حكايات الحالات

 

منمتش من إمبارح 

والنهاردة كان عندي مشوار بحث حالة 

وأساسا الاسبوع اللي فات ده 

كان مليان مشاوير وارهقت فيه جدا

ونومي فيه سويعات قليلة 

..

المهم 

صالة البيت اللي انا روحته النهاردة 

 تقريبا  فاضية 

مفروش على الأرض حصيرة بلاستيك

زي الحصير اللي بيتفرش برة الجوامع وقت صلاة العيد 

وفيه كام شلتة قطن  محطوطين  على الارض 

..

المهم الست دخلت تعملي شاي 

وانا قاعدة على الأرض .. على شلتة من شلت القطن 

ومن كتر التعب اللي أنا فيه

قلت لما أريح جسمي سيكا لحد الست ما تجيبلي الشاي 

 فــ قومت من على الشلتة .. وغيرت وضعية جسمي 

خليت الشلتة كأنها مخدة وحطيت راسي عليها 

وجسمي كان على الارض / الحصيرة 

وخليت ضهري للحيطة  

..

انا  لما فوقت  

لقيت على جسمي إسدال صلاة  متغطية بيه

وفيه كوباية شاي متغطية بطبق

 محطوطة على طبلية قريبة مني 

والصالة هس هس 

ببص في الساعة لقيتها 4 إلا تلت العصر 

وأنا لما وصلتلهم كانت الساعة تقريبا حداشروشوية 

يعني أنا تقريبا نمت بتاع اربع ساعات وشوية

..

لما ندهت للست 

بنتها الصغيرة طلعت جري 

وبعدين راحت واقفة جنب الحيطة وهي مكسوفة

وقالتلي  وهي بتضحك ضحكة مكسوفة كدة 

 امي جاية بس بتعمل اكل 

فــ بنكش البنوتة  وبقولها : ينفع تسيبوني نايمة كل ده ؟

فـ البنت بصتلي وهي مستغربة وقالتلي  

انتي اللي نمتي .. احنا ماسبنكيش 

:))

.

الست طلعت  من جوة  وهي مبتسمة  وقالتلي 

 نوم العافية يا أستاذة 

ماتأخذنيش اني حطيت عليكي الاسدال 

بس قلت أستر جسمك وانتي نايمة 

ابتمست وقلتلها : الله يسترك دنيا واخرة 

بس كنتي صحيني 

قالتلي : لقيت شكلك تعبانة  فقلت اسيبك ترتاحي 

وانتي هنا في بيت اختك برضه 

قلتلها : طبعا بيت أختي 

واسـتأذنت أدخل الحمام  أغسل وشي 

..

بعد ما خرجت من الحمام 

بقولها  تعالي  بقى نتكلم في المهم 

فقالتلي :  قبل الكلام تعالي ناكل لقمة سوا 

بتقول كدة وهي كانت بالفعل بتفرش الطبلية

 وبتحط عليها طبق بيض مقلي وكام رغيف عيش متأمرين 

ودخلت تجيب طبق فيه طماطم وخيار 

وطبق  كبير فيه رز أبيض

وندهت عيالها .. البنوتة  وولد تاني اكبر منها شوية 

..

قعدت معاهم على الطبلية 

فـ حطت جزء من البيض المقلي على الرز 

وحطت طبق الرز قدامي 

وقالتلي : معلهش حاجة كدة على ماقوسم 

:)

.

.

.

مش مهم باقي اللي حصل 

المهم إني قضيت وقت 

من أحلى الاوقات _ إنسانيا _ في حياتي 

:))

..

ويجي واحد مش فاهم حاجة 

يسألني  إنتي بتحبي الحالات أوي كدة ليييييييه ؟

!!

-_-

..

اللهم ارزق كل عبادك ووسع عليهم يا رب

اللهم فك كرب كل مهموم يا رب

اللهم استخدمني واستعملني في الخير ولا تستبدلني أبدا يا رب

_______________

انـــتـــهـــى