عندي نظرية برضه
مش عارفة أسميها إيه
بس هي متعلقة بالمصائب العامة
بحس إن المصائب العامة
بتكون أخف وطأة من المصائب الخاصة
بمعنى إيه ؟
يعني مثلا في الحروب
ممكن تلاقي أُسر كتير .. مات منهم أفراد في الحروب دي
فــ دي مصيبة عامة
البلد كلها حزينة
لأن غالبا كل بيت هتلاقي فيه شهيد واحد إن مكنش أكتر
فتحس إن الناس بتتماسك أسرع
وتخطي مصيبتها أسرع
لأن مصيبتها عامة
وإن اللي في بيتي .. موجود في بيتي جاري
موجود في بيوت البلد كلها
أو إن البيوت كلها اتهدت بسبب الغارات والصواريخ
فتحس إن الناس تمام .. طالما المصيبة جاية على دماغ الكل
وإن مش أنا بس اللي بيتي اتهد
لأ .. ده بيوت الحي كله
فــ كلنا في الهم سوا
فــ تمام .. هنعرف نتماسك ونقوم ونشد من عضد بعض
ونستأنس ببعض في مصيبتنا اللي جمعتنا
على عكس المصائب الخاصة
بحس إن أصحابها بيتوجعوا أكتر
وإن تخطيهم لمصيبتهم بتاخد منهم مجهود ووقت أكبر
.
.
حالة ( مريضة سرطان ) كنت بتابعها
وبروح معاها جلسات الكيماوي
قالتلي مرة
عارفة يا نورا ... أنا وأنا هنا في المركز وباخد الجرعة .. بتطمن أكتر
فــ لما أبديت عدم فهم لكلامها
هي شرحت إنها وهي هنا في المركز
كل اللي حواليها أغلبهم مرضى زيها
وإنها مش لوحدها في المصيبة دي
وإنها لما بترجع بيتها وتكون وسط أهلها
بتحس بخوف وبتحس بالتعب أكتر
لأن ساعتها هي بتحس إنها لوحدها في المصيبة دي
وإن اللي حواليها مش زيها
وإنها بس اللي تعبانة ومريضة
وإن اللي حواليها لو تعبانين
فهما تعبانين من خدمتها
وانها تقيلة عليهم
لكن هنا .. وهي وسط مرضى زيها
بتحس إنها متطمنة وإنها مش لوحدها اللي تعبانة
وإن فيه زيها كتير
.
في الأول كنت مستنكرة وجهة النظر دي
بس لما فكرت فيها حسيت إنها صح
.
.
فــ ربنا يارب يهون على الناس كلها مصائبهم
ويشفي كل مريض
ويرزقنا جميعا العفو والعافية والمعافاة الدائمة في الدنيا والآخرة
اللهم آمين يارب
No comments:
Post a Comment