Killing Noon

 

عايزة احكي موقف حصل النهاردة

بس علشان احكيه لازم أمهد له

وأحكيلكم القصة من الاول  

.

من كام سنة كدة 

حسام رشحلي مسلسل أجنبي اتفرج عليه

 اسمه 

killing eve

البنت اللي في الصورة هي البطلة

والصورة لمشهد من المسلسل نفسه

والبنت دي كانت مشهورة في المسلسل

 بـ لبسها العجيب وبيجاماتها الأعجب

( زي ماهو واضح في الصورة )

حتى ان حسام كان بيأفّـي عليا 

ويقلش وبيقولي إني شبهها

بسبب بيجامتها الملونة 

وبسبب شخصيتها  في المسلسل 

( كانت طالعة في دور قاتلة مأجورة على ما أتذكر )

😈😂😁

.

المهم

رجوعا للحاضر بقى 

ريان ووالدته عندي من امبارح 

واللي مش عارف مين ريان 

ممكن يرجع للبوست ده 

.

المهم ان ريان ومامته عندي من امبارح

علشان ريان عنده تحاليل وآشعة المفروض يعملها

خلصنا جزء منها إمبارح 

 وكان لسة فاضل  اشعة يعملها النهاردة 

خلصنا النهاردة والحمد لله ورجعنا على البيت

.

أنا قاعدة في الصالة برة باخد نفسي من المشوار 

وبراجع الحسابات

وبفكر في شوية ترتيبات لبعض الحالات التانية 

وريان ومامته جوة في الأوضة بيغيروا هدومهم

شوية ولقيت  مامة ريان طالعة ومعاها كيس 

وبتقولي يا ريت تقبلي مني الهدية البسيطة دي  يا نورا 

أنا طبعا اندهشت جدا وإتأثرت أوي باللفتة الطيبة 

ولسة معرفش إيه اللي جوة الكيس 

وقلتلها إيه ده وباخد منها الكيس وبفتحه

وعنيكم ما تشوف إلا النور 

بمجرد ما فتحت الكيس وعرفت اللي جواه 

اتنططت زي العيال الصغيرة 

وقعدت أعيط بقى 

.

وعلشان تفهموا رد فعلي  كان إيه سببه 

هنرجع سوا ليوم الجمعة 12 يونيو 

 ريان كان عنده جلسة كيمو يوم السبت 13 يونيو 

فهو ووالدته بيجولي من طنطا قبلها بيوم ويباتوا معايا 

المهم  يوميها كنا قاعدين بليل وبندردش

ومعرفش ايه فتح الحوار  ومامة ريان علقت على بيجاماتي

وانها لاحظت اني بلبس في البيت بيجامات بس .. مش جلابيات 

وإني بلبس بيجامات كاملة 

مش تيشيرت على بنطلون وخلاص 

فقلتلها إني فعلا بحب البيجامات اوي 

وبحب البيجامات الملونة 

والكلام خد بعضه

فـ روحت حكيالها على البنت اللي كانت طالعة في المسلسل

وإن صديقي كان بيتريأ عليا بسبب إني بفكره بالبطلة 

بسبب بيجاماتي الملونة 

( اللي أنا حكيالكم عنها فوق دي )

وطلعتلها الصورة من جوجل ووريتهالها

فقعدت تضحك وتقولي فعلا والله شبه بيجاماتك وبتاع

.

.

رجوعا للنهاردة بقى 

فتحت الكيس 

ولما عرفت اللي جواه اتنططت زي العيال وقعدت أعيط

لأني لقيت مامة ريان  جيبالي بيجاما ملونة

  نفس سكة بيجامة البطلة بتاعة المسلسل

وبتقولي : لقيتها في محل عندنا في طنطا 

فافتكرت حكايتك مع البيجامات

 وبطلة المسلسل اللي قلتيلي عليها

فقلت اجيبهالك .. يا رب المقاس يطلع مظبوط 

.

فقعدت أعيط متأثرة جدا بالهدية الحلوة خالص دي

وهي عيطت  على رد فعلي 

وبتقولي أنا مش متخيلة أنك تفرحي أوي كدة 

بالهدية البسيطة دي 

قلتلها بسيطة إيه ؟

!!!

دي هدية مش بسيطة خالص

أولا لأني بحب البيجامات بشكل عام

وثانيا إني بحب البيجامات الملونة بشكل خاص

و ثالثا كونك إنك أساسا تاخدي بالك 

من تفصيلة صغيرة بحكيلك عنها في كلامي

فـ تقومي تفتكريها وتجبيبهالي هدية .. فـ دي عندي بالدنيا

.

.

أنا من ساعتها وأنا بعيط 

ومش عارفة أوقف عياط

يعني مواقف زي دي انتوا مش متخيلين بتعمل فيا إيه

أنا بحس إني بتفشفش 100 حتة 

من فرط اللطف والحب اللي بتغمر بيهم من الناس

.

وإن ذكرنا هدية مامة ريان

أحب أفكركم بـ هدية  آدم حبيبي ليا

:)

.

ودي يا جماعة صورة البيجاما

 اللي جاتلي هدية من مامة ريان

:)

⇩⇩⇩

😊😊😊

.

.

وبالمناسبة دي 

أنا عايزة أشكر الجنود المجهولة اللي ورا حب الناس ليا

وهما فاعلين الخير اللي بيتبرعوا بفلوسهم

وعايزة أقولهم 

 لولاكم أنا  ماكونتش عرفت أعمل أي حاجة للحالات

وإن كنت أنا اللي في وش المدفع 

وبستقبل الحب ده كله من الحالات

فـ  إنتوا _ فاعلين الخير _ أولى بكل الحاجات الطيبة دي 

انتوا حبايبي والله .. وعلى راسي من فوق

ولو محدش حاسس بيكم

ولا انتوا ظاهرين ومتشافين للحالات

فـ أنا شايفاكم ومقدرة مجهودكم اللي بتعملوه 

علشان تدبروا مبلغ للحالات

وبتيجوا على نفسكم أد إيه علشان نلحق حالة 

شكرا من كل قلبي ليكم والله

ربنا يعزكم  يا رب

ويكتب كل الخير اللي بتعملوه في ميزان حسناتكم

😊😊😊

___________________

إنـــتـــهـــى