رغم انكم اساسا بضان
ومابتشاركوش
وانا مكونتش ناوية أقولكم اساسا
بس قلبي العِلء قال لي قومي يا بت قوليلهم برضه
ويبقى اسمك عملتي اللي عليكي
علشان الدال على الخير كـ فاعله
وأنا طمعانة أخد حسنات زيادة
لذلك انا جاية النهاردة
وأقولكم إننا بدأنا الحمد لله نجهز لـ شنط رمضان
فـ اللي حابب يشارك .. يبلغني
واللي فيكم هيقرا البوست ده
وهو يقدر ماديا انه يشارك
بس مش هيشارك برضه
علشان هو عِلء أو بخيل أو كسلان
أو أيا كان المبررات اللي هيوجدها لنفسه
فـ يارب تجيله فسفوسة في أظؤظته
ما يعرف يقعد عليها
-_-
وخدوا بالكم .. أنا دعواتي مستجابة
واسألوا عليا برة
اللي مجرب دعواتي هايقوللكم دعوتها مستجابة
وبتجيب الكوكب كله الأرض لو حبت
فـ اتقوا شر دعواتي
وشاركوا معايا بالحسنى أحسن
هذا .. وقد أعذر من أنذر
-_-
____________
نيجي للجد بقى
زي ما هو مبين في الصور المنشورة
دي مكونات شنطة لأسرة _ متعففة _ كبيرة العدد
الشنطة راحت لأسرة عدد أفرادها 6 أفراد
الشنطة مكوناتها الآتي
خمس أكياس مكرونة .. الكيس كيلو
وكل كيس نوع مختلف
كيسين شعرية .. الكيس كيلو
تلات أكياس لسان عصفور .. الكيس 450 جرام
خمس أكياس رز .. الكيس كيلو
تلات أكياس سكر .. الكيس كيلو
كيس فاصوليا
كيس لوبيا
كيس عدس أصفر
كيس دقيق .. كيلو
تلات برطمانات صلصة
برطمان مربى تين
برطمان مربى فراولة
برطمان عسل أبيض
برطمان عسل اسود
برطمان طحينة
علبة سمنة كبيرة .. 2 كيلو
قزازة زيت تحمير كبيرة
قزازة زيت ذرة كبيرة
قزازاة خل
تلاتة باكيت مكعبات ماجي
تلات أكياس ملح
علبة حلاوة طحينية كبيرة
اتنين باكت كريم كراميل
اتنين باكيت جيلي فراولة
باكو شاي
خمس علب جبن ابيض .. كل علبة طعم مختلف
وطبعا مش هانسى الأطفال اللي في الأسرة
فـ عملت حسابهم وجيبتلهم
خمس علب حلويات
كل علبة نوع مختلف
هوهوز شيكولاتة .. وهوهوز فراولة
و يفر فريسكا ..واولكر بالتمر
وكيك ديلايت بالشيكولاتة
الشنطة دي اتكلفت 2885 جنيه
ده هيبقى اقصى سعر للشنطة
ممكن الشنطة تكون سعرها اقل
لو جيبت مكونات أقل وكميات أقل
لأسر عدد أفرادها أقل
أغلب الأسر اللي بتروحلها الشنط
أسر متعففة
يجي واحد يسألني يعني إيه متعففة يا نورا ؟
يعني أُسر تحسبهم أغنياء من التعفف
أُسر ما يبانش عليهم الفقر
ودول بيبقوا أصعب من الأسر الفقيرة
لأن الأسر الفقيرة ... ظروفهم المادية المعدومة
واضحة جلية زي ضوء الشمس
وأغلبهم بيجيلهم شنط رمضان من عدة جهات
لكن الأسر المتعففة
غالبا محدش بيحس بيهم ولا بـ ظروفهم
ولا بيجيلهم أي مساعدات
ودول اللي أنا بحب إن الشنط توصلهم
فـ اللي فيكم يحب يشارك أهلا وسهلا بيه
وربنا يجازيه خير ويوسع عليه يارب
واللي بيقرا البوست وقادر أنه يشارك
بس برضه هو بضان ورخم وبخيل
ومش عايز يشارك
فـ ده مالهوش عندي غير
" يارب الفسافيس تهجم على أظؤظتك يا بعيد ما تعرف تقعد ولا تنام منها "
-_-
وهو ده النظام عندي بعد كدة
اللي مش هيشارك معايا في الخير
هادعي عليه بـ الفسافيس
-_-
وفي النهاية أحب أشكر صديقي
( مش هاقدر أقول اسمه علشان الثواب وكدة )
اللي هو اتبرع بـ اول دفعة من شنط رمضان
والشنطة اللي انا بتكلم عنها دي
كانت من مشاركته المادية معانا
ربنا يجازيه خير يارب
ويوسع عليه ويزيده من نعيمه
ويكتبه في ميزان حسناته
وييسرله أموره كلها يارب
ويرحم والده ويغفرله ويدخله فسيح جناته
اللهم آمين
شكرا يا صاحبي يا ابن عمو رفعت
( عبيطة أنا علشان اقول إسمك ؟!! .. أنا هاقول إسم باباك .. نيهاهاهاهاع )
😁😁😁
***
اللي حابب يشارك
_ تجنبا لظهور الفسافيس في أظؤظته _
يسيب لي تعليق مش للنشر
فيه اسمه ورقم تليفونه وانا هاتواصل معاه
شكرا
-_-
________________
إنــتــهــي
No comments:
Post a Comment