.jpg)
الدور التاني .. شقة تسعة
الأب سالم
والأم نهال
والبكرية مليكة
والصغنن محمد
أو كما يطلقون عليه دؤدؤ
**
الدور التالت .. شقة ستاشر
الأب عبد الحليم
الأم زعفرانة
البكري يوسف
الأوسط يس
الصغنن يحيى
وهناك أقاويل إن كان عندهم بنت خلفوها بعد يوسف
كان إسمها ياسمين
بس ماتت وهي عندها سبع سنين
**
سالم ونهال
هما في الأصل من حي الزاوية الحمرا
كانوا جيران قبل ما يتجوزوا
ويستقروا في شقة تابعة للإسكان الإجتماعي
**
عبد الحليم وزعفرانة
في الأصل من أسوان
قبل ما يستقروا في القاهرة في حي بولاق الدكرور
وبعد كدة لما استلموا شقتهم في الإسكان الإجتماعي
سابوا شقة بولاق
**
نهال وزعفرانة
ربات بيوت
تعليمهم متوسط
اتصاحبوا على بعض لما نهال سكنت في العمارة
نهال كانت عروسة جديدة
وزعفرانة كانت ساكنة قبلها في العمارة بكام سنة
زعفرانة إمرأة خمسينية
ونهال إمرأة أربيعينية
**
سالم كان بيشتغل شيف مطبخ
وهو خاطب نهال جاله عقد عمل في الإمارات
كان بيشتغل شيف في سجن الوثبة في أبو ظبي
ولما عقده خلص
رجع مصر واتجوز نهال
واشتغل في كذا مطعم
لحد ما جاله عقد لـ شيف مطبخ
في إحدى المستشفيات الخاصة
**
عبد الحليم كان بيشتغل موظف
في إحدى الجرائد الحكومية الكبرى
لما قابلت زعفرانة من كام سنة
وقالتلي ان جوزها بيشتغل في الجورنال
عنيا لمعت وقلتلها بجد ؟ !! هو صحفي ؟
فــ هزت راسها بالنفي
وقالت بسرعة وكأنها بتنفي تهمة
لأ لأ .. صحفي إيه
ده مجرد موظف في الأرشيف
ثم أردفت بــ يأس
هو لو كان صحفي كان ده بقى حالنا ؟
**
دؤدؤ .. أو محمد
من سن يس ويحيى
وإن كان عمره أقرب لـ عمر يحيى
فــ هو ويحيى أصحاب جدا
ومش بيفارقوا بعض غير وقت النوم
**
يوسف
خريج معهد خدمة إجتماعية
ومش لاقي شغل ثابت
شوية يشتغل في سوبر ماركت
يرص بضاعة
وشوية يشتغل عامل توصيل طلبات لمطعم فراخ
**
مليكة
نسخة من أمها نهال
نفس الملامح
نفس الشعر
ونفس الجسم المدكوك الكيرفي
مليكة في أولى ثانوي
**
سالم اترفد من شغله من تلات شهور
علشان عمل مشكلة مع زميله
وضربه
فــ طبعا المستشفى قالتله بالسلامة إنت يا سالم يا أخويا
مابنشغلش عندنا بلطجية
سالم رجل خمسيني
**
عبد الحليم كمل 60 سنة
وطلع على المعاش من شهرين
**
يس
لما شوفته للوهلة الأولى إعتقدت إنه مريض بالسرطان
بسبب رأسه الحليق
إعتقدت إن شعره واقع بسبب جرعات الكيمو
ولكن الحقيقة
إن باباه الأستاذ عبد الحليم
علشان يوفر أجرة الحلاق
علشان المعاش بقى على الأد أوي
قرر إنه يحلق لولاده في البيت
فــ بدأ بـ يس
فـ لما الحلقة باظت منه
فقرر إنه يشيل شعره كله وخلاص
فمن ساعتها ويس بيلبس هودي على دماغه
علشان يداري رأسه الحليق
علشان محدش يفتكر إنه عيان
.
.
.
زعفرانة لما لقت إن عبد الحليم معرفش يحلق لـ يس كويس
والنتيجة إن يس بقى شبه مرضى السرطان
إدت فلوس ليوسف ويحيى
وقالتلهم إنزلوا لـ عمكم طه الحلاق
خليه يحلقلكم
وقعدت حوالي إسبوع
تتحسبن على عبد الحليم
كل ما تشوف راس يس الحليقة
وماوقفتش حسبنة على عبد الحليم
إلا لما راس يس بدأت تنبت
والشعر بدأ يظهر
**
نهال وزعفرانة
مش طايقين قعدة رجالتهم في البيت
**
نهال وزعفرانة
في الشهر الأخير
قرروا إنهم لازم يعملوا حاجة
تحسن حالتهم المادية
وتحت شعار
" ما يجيبها إلا ستاتها "
عملوا إجتماع رباعي عند سالم ونهال
الإجتماع ضم نهال وسالم
وزعفرانة وعبد الحليم
نهال وزعفرانة
عبروا عن مشاعرهم
إنهم مش مرتاحين لقعدة رجالتهم في البيت كدة
وعليه قرروا إنهم هم الأربعة لازم يعملوا حاجة
فكان قراراهم
إن سالم ونهال وزعفرانة
هيعملوا أكل بيتي
وعبد الحليم هيعمل بيدج على النت
يرفع عليها صور الوجبات
وياخد الأوردرات
ويوسف يوصل الطلبات للمنازل
ودؤدؤ ويس ويحيى
ينزلوا يشتروا الطلبات من السوق
ومليكة عليها تغليف الوجبات
**
المشروع كان صعب في الأول
ومكنش جايب همه
ولا كان جايب مصاريفه
وكانوا خلاص قربوا يستسلموا لليأس
لحد ما جت جارتهم الجديدة
مدام نورا
أو
" مُـزة العمارة "
كما أطلقت عليها صفاء
جارتهم في الدور الرابع شقة تمنتاشر
**
مدام نورا
القاطنة في الدور الأرضي شقة أربعة
وعُرف عنها أنها أرملة بدون أولاد
و إن كان هناك أقاويل أنها مطلقة لأنها عقيمة لا تنجب
ومدام نورا يا أفاضل
مكنش ليها في الطبخ ولا الطبيخ ولا تحب وقفة المطبخ
وفي يوم ومدام نورا واقفة على إيد العمال
اللي بيشطبوا شقتها
عدت عليها نهال وزعفرانة
يرموا السلام والتحية
ويتعرفوا على الجارة الجديدة .. الوحيدة
اللي مالهاش راجل
ماهو لو كان ليها راجل
مكنش سابها تقف لوحدها على إيد العمال
وتباشر الشغل بنفسها
.
.
.
وبعد التحية والسلام والتعارف
حصلت الكيميا
ونورا حبت نهال وزعفرانة
ونهال وزعفرانة حبّوا نورا
ولأن نهال أصلها من حي الزاوية الحمرا يعني حي شعبي
ولأن زعفرانة أصلها من أسوان
فـ الإتنين مشتركين في صفة تجمع بين الأحياء الشعبية وبين أسوان
ألا وهي ..الكرم
فـ الإتنين بعد ما طلعوا وسابوا نورا واقفة مع العمال
نورا بعد ساعة زمن لقت مليكة
نازلة ومعاها صنية
وبتقولها ماما وطنط زعفرانة
باعتين ده لحضرتك إنتي والعمال
و " ده " كان عبارة عن ساندوتشات حواوشي صُنع بيتي
وبتاع بالعجوة
نورا وزعت الساندوتشات على العمال
وهي خدت لنفسها نص رغيف حواوشي
وكان الحواوشي طعمه ولا أروع
نورا عملت دور شاي للعمال
وحطت جنب الشاي البتاع أبو عجوة
البتاع اتنسف
والعمال أبدوا إعجابهم بالبتاع وبالحواوشي
**
نورا تستقر في بيتها الجديد
ونهال وزعفرانة
كل كام يوم يعدوا عليها وهما راجعين من السوق
يقعدوا معاها شوية
نورا تعملهم شاي وتقدم جنب الشاي كيك جاهز
مش هي اللي عملاه
لأنها مبتعرفش تعمل كيك
نهال تقولها أنا هاعملك كيكة وهابعتهالك مع مليكة
وزعفرانة تقولها وأنا هاعملك " جاكود " أسواني
**
نورا تعرف إن سالم جوز نهال أصلا شيف
فــ تقع في عرض نهال وتسألها
هو ممكن جوزك يعملّي أكل وأشتريه منه ؟
نهال تبص لنورا وكأن نورا جاتلها من السما
وقالتلها أه طبعا ممكن
ده أنا وزعفرانة وسالم بنعمل فعلا أكل بيتي
وبنبيعه على النت
**
نورا تكون الزبونة الدائمة عند نهال وزعفرانة
نورا تعزم أصحابها
ونهال وزعفرانة هما اللي يطبخوا
أصحاب نورا يسألوها الأكل حلو أوي
جايباه منين
( هما عارفين إن أكيد طبعا مش نورا اللي طابخة )
فــ تقولهم .. جاراتي عاملين مشروع أكل بيتي وأنا بشتري منهم
فــ اصحاب نورا ياخدوا رقم التليفون
ويبقوا هما كمان زباين عند نهال وزعفرانة
**
نورا تموت
ولأنها كانت وحيدة
ومالهاش حد
تسيب وصية عند المحامي
إن شقتها تكون من نصيب نهال وزعفرانة
ولأن شقة نورا كانت دور أرضي
وفيها جنينة صغننة
فــ الشقة كانت ممتازة لمشروع مطعم
فــ نهال وزعفرانة وسالم وعبد الحليم
يحوّلوا الشقة لمطعم
ونهال وزعفرانة يقترحوا إنهم يطلقوا عليه إسم
مطعم النور والياسمين
تخليدا لذكرى نورا جارتهم
وياسمين بنت زعفرانة
لكن سالم وعبد الحليم
يقولولهم نورا وياسمين إيه بس ؟
ما بلاش أسامي أموات و نكد وغم بقى
فــ يتفقوا في الأخر ويسموا المطعم
مطعم الجيرة والعشرة
**
وبعد سنة
الحي يعمل حملة تفتيش مفاجئة على المساكن
ويكتشف إن المطعم مخالف
لأنه معمول في حي سكني
وإن الشقة الأرضي أساسا فيها توسيعات مخالفة
فــ المطعم يتقفل
و يسحبوا الشقة من نهال وزعفرانة
ويوقعوا عليهم غرامة مالية كبيرة
-_-
___________
إنـــتـــهـــى
.
.
.
إيه يا قرائي الأعزاء ؟
اعتقدتوا إن النهاية هتبقى سعيدة ؟
آني آسفة
.jpg)
No comments:
Post a Comment