقد يظهر منه إني بتنمر عليهم

لكن لأ .. مش بتنمر ولا بعنصر عليهم

أنا كنت شايفة إن كل كف إيد  من دول 

وراه قصة شقا وفقر وغربة ونوم في الشارع  وقلة أكل 

لأنهم مكنوش ناس مشردين بمعنى الكلمة 

دول بيبقوا رجالة جايين من محافظاتهم للقاهرة

 علشان يشتغلوا في أعمال البناء

فبيقعدوا في الشارع

ولو مقاول بيبني عمارة ولا حاجة 

تلاقيه جاي بعربية نص نقل 

ويختار منهم كام نفر على حسب حاجته

وهما وحظوظهم بقى 

 يا يبقوا من المختارين .. ويضمنوا يومية ولقمة ومكان يناموا فيه

أو  يبقوا من الغير مختارين  .. فـ يفضلوا قاعدين في الشوارع 

:(

المهم إن بعد ما بعدنا عنهم بالعربية 

وحتى بعد ما روحت البيت

فضل  المنظر يطاردني

منظر إيديهم الممدودة

وصوتهم وهما بيقولوا بلهجات مختلفة 

أنا مخدتش

 أنا مخدتش والله 

 أنا مخدتش 

أنا مخدتش يا أستاذة 

أنا مخدتش 

أنا مخدتش 

أنا مخدتش

أنا مخدتش

أنا مخدتش

 أياديهم  الممدودة السمرا 

 الكبيرة 

 الخشنة 

 القذرة 

 الطيبة 

 الفقيرة 

 المحتاجة 

وصوتهم  اللي بيصرخ

أنا مــخــدتـــش

**

المنظر بيطاردني وكأنه لعنة أو كابوس

بعيط من ساعتها

حسيت إن مفيش فايدة 

مفيش حاجة مكفّية 

مفيش خير كافي يشبّع كل الناس

ويقيهم  شر الحاجة والعوز

**

بكتئب أوي 

وبرفض الأكل

وبرفض الكلام

وبستكتر كل لقمة ممكن أكلها بعد ما بشوف الناس دي

و بغرق في حالة احتقار لأي حد قادر ياكل  / يفرح / ينيك /  يتفسح

وفي ناس في نفس البلد اللي هو فيها / الشارع 

مش لاقيين لقمة 

**

وتيجي واحدة عرصة تقولي 

إنتي بس تلاقيكي مكتئبة علشان اتطلقتي 

طلاق إيه يا منيوكة اللي يخليني أكتئب ؟

!!!

**

انزلوا الشوارع شوفوا بلدكم فيها إيه 

:(  -_-

عايزة أعيط

عايزة ده إيه ؟!! .. أنا بعيط فعلا

:(

1

 

مش عارفة إيه لازمة الكتابة 

طالما مش هاقدر أكتب اللي جوايا بمنتهى الحرية ؟

!!!

مش قادرة أوصف إحساسي

بـداري 

بتعولق

بـ موّه 

بلف وأدور 

بعمل كل حاجة غير إني أقول وأعبر بصراحة  عن اللي جوايا

فــ كسم الكتابة اللي مش جايبة همها دي 

نقفلها أحسن ونقوم نعيط في الحمام زي الحريم  

-_-