مساء الخير
صحيت من النوم على كف ريان الصغنن
وهو بيخبط على كتفي تخبيطات متتابعة
فـ صحيت مخضوضة
وبعدين لما شوفته واقف جنب السرير
فـ قومت واتعدلت كدة
وروحت رافعاه وشايلاه ومقعداه في حضني
وانا بقوله أيوة يا رينو
انت صحيت يا حبيبي ؟
فقالي : أه
قلتله عايز حاجة ؟
ريان عنده طريقة كدة لما يعوز حاجة بيقولها بنبرة سؤال
يعني مثلا
أنا جيباله شوية لعب كدة عندي علشان لما يجي يلعب بيها
فـ لما يعوز يلعب يقولي بنبرة سؤال
أنا عاوز ألعب باللعبة دي ؟
في الأول ماكونتش فاهمة طريقته
وكنت فاكراه بيسألني فعلا
فـ أجاوبه وأقوله معرفش يا رينو .. إنت عايز تلعب بيها ولا لأ ؟
فـ يقوم يقول تاني بنبرة السؤال
أنا عاوز ألعب باللعبة دي ؟
فـ انا استغرب اكتر
لحد ما مامته فهمتني
أنه لسة مش مدرك ازاي يظبط نبرة كلامه
.
المهم
فـ لما صحاني من النوم
وبسأله إن كان عاوز حاجة
فقالي بنبرة سؤال
أنا جعان ؟ انا عاوز أكل ؟
فضحكت وقلتله أيوة .. إنت جعان وعاوز تاكل
يلا نقوم نعمل احلى فطار لـ رينو الجميل
فـ بسأله وانا بلبس الشبشب في رجلي
هي ماما صحيت يا رينو ؟
فـ قالي بنبرة سؤال برضه
ماما نايمة ؟
فقلتله طيب يلا تعالى نعمل احنا فطار ونسيبها نايمة
سألته واحنا رايحين ناحية المطبخ
عاوز تاكل ايه ؟
فقالي بنبرة سؤال
عاوز اكل بسكوتة سمكة ؟
( يقصد نوع من انواع البسكوت المملح على شكل سمك صغنن )
فـقلتله بنبرة حزينة كدة
ده خلص يارينو
المرة الجاية لما تيجي هاجيبلك منه تاني إن شاء الله
بس أنا عندي بسكوت على شكل أسد وزرافة وحيوانات كتييييير
إيه رأيك ؟ .. أجيبلك منه ؟
فـ فرح أوي وقالي بنبرة سؤال
جيببيلي منه ؟
دخلنا المطبخ سوا
جيبتله البسكويت وحطيتله شوية في طبق
وقعدته في الصالة
وشغلتله قناة عليها كارتون
وسيبته ياكل البسكويت
لحد ما اعمله الفطار اللي الدكتور قايل عليه
المهم وانا في المطبخ بحضر الحاجات
لقيته جاي وماسكني من رجلي بكفه الصغن
فـ روحت نازلة مقرفصة قدامه
علشان أكون في نفس مستوى طوله
وبسأله : إيه يا رينو .. عاوز حاجة يا حبيبي ؟
فـ راح ماسكني من وشي بكفوفه الصغننة
وهو بيهز راسه بالإيجاب
وراح مديني بوسة بشفايفه المتلحوسة بـ فتافيت البسكويت
وقالي أنا بحبك يا خالتو نورا
انتي حلوة زي الفيل أبو زلومة ده
وراح فاتح كفه الصغنن
وموريني في إيده بسكوتة على شكل فيل أبو زلومة
متاكل منها الزلومة وفاضل منها جسم الفيل
😊😍😊
______________
إنـــتـــهـــى
شكر خاص للصديقة مرام
اللي عملت البسكوت بنفسها
بسكوت من غير سكر مخصوص علشان ريان
علشان مرضى السرطان بيكونوا ممنوعين من الحلويات
وممنوعين من السكر عموما
3 comments:
اسألكم الدعاء بالشفاء العاجل لـ ريان ولـ آدم ولكل الأطفال يارب
إيه ده ؟ أنا إسمي طلع في التلافزيون ههههههههههههههههههههه
العفو يا نورا ده اقل حاجة اقدر اشارك بيها
والف هنا وشفا على ريان وربنا يشفيه يارب هو وكل مريض
بس على فكرة بقى ريان ده بيفهم
انتي عارفة ان البسكوت اللي على شكل فيل انا حاطة فيه قدر بسيط من العسل الأبيض ؟
فعلشان كدة اي بسكوتة على شكل فيل هتكون بالنسبة لريان حلوة ومسكرة شوية عن باقي الاشكال
وماتقلقيش ده عسل ابيض طبيعي ومش مخلوط باي حاجة ولا فيه سكر ومش مصنع زي العسل اللي في المحلات
ده من المنحل بتاع عم جوزي يعني عسل مضمون وبأكل منه أولادي
وانتي عارفة يوسف عندي مريض سكر من وهو 6 سنين
فبرضه بكون حريصة انه ماياكلش اي حاجة فيها سكر ابيض
المهم أنا مش متخيلاكي واقفة في المطبخ بتحضري فطار زي باقي البشر كدة عادي ههههههههههههه
بجد ؟!! لأ ماكنتش اعرف انه فيه عسل
يعني ريان ماكذبش لما ميزني و قال اني حلوة زي الفيل أبو زلومة
:)))))))))))))))))))))))))))))))))
ألف سلامة على يوسف .. ربنا يعافيه يا رب ويعفو عنه
وحياتك وقفت زي الكلبة في المطبخ احضر الفطار
-_-
بس ثانكس جاد .. مامة ريان صحيت وهي حاليا اللي بتحضرله الغدا
:)))))))))))))))
تسلم إيدك يا مرام والله على فكرة البسكوت دي
:*
Post a Comment