عندي نظرية في العلاقات بين المنفصلين
هاسميها نظرية
" القطة والأسمنت "
_______
أعتقد إن كتير منكم وقع قدامه فيديو طريف
لعامل أسمنت
بيعمل صبة أسمنت لـ رصيف .. أو مدخل جراج
وتلاقيه بيساوي الأسمنت الطري ده بحاجة كدة زي المسّاحة
علشان تبقى صبة الأسمنت كلها متساوية
وتيجي قطقوطة صغننة كدة هوووب تنط
في المكان اللي فيه أسمنت طري و لسة العامل مساويه
فيقوم الاسمنت يبقى فيه آثار رجل القطقوطة
فيقوم العامل هاشش القطة
ويرجع من تاني يساوي صبة الأسمنت الطري
فتقوم القطقوطة ترجع من تاني تنط
وتمشي تتمخطر في الأسمنت الطري
فيقوم العامل هاشش القطة ويساوي الأسمنت الطري
وهكذا دواليك
العامل يساوي الاسمنت .. والقطة تنط وتسيب آثار
فالعامل يهش القطة ويرجع من تاني يساوي الاسمنت
.
.
أهو أنا بحس العلاقات بين المنفصلين
بتبقى كدة بالظبط
خصوصا قبل التخطي والتجاوز والموف أون
بتبقى عاملة زي الأسمنت الطري
الطرفين اتفقوا على الإنفصال
وخلاص كل واحد فيهم خد فترة يساوي فيها روحه
ويلملم أثار خسارته
ومستني بس إنه يتخطى تماما العلاقة دي
علشان يقدر يقوم ويكمل حياته
مستني يعني الأسمنت ينشف علشان يقدر يمشي عليه
فــ هوب .. يقوم حد منهم يتواصل مع الطرف التاني
أي نوع من أنواع التواصل بقى
مكالمة أو ماسيدج أو إيميل أو لقاء متعمد
فـ اللي بيحصل إن التواصل في الفترة دي
بيبقى عامل زي القطة اللي مشيت على الأسمنت الطري
اللي هو ياااادي النيلة .. رجعنا تاني لنقطة الصفر
وهنرجع من تاني نساوي ونلملم ونظبط
.
فـ يا جماعة ... لما تنفصلوا عن بعض
ياريت الطرفين يعملوا معاهدة كدة مع بعض
إن مفيش أي نوع من انواع التواصل يحصل ما بينهم
خصوصا بعد الانفصال علطول أو بمدة صغننة
علشان يدوا لبعض وقت إن الأسمنت ينشف
وعلشان يضمنوا إن لو حد فيهم تواصل مع التاني
يبقى خلاص .. الطرفين يبقوا واثقين إن التواصل ده
مش هيسيب أثار سلبية وموجعة على روحهم
لكن التواصل بعد الانفصال بفترة صغننة
ده بيرجّع الطرفين لنقطة الصفر من تاني
والأمر بيبقى مجهد ومؤلم عاطفيا ونفسيا
وعند البعض بيبقى مؤلم جسديا وصحيا
.
أنا متفهمة إن في الأول
إن بيحصل ذبذبة كدة ما بين الرغبة في التواصل
وما بين البعد وحفظ الكرامة
وأغلبنا الشوق والفقد بيخلونا نضعف
ونرجع نتواصل مع الطرف التاني
بس التواصل ده مش هيرجع المية لمجاريها
ولا العلاقة هترجع تاني
ومش بينوبنا غير الوجع من جديد
فــ نمسك نفسنا شوية
نستحمل في الأول
لحد ما نحس إننا خلاص تمام جدا وتخطينا وتجاوزنا
واننا نقدر دلوقتي نرفع سماعة التليفون أو نبعت ماسيدج
ونسأل عن أخبار الطرف التاني
كــ تواصل عادي جدا بين اتنين معارف قدامى
.
اصبروا بس على نفسكم شوية
لحد ما الأسمنت ينشف تماما
وتقدروا تمشوا عليه براحتكم
من غير ما رجليكم تغرز فيه
وتسيب أثار عليه
وده رحمة بيكم .. وبالطرف التاني
-_-
No comments:
Post a Comment