افتكرت النهاردة حاجة كدة
وإحنا صغيرين أنا وإخواتي
كنا لما نيجي نشرب حاجة ساقعة
كنا نخبط كوبايتنا في بعض
ونقول : في صحتك .. ونضحك أوي
ونقلد المشاهد اللي كنا بنشوفها في الافلام والمسلسلات
لما تلاقي الممثلين يجوا يشربوا خمرة
فـ افتكر إن لو كان بابا أو ماما شافونا بنعمل كدة يزعقولنا
ويقولولنا حراااام
وكان بالنسبالهم إننا نشبه الحاجة اللي احنا بنشربها
بمشروب حرام زي الخمرة
فـ ده تصرف يندرج تحت بند الحرام
..
كبرت شوية وبقيت في ثانوي أوجامعة
وكنت عند واحدة صاحبتي في بيتها
وبنشرب حاجة ساقعة
وأنا وهي هرجنا سوا وخبطنا كوبايتنا في بعض
وقلنا : كاسك .. في صحتك
وضحكنا
كانت ماماتها داخلة علينا
ولقيت مامتها دي بتقولنا وهي بتزعق
بتعملي ايه منك ليهااااا ...حراااااااااام
حرااااام كدااااا
أنا وقتها فضلت باصة لمامتها مذبهلة أوي
مش علشان مامتها بتزعقلنا
ولكن لاني اكتشفت
إن الامر ده موجود في الامهات كلهم
وحسيت أن هما نازلين كلهم بـ سيستم واحد
وحسيت إنهم مأفورين أوي
.
.
كبرت شوية وبقيت أم
ومرة بشرب أنا وشكشوكة حاجة ساقعة
ولقيته بيخبط كوبايته في كوبايتي وبيضحك
وبيقولي في صحتك يا مامي
فــ روحت زعقتله فجأة
وقلتله : حراااااااااااااااااااااااااام
حراااااام كداااااا
-_-
:)))))))
No comments:
Post a Comment